63
Alaa hinanna fisa siimayaan xa
1 Dawudaa bɛtina, a yi Yuda tonbon yireni waxatin naxan yi.
2 Ala, n ni i fenma,
n ma Ala nan i tan na.
I xɔnla n sɔndɔmɛn na.
I xɔnla n fati bɛndɛn ma
alo min xɔnla n suxuma
tonbonni ito yi kii naxan yi,
bɔxɔ magenla, ige mi dɛnaxan yi.
3 N xa i to i ya yire sariɲanxini.
N yi i sɛnbɛn nun binyeni gbɛ.
4 I ya hinanna fisa siimayaan xa.
Nanara, n na i batuma.
5 N barikan birama i xa nɛn
n ma siimayaan birin yi,
n na n yiine yite i maxandideni.
6 N nii yifanma n ma nɛn,
alo n na wasa donse hagigɛne ra.
N yi i tantun sɛwa bɛtine yi.
7 N nɛma saxi n ma saden ma,
n na n mirima i ma.
N xaxili luma i xɔn nɛn kɔɛɛn birin na.
8 Amasɔtɔ i tan nan n mali muxun na,
n sɛwa bɛtin ba i nininna bun ma.
9 N bata kankan i ma,
i yiin nan n natangama.
10 Naxanye katama n faxa feen na,
ne faxama nɛn.
11 E faxama silanfanna ra nɛn yɛngɛni,
kankone yi e binbine don.
12 Nayi, Mangan sɛwama nɛn Ala yi.
Naxanye e kɔlɔma Ala xinli,
ne a matɔxɔma nɛn.
Koni wuledene dɛɛne raxutuma nɛn.