78
Ala nun a yamana fe
1 Asafi a fala ɲaxumɛna.
N ma muxune,
ɛ ɛ tuli mati n ma xaranna ra,
ɛ yi n ma fala xuine ramɛ.
2 N sandane nan sama.
N wundo fonne nan yɛbama.
3 En bata feen naxanye mɛ,
en yi e to,
en fafane feen naxanye falaxi en xa,
4 en mi ne luxunɲɛ en ma diine ma.
En Alatala matɔxɔ feene
nun a sɛnbɛn nun a kabanako feene
falama en mamanden famatɔne xa.
5 A bata tɔnne so Yaxuba bɔnsɔnna yii.
A mɔn yi sariyan so Isirayila yii.
A en fafane yamari,
a e xa e diine xaran na ma,
6 alogo muxu famatɔne xa e kolon.
Hali diin naxanye munma bari singen,
ne fan yi a fala e diine xa.
7 Nayi, e fan e yigi sama Ala fari nɛn.
E mi fa ɲinanma a wanle xɔn ma,
e yi a yamarine suxu.
8 Nayi, e mi luma
alo e benbane yi kii naxan yi nun.
Tengbesendene nun murutɛdene nan yi ne ra nun
naxanye mako mi yi Alaa fe yi,
e mi yi tɔgɔndiyaxi Ala ma.
9 Xanla yi Efirami bɔnsɔnna muxun naxanye yii,
ne e gi nɛn yɛngɛn lɔxɔni.
10 E Alaa layirin nabeɲin,
e tondi a sariyan suxɛ.
11 E ɲinan nɛn Ala kɛwanle xɔn,
a kabanako feen naxanye yitaxi e ra.
12 A kabanako feene liga nɛn
e benbane yɛɛ xɔri
Misiran yamanani, Soyan yi.
13 A yi fɔxɔ igeni taxun a tagi
a yi e ragidi.
A yi a liga igene yi mate ayi e bode fari
alo banxi kankena.
14 A ti e yɛɛ ra yanyin na kundani.
A mɔn yi ti e yɛɛ ra kɔɛɛn na tɛɛ dɛgɛni.
15 A fanyeni bɔ tonbonni,
a yi tigin namini, e yi e min.
16 A yi xuden namini gɛmɛne yi,
igen yi godo alo baana.
17 Koni e lu yulubin ligɛ a ra,
e murutɛ Kore Xɔnna Ala ma tonbonni.
18 E yi a nata, a e xa Ala bunba,
e yi e waxɔn donseen maxɔdin Ala ra.
19 E yi Ala mafala, e naxa,
“Ala nɔɛ donseen naminɛ tonbonni ito yi ba?
20 A to gɛmɛn bɔ,
igen nan mini ayi yati,
koni a nɔɛ burun nun suben soɛ a muxune yii ba?”
21 Na ma, Alatala e xuiin mɛxina, a fitina.
A yi xɔlɔ Isirayila ma,
tɛɛn yi mini Yaxuba bɔnsɔnna xili ma.*78.21 Na feen sɛbɛxi Yatɛne 11.1 kui.
22 Amasɔtɔ e mi yi laxi Ala ra,
e mi yi e yigi saxi a marakisini.
23 Koni a yi kuyen yamari,
a koren dɛɛne xa rabi,
24 a yi Manna donseen nagodo e ma,
a ariyanna donseen so e yii.†78.24Manna donsena a fe mato Xɔrɔyaan 16.13-15 nun 16.31 kui.
25 Adamadiine yi malekane burun don.
Ala yi donseen nasiga e ma han e lugo.
26 Ala yi foyen nafa keli sogetede binna ra.
A mɔn yi foyen namini yiifanna ma a sɛnbɛn na.
27 A yi xɔline ragodo e ma
naxanye yi wuya alo baan mɛɲɛnsinna.
28 E yi yolon e daaxaden tagi e bubune rabilinni.
29 Yamaan yi e dɛge han e lugo.
E yi waxi naxan xɔn ma Ala na so nɛn e yii.
30 Koni benun e xa wasa, donseen mɔn yi e dɛ,
31 Ala yi xɔlɔ e ma, a yi e sɛnbɛmane faxa,
Isirayila banxulanne.
32 Hali na birin to liga,
e mɔn lu nɛn yulubin ligɛ!
Hali a to kabanako feene liga e mi dɛnkɛlɛya.
33 Nayi, a yi e dunuɲa yi gidin lu fuuni,
han e yi faxa kuisanni.
34 A to ndee faxa,
a dɔnxɛne yi tubi,
e yi Ala fen sɔbɛɛn na.
35 A yi rabira e ma
fa fala Ala nan e kantan fanyen na,
a Kore Xɔnna Ala nan yi e xunba muxun na.
36 Koni e falane mi yi fixaxi,
e yi wulen nan falama a xa.
37 E mako mi yi Alaa fe yi,
e mi yi tinxinxi Ala layirini.
38 Koni bayo a kininkinin,
a yi e hakɛne mafelu.
