69
Sɔxɔlɛ maxandina
1 Dawudaa bɛtina, bɛti baane kuntigin xa. A xa ba alo bɛtin naxan xili: “Fuge Faɲine.”
2 Ala, n nakisi!
Igen bata te han n kɔɛɛn bun ma.
3 N bitinma boro tilinxini.
San tide yo mi na yi.
N tilinna xɔrɛ ra.
N na n maminma fufani.
4 N bata xadan xili tideni n mali feen na.
N kɔɛ yinla nan fa n xɔlɔma.
N yɛɛne bata xadan,
e bata bu i yɛɛ ra kira yi.
5 Naxanye n naɲaxuxi fuuni,
ne wuya dangu n xunsɛxɛn na.
A gbegbe wama n faxa feni,
naxanye n yaxuyaxi fuu!
N mi naxan muɲaxi n na raxɛtɛ ba?
6 N yi daxuyani kii naxan yi,
i na kolon
Ala, n sɔnna mi luxunxi i tan ma.
7 Marigina Alatala Sɛnbɛn Birin Kanna,
n nama ne rayagi
naxanye yigi saxi i yi.
Isirayilaa Ala,
n nama findi ne yarabi muxu ra,
naxanye i batuma!
8 E n konbima i tan nan ma fe ra.
N bata yagi han!
9 N bata liga
alo xɔɲɛna ngaxakedenne xa,
alo fa muxuna n xabilani.
10 I ya banxina fe xaminna n ma,
han a n ganma alo tɛɛna.
Nanara, e i konbin naxanye tima,
ne n tan nan lima.
11 N na wuga, n yi sunna suxu,
yamaan yi n konbi.
12 N na kasa dugin nagodo n ma sununi,
yamaan yi sabaan so n na.
13 Naxanye batuma taan so dɛɛn na
ne n nafɛyama.
Dɔlɔ minne sigin sama, e n magele.
14 Koni Alatala, n na i tan nan maxandima.
I ya hinan gbeen waxatin ni i ra n xa.
Ala, n yabi i ya marakisi barakaxini.
15 N xunba, n nama bitin boroni.
N xunba n yaxune yii, n ba tilinni.
16 I nama tin fufaan yi sa n xun ma.
I nama tin n yi n mamin tilinni,
hanma n bitin gaburun na.
17 N ma Alatala, n yabi
i ya hinanna nun i ya fanni.
I firifiri n binni i ya kininkinin gbeeni.
18 I nama i yɛtagin luxun i ya walikɛɛn ma.
N yabi iki sa! Bayo n tɔrɔxi.
19 Fa n fɛma i yi n nakisi.
N xunba n yaxune yii.
20 I a kolon n konbima kii naxan yi,
n nayagima, n nayarabima.
I n yaxune birin toma.
21 Konbin bata n bɔɲɛn kala
han n yigitɛgɛ.
N yengi yi kininkininna a fe ma nun
koni se mi na.
N yengi yi madɛndɛnna nan ma nun,
koni n mi se to.
22 E dabarin sama n ma donseni.
Min xɔnla to n suxu,
e minse xɔlɛn so n yii.
23 Ala xa e ɲaxaɲaxane findi luti ratixin na e yɛɛ ra.
Ala xa e hɛrin findi e suxu xunna ra.
24 E yɛɛne xa rafɔrɔ ayi,
e yi danxu!
E fanne xa ba a ra waxatin birin!
25 I xa fitina e xili ma,
i ya xɔlɔ gbeen yi e li.
26 E dɔxɔden xa kala.
Muxe nama lu e bubune kui.
27 Bayo, i naxanye tɔrɔxi,
e ne ɲaxankatama.
I naxanye ɲaxankataxi,
e ne fe falama sɛwani.
28 I xa e magi e hakɛne birin na.
E nama i ya kisin sɔtɔ mumɛ!
29 Ala xa e xinle ba nii rakisin kitabun kui.
E nama basan tinxin muxune xinle ra.
30 Koni n xɔlɛni, n mɔn yigitɛgɛxi.
Ala, i ya marakisin xa n natanga!
31 N na Ala xinla matɔxɔma bɛtini nɛn.
N yi a gboon nali,
n barikan bira a xa.
32 Na Alatala kɛnɛnma nɛn
dangu ɲinge baan na a xa,
dangu tura kamalixin baan na saraxan na.
33 Yiigelitɔne a toma nɛn, e sɛwa.
Ɛ tan naxanye Ala fenma,
Ala xa siimayaan fi ɛ ma.
34 Alatala tuli matixi tɔrɔ muxune ra.
A mi ɲinanma muxu suxine xɔn
a gbeen naxanye ra.
35 Koren nun bɔxɔn nun fɔxɔ igena
e nun e yi seene,
e birin xa Ala matɔxɔ.
36 Ala Siyon taan nakisima nɛn.
A Yuda taane tima nɛn.
A mɔn yi a yamaan nadɔxɔ na yi,
e mɔn yi findi a gbeen na.
37 Na findima a walikɛne mamandenne kɛɛn na nɛn.
Naxanye Ala xanuxi, ne yi lu na yi.