1 Naxan na yigiya Kore Xɔnna Ala ma,

na bata lu Ala Sɛnbɛ Kanna makantanna bun.

2 N na a falama Alatala xa nɛn, n naxa,

“N yigiyaden nun n kantan yinna nan i tan na.

N ma Ala nan i tan na

n yigin saxi naxan yi.”

3 A i ratangama nɛn luti ratixine birin ma,

e nun faxa furene.

4 A i ratangama nɛn,

i yi i luxun a yi,

alo tɔxɛ ngana a gabutɛne soma

a diine xun na kii naxan yi.

A lannayaan yi findi i yɛ masansan wure lefaan na.

5 I mi gaxun kɔɛɛn gbalon yɛɛ ra,

hanma xalimakunla

naxanye wolima yanyin na.

6 I mi gaxuɛ fitina furene yɛɛ ra

naxanye i lima dimini,

hanma fure ɲaxin naxanye faxan tima yanyin na.

7 Muxu wuli kedenna faxama nɛn i dɛxɔn ma,

muxu wuli fu yi bira i rabilinni,

koni fefe mi ligɛ i tan na.

8 I i yɛɛn tima nɛn tun,

i yi muxu ɲaxine saranna to.

9 N bata n yigiya i tan ma Alatala.

I na Kore Xɔnna Ala findi i luxunden na,

10 fe ɲaxi yo mi i liyɛ.

Gbalo yo mi masoɛ i konna ra.

11 Ala yamarin fima nɛn a malekane ma i ya fe yi

alogo e xa i kantan i ya sigatiin birin yi.

12 E yi i tongo

alogo i nama i sanna din gɛmɛ yo ra.

13 I tima yatane nun saɲine fari nɛn.

I yi yata sɛnbɛmane nun saɲi ɲaxine yibodon.

14 Ala naxa, “N na kanna rakisima nɛn

bayo a n xanuxi.

N na ratangama nɛn

bayo a n kolon Ala ra.

15 A na n xili, n na a yabima nɛn.

N luma a xɔn ma nɛn tɔrɔni.

N na a xunbama nɛn,

n yi binyen sa a ma.

16 N yi siimaya xunkuye faɲin fi a ma,

n yi a yita a ra

a n tan nan a rakisima.”