A mi e halagi.
A xɔlɔn lu dɔxɔɲa ma wuyaxi,
a mi fitina e xili ma.
39 A a kolon fa fala daɲɔxɔn nan tun e ra,
e siimayaan luxi nɛn alo foyedina
naxan danguma a mi xɛtɛ.
40 E murutɛ Ala ma nɛn tonbonni sanɲa ma wuyaxi.
A yi sunu e fe ra burunna ra sanɲa ma wuyaxi!
41 E yi Ala bunbama yɛ yo yɛ.
E yi a liga Isirayilaa Ala Sariɲanxin yi xɔlɔ.
42 E ɲinan nɛn a sɛnbɛ gbeen xɔn,
e nun a e xunba e yaxune yii lɔxɔn naxan yi.
43 E ɲinan nɛn a taxamasenne xɔn Misiran yi,
e nun a kabanako feen naxanye liga Soyan yi.
44 A yi e baane findi wunla ra.
Ige yo mi yi na nun
Misiran kaane yi naxan minɲɛ.
45 A tugetuge xɔlɛne rasiga e ma
naxanye e don.
Xunɲɛne fan yi e bɔxɔn kala.
46 A e siseene so suɲɛne yii.
A bogiseen birin so tuguminne yii.
47 A yi e wudi binle kala balabalan kɛsɛne ra.
A yi e xɔdɛ binle kala xunbenla ra.
48 A yi e ɲingene faxa balabalan kɛsɛne ra.
Galanna yi e xuruseene faxa.
49 A fitinaxin yi a xɔlɔ ɲaxin
nun a bɔɲɛ teen nun a maraɲaxun nagodo e ma.
Halagi ti ganla nan yi ne ra.
50 A mi xɛtɛ a xɔlɔn fɔxɔ ra,
a mi tin e niine yi rakisi,
a yi e faxa fitina furene ra.
51 A yi dii sarane faxa Misiran denbayaan birin yi.
Xami a denbayane dii singene birin
naxanye singe e fangan mayita.
52 A yi fa a yamaan na
keli Misiran yi alo xuruse kuruna.
A yi e kantan burunna ra.
53 A yi ti e yɛɛ ra, sese mi e sɔtɔ,
nanara e mi gaxu.
Koni fɔxɔ igen yi a ragali e yaxune ma.
54 A yi fa e ra a bɔxɔ sariɲanxini
na geyaan ma a naxan sɔtɔ a sɛnbɛn xɔn.
55 A siya gbɛtɛne kedi nɛn a yamaan yɛɛ ra,
a yi e bɔxɔne yitaxun e ra.
A yi Isirayila bɔnsɔnne rasabati e konne yi.
56 Koni e yi murutɛ Kore Xɔnna Ala ma,
e yi a bunba.
E mi e xaxili lu a maxadi xuine xɔn,
57 e yi e masiga a ra,
e yanfan ti alo e benbane.
E mi fa tinxinxi
alo xalimakuli yidɔxina.
58 E Ala raxɔlɔ nɛn e suxure batudene ra.
E yi Ala raxɔxɔlɔn e ala sawurane xɔn.
59 Ala to na mɛ, a yi xɔlɔ han!
Nanara, a yi a mɛ Isirayila ra feu!
60 A yi a banxin nabeɲin naxan Silo yi,
a yi dɔxi adamadiine tagi dɛnaxan yi nun.
61 A yi tin a sɛnbɛ kankiraan yi suxu.
A nɔrɔn misaala yi so yaxune yii.
62 A yi tin a muxune yi faxa silanfanna ra,
a yi a xɔlɔ gbeen nagodo a muxune ma.
63 Tɛɛn yi e banxulanne gan,
han ɲaxalan dii ti sigine yi dan na fe ra.
64 Saraxaraline yi faxa silanfanna ra.
Koni yɛngɛn mi tin kaɲa gilɛne yi e wuga.
65 Dɔnxɛn na, Marigin yi keli
alo a yi xiin nɛn.
A yɛngɛn so
alo sofa sɛnbɛmaan na manpaan min.
66 A mɔn yi a yaxune kedi.
A yi e rayarabi habadan!
67 A yi a mɛ Yusufu bɔnsɔnna ra.
A mi Efirami bɔnsɔnna sugandi.
68 A Yuda bɔnsɔnna nan sugandi
e nun a Siyon Geyaan naxan xanuxi.
69 A yi a Yire Sariɲanxin ti mɛnni
alo kore xɔnna nun bɔxɔ xɔnna
naxanye na habadan!
70 A yi a walikɛɛn Dawuda sugandi.
A yi a ba yɛxɛɛ kulan dɛxɔn.
71 A yi a tongo xuruse kantandeni,
a yi a findi a yamaan kantanmaan na,
Yaxuba bɔnsɔnna,
a gbee muxune Isirayila.
72 Dawuda yi a ɲɔxɔ lu e xɔn ma ɲɛnige faɲini.
A ti e yɛɛ ra ki faɲi.