Ŋwàk Nwì Ma Rʉ̀k Nə̀ Fi 1 Tètàlonikà 1

Ŋwàk nə̀ Mantombì,

nə̀ Pol à Còm Fa Bʉ̀ʉ sə̀ Mvwe' Lak

TÈTÀLONIKÀ

Lak Tètàlonikà à ye tu lak nə̀ mvwe' nzeŋgòŋ Màsìdoniyà nə. Pol à kə̀ mùk cos fo' yi. Pol nə, nə ye Timatì bə Silàs wèŋ à və̀ fo' bəbɛ'. À ka sap fana bʉ̀ʉ Juus mok wèŋ yeto ŋgòto liŋ Pol sə bʉp, bʉp. Wo à sə gʉ̀ vɛ'nə bʉ̀ʉsə̀ wo à sə wa mʉmvə̀'nə̀ Pol à sə tsòho ncèp Jisòs nə fana bʉ̀ʉ awo mok sə yèto ŋgòbwì lòmok ma nə̀ Pol nə. Yà' à ghak fana Pol me'rə lak Tètàlonikà sə. À sàp ko' fana Timatì com tsok vesə fa Pol nə mʉmvə̀'nə̀ cos nə̀ mvwe' lak Tètàlonikà nə sə gìi.

Pol à còm fa wo ŋwàk nə̀ mantombì ènə ŋgòtsə̀' Krətèeŋ sə də wo ko ntʉm, nə təəŋ mali gʉgʉŋ. Wo à sə fek kɛ'cà yà' mʉ cos anə bə mʉmvə̀'nə̀ də Jisòos nə̀ bwì foho və̀ə. Wo à sə fek mok dʉk də, a ye-a ŋga ŋwè dzəm bohòJisòs, nə kpʉ ŋga Jisòs nə ka ntòbwi və, fana Jisòs nə kə̀ bwì və̀ ntsə'mòk, wo tse' yàwo lùŋ nə̀ nà'a nə̀ kà mè sə̀' àlɛ? Jisòs nə nə və yè'sə sèŋ nɛ? Pol à jə mvə̀k ènə ŋgòtsə̀' gesə fa wo də Jisòos nə bwi foho və. Yi və̀ə, yi jəŋ bʉ̀ʉ sə̀ wo à dzəm bohòyi nə kpʉ lo laŋ kè sə̀ wo cu malì ntòŋwʉm àlɛ' pwe' ya bə yà'wèeŋ lo nə kə cum mok mvèsə̀ nə̀ mvèsə̀. Yi tsok wo də yà'wèeŋ sə fak mali megu vɛ'nə nə sə kontʉm, də Jisòs nə nə̀ və̀ tsə lì ntsə'mòk.

1 Còm ŋwàk nè'e mʉ̀ʉ Pol, ves Silàs, nə ye Timatì wèŋ bəbɛ'. Vès sə còm fa nà' bohòbʉ̀ʉ cos nə̀ mvwe' lak Tètàlonikà. Vès lɛŋ də Tà Nwìi fa weŋ fifi, nə gʉ weŋ bə̀boŋ.

Pol Kwa Bə Fantʉm
Nə Ye Ncù Krətèŋ
Mvwe' Lak Tètàlonikà

2 Ghà nə̀ vèes lɛŋgə̀ Nwì nə̀ yi tɛ̀' avès pwe', vès sə tsərə wèŋ. Vès sə kwasə yi bʉ̀ʉ tu awèŋ. 3 Bʉsə̀ vèes tsərəgə̀ fàak sə̀ wèŋ à gʉ̀ bʉ̀ʉsə̀ wèŋ à fa ntʉm awèŋ bohòTà avès Jisòs Krɛst ŋgòfàk bohòyi. Vès sə tsərə mvəsə̀ wèŋ à fàk gʉgʉŋ bʉ̀ʉsə̀ wèŋ dzəm yi, nə ye mvəsə̀ wèeŋ naaŋgə̀ tu bohòyi bə ntʉm nə̀ zìnə, nə̀ co wèeŋ nə kà maŋkwɛ̀ŋ foho yà'a sə̀'.

4 Bwetɛ̀' avès, vès rìŋtse' dʉk də Nwì dzəm weŋ, nə cokfis jə noŋsə weŋ də wèeŋ bʉ̀ʉ ye. 5 Vès rì vɛ'nə bʉ̀ʉsə̀ ghà nə̀ vès à jə və̀ fa weŋ Ntirə̀ nə̀ Bə̀boŋ nə̀ Jisòs Krɛst nə, nà' ànə ka bohòwèŋ co ncèep sə̀ wà və. Nà' ànə ye bə ŋàaŋ Yòŋsə̀ nə̀ Rərɛŋ nə. Wèŋ à rì bə̀boŋ də Ntirə̀ nə̀ Bə̀boŋ nə ye zìnə. Wèŋ rì ncu avès nə̀ bə̀boŋ nə̀ vès à sə cu, ŋga vès cu vesùwèŋ sə̀'. Vès à cu vɛ'nə lòoŋ ya yà'a boŋ ma njàwèŋ. 6 Wèŋ ànə cum fʉ'rə nsàp ncu àvès, nə ye nə̀ Tà nə. Wèŋ ànə ye na ŋgə' sə̀' wùriŋ fana wèŋ à jə ncèp Nwì nə bə kwəkwa. Kwəkwa nə nà' à və̀ bohòYòŋsə̀ nə̀ Rərɛŋ nə. 7 Yè'sə ànə ye vɛ'nə fana, wèŋ ye mok bʉ̀ʉ sə̀ ŋgònìtsə̀' fa bwìŋ mandzə̀ nə̀ bʉ̀ʉ sə̀ wo à dzəm Jisòs pwe' tse' ŋgòye. Wèŋ à ye vɛ'nə bohòbʉ̀ʉ sə̀ mvwe' nzeŋgòŋ Màsìdoniyà, nə ye sə̀ mvwe' nzeŋgòŋ Àkayà. 8 Ncèp nə̀ bə liŋ Tà nə̀ nà'à sə ye ndzə nì'ì wèŋ nə à ka mvwe' nzeŋgòŋ Màsìdoniyà bə Àkayà ləsə megu. Yu sə də, bʉ̀ʉ sə̀ ma fòpwe' a yuk mʉmvə̀'nə̀ wèŋ a fa ntʉʉm awèŋ bohòNwì. Yà' nə yeè nə vɛ'nə fana, yu səmok sə̀ vèes nə cep fe'lə bwi bə liŋ awèeŋ bʉ̀ə̀. 9 Vès yuk də bʉ̀ʉ yà'a wèŋ sə cèp mvə̀'nə̀ vès ànə kə̀ kɛ' ye weŋ, wèŋ gʉ ves bə̀boŋ yà'a. Wo cep mvəsə̀ wèŋ a mè'rə rùum sə̀ wà, nə bwi lo ma nə̀ Nwì, ŋgòkùksə yi nə̀ yi Nwì zìnə nə, nə̀ yi cu ŋwəm. 10 Nə ye sə̀' də wèŋ sə tək mo ye nə̀ yi Jisòs, ŋgòtsə və̀ mʉbu. Yi nə̀ Nwì à lòkoksə yi mvwe' kpʉ. A Jisòs nə̀ yi a caŋsə gɛsə vesùwèŋ mvwe' dzə̀' nzak nə̀ Nwìi nə̀ kə̀ sak bwìŋ bʉ̀ʉ jə̀jòk ye.