Ŋwàk Nə̀ Mantombì
nə̀ JON à Còom
Jon à còm ŋwàk ènə ŋga bwìŋ sə yə'rə də bum sə̀ aco ŋwè ye bə lis, nə jwɛŋ bə bo pwe'fo' bʉp. Wo sə dʉk də bum sə̀ bə̀boŋ mègù sə̀ yà'a ma nə̀ ndzənə yòŋsə̀. Fana ŋwèe kà də yi sə dʉk də mʉ gʉ̀-a vɛ' yà' ye bʉp kè bə̀boŋ dʉk, bʉ̀ʉsə̀ bum pwe' sə̀ yi sə gʉ̀ bə ni' ye yəyərə̀. Mʉmvə̀'nə̀ wo à tse' nsàp tsətsərə̀ ànə fana wo sə dʉk də ànə ka yeŋ co Jisòs mo Nwì tse' ŋgùpni' yeŋ.
Jon com ŋgòcèp càsə bum ba: də bwìiŋ cum cù mò'fis bə Nwì nə ye bə mo ye Jisos Krɛst. Yi còm sə̀' də bwìiŋ jəŋ ŋkərə̀ bə bum sə̀ mvwès sə̀ bʉ̀ʉ mok sə yə'rə kɛ' yà'a bʉ̀ʉsə̀ yà'a nə gʉ bʉpsə ncu nə̀ cù mò'fis ènə. Yi sə tsok mali fa wo də Jisòs à ye ŋwè bə nə̀ zìnə, nə ye də ŋwə̀ nə̀ nà' dzəm-a Nwì fana nà' tse' ŋgògì gì nə̀ nà' tse' marɛŋ nja.
1
Ncèp Nə̀ Nà' Tse' Lùŋ Nə
Yumòk à ye to ye fo' nə̀ mʉ̀ à yuk nà', nə ye nà' bə lis am, nə jwɛŋ nà' bə bo sə̀'. Yu ànə a Ncèp nə̀ nà'a lùŋ nə, ŋga nà'a Jisòs mo Nwì. Lùŋ nə ànə yəəŋ, fana vès ye yi, nə sə tsə̀' fa-à nə weŋ bə nzak lùŋ nə̀ nà'a nə̀ kà mè, nə̀ nà' à ye to ntòbə tɛ̀' Nwì ŋkuŋ vès ye nà' nə. Vès sə tsə̀' fa weŋ bum sə̀ vès à yə, nə yuk yè'sə, ya ŋga wèeŋ cum ncʉ̀ mò'fis vesùwèŋ. Vèes cum cù mò'fis ves Tà Nwì nə ye mo ye Jisòs Krɛst wèŋ. Njo nə̀ vès còm bum yè'sə də ya kwəkwa nə̀ vesùwèŋ nə yam tsə'rə wesə bə̀boŋ.
Sə Gi Sənə Marɛŋ Bʉsə̀ Nwìi Marɛŋ
Ncèp nə̀ vès à yuk bohòmo ye, nə sə tsə̀' fa-à nə wèŋ nə də, Nwìi rərɛŋ co marɛŋ, yi ka ŋgà ndzəndzəm ye lok saam. A ye-a ŋga vesùwèŋ dʉk də, ves Nwì wèŋ cu cù mò'fis, nə sə gi sənə mandzəm, fana ye də yusə̀ vesùwèŋ sə cèp, nə sə gʉ sə pwe'fo' mvwès. Vesùwèeŋ gì-a sənə marɛŋ, mʉmvə̀'nə̀ yi sə̀' sənə marɛŋ, ye də vesùwèeŋ mvwe' mò'fis. Jisòs mo ye sə cùk rɛŋsə fis fa ves bʉp avès bə ndʉəm ye. A ye-a ŋga vesùwèŋ dʉk-a də a ka ŋgàa gʉ̀ bʉp yeŋ, ye də vesùwèŋ sə bòrə ni' avès, vesùwèŋ ka zìnə nə riŋ lok nə̀ mvèsə̀. A ye-a ŋga vesùwèŋ gʉ̀ bʉp, nə dzəm fis kə̀ cùhu vès, fana yi ŋwə̀ nə̀ zìnə, yi nə ye sə̀' kə̀kʉrə̀ ŋgòswì fa ves, nə cuk rɛŋsə fis fa ves bʉp avès sə. 10 A ye-a ŋga vesùwèŋ dʉk də, a ka bʉp gʉ, ye də vesùwèŋ sə dʉk yà'sə də yi ŋgà cì' mvwès. Ye də ncèp ye nə ka sə ntʉʉ̀ vès yeŋ.