Ɛ bɛti nɛnɛn ba Alatala xa.

A bata kabanako feene liga!

A en nakisima a sɛnbɛn nun a sariɲanna nan xɔn.

2 Alatala bata a marakisin nun tinxinna yita siyane ra.

3 A mi ɲinanxi a hinanna nun a tinxinna xɔn

Isirayila yamaan xa.

Bɔxɔn danne birin bata a to

a en ma Ala bata en nakisi.

4 Dunuɲa muxune birin xa sɔnxɔ sɛwani Alatala xa.

Ɛ sɛwaxin yi sɔnxɔ han,

ɛ yi a tantun bɛtini!

5 Ɛ tantun bɛtine ba Alatala xa bɔlɔnna ra!

Ɛ bɔlɔnna nun tantun bɛti xuini te!

6 Ɛ xɔtane nun fenne fe.

Ɛ sɔnxɔ sɛwani mangan xa, Alatala.

7 Fɔxɔ igen xa a xuini te

e nun seen naxanye birin a xɔrɛ ra.

Dunuɲa muxune birin xa e xuini te.

8 Baane xa e xuini te

alo yii bɔnbɔ xuina!

Geyane xa sɔnxɔ sɛwani e bode xɔn!

9 E sɛwa Alatala yɛtagi,

amasɔtɔ a fama nɛn.

A fama nɛn, a kitine sa dunuɲa yi.

A dunuɲa muxune makitima nɛn tinxinni,

a siyane kiti a ɲɔndini.