Alatala, n bata n xui ramini i ma,

fa n mali mafurɛn!

N na i xili, i tuli mati n na.

2 N ma maxandin xa lu

alo wusulanna i yɛtagi.

N yiine yitexin xa liga

alo ɲinbari ra saraxana.

3 Alatala i yengi dɔxɔ n fala xuiin xɔn,

i yi n dɛɛn kantan.

4 I nama tin n bɔɲɛn yi lu fe ɲaxini,

n nama fe ɲaxine liga nxu nun fe ɲaxi rabane.

Nxu nama nxu dɛge nxu bode xɔn.

5 N tinma nɛn tinxin muxun yi n bɔnbɔ,

bayo hinanna na a ra.

A rafan n ma, a yi n kawandi.

Na luxi nɛn alo turen na susan n xunni.

N mi tondɛ na ma.

Koni n na Ala maxandima nɛn

fe ɲaxi rabane wanle xili ma.

6 E mangane radinma nɛn geyaan san bun fanyene ma,

muxu ɲaxine yi a kolon nayi

a ɲɔndin nan n ma falane ra.

7 Xɛɛn bima kiin de,

bɔxɔn yi buxa,

nxu xɔnne xuyama ayi na kiini laxira so dɛɛn na.

8 Marigina Alatala,

n yɛɛn tixi i tan nan na.

N na n luxunma i tan nin,

i nama tin n faxa.

9 N natanga na lutine ma

e naxanye ratixi n yɛɛ ra

e nun fe ɲaxi rabane wosone.

10 Ala xa muxu ɲaxine suxu

e yɛtɛna luti ratixine ra,

koni n tan xa dangu bɔɲɛ xunbenli.