1 Ere chiney e be par David u naun rok ni tafen e pilung. Me yan i reb e rran me l’oeg e pong nge yan ngak Nathan ni profet me ga’ar ngak, “Gu be par u lan ba naun nni toy ko ren e gak’iy ni cedar, machane fare Kahol ko M’ag rok SOMOL e kan tay u lan ba tent!”

2 Me fulweg Nathan ngak ni ga