1 Ala naxan gbeeɲɔxɔ tiin na, Alatala,

i tan Ala naxan gbeeɲɔxɔ tiin na,

i xa i yɛtɛ makɛnɛn.

2 Dunuɲa kitisana, keli,

i yi wasodene saran e kɛwanle ra.

3 Alatala, muxu ɲaxine luma ɲaxanɲɛ

han waxatin mundun yi?

4 Fe ɲaxi rabane e yɛtɛ matɔxɔma kanba falane yi.

5 Alatala, e bata i ya muxune yigbɛtɛn.

E bata i ya yamaan nayarabi.

6 E kaɲa gilɛne nun kiridine nun xɔɲɛne faxama.

7 E yi a fala, e naxa,

“Alatala mi nxu toma.

Yaxubaa Ala mi a ɲɔxɔ luxi a xɔn.”

8 Ɛ a liga ɛ yeren ma

ɛ tan xaxilitarene,

ɛ tan daxune,

ɛ xaxili sɔtɔma waxatin mundun?

9 Ala naxan en tunle rafalaxi,

a tan mi fala xuiin mɛma ba?

Ala naxan en yɛɛne rafalaxi,

a tan mi toon tiin ba?

10 A tan naxan siyane birin xuruma,

a mi e fe saranma e ra ba,

a tan naxan muxune xaranma fe kolonna ma?

11 Alatala muxune miriyane kolon,

a sese mi ne ra.

12 Alatala, sɛwan na kanna xa

i naxan xuruma,

i naxan xaranma i ya sariyan xɔn.

13 I matabun fi a ma tɔrɔ lɔxɔne yi,

han yinli ge muxu ɲaxine yɛɛ ra.

14 Alatala mi a muxune rabeɲinma,

a mi a mɛma a kɛɛn na.

15 Kitine mɔn sama nɛn tinxinni,

sɔndɔmɛ faɲi kanne birin tinma nɛn na ma.

16 Nde tiyɛ n xɔn muxu ɲaxine xili ma?

Nde kelɛ,

a ti n xɔn fe ɲaxi rabane xili ma?

17 Xa Alatala mi yi n mali nun,

n niin yi bama nɛn mafurɛn!

18 N to yi a falama, n naxa,

“N birama nɛn!”

Alatala, i yi n mali i ya hinanni.

19 N na kuisan,

i ya hinanna n niin lugoma nɛn sɛwan na.

20 I mako mi kitisa tinxintarene ma,

naxanye muxune ɲaxankatama e tɔnne yi.

21 E e malanma tinxin muxune xili ma,

e yi sɔntarene yalagi, e faxa.

22 Koni Alatala bata findi n ma faran makantanxin na.

N ma Ala nan n kantan fanyen na

n nan n luxunma naxan yi.

23 A e hakɛne saranma e ra nɛn.

Alatala en ma Ala e raxɔrima nɛn e fe ɲaxine ma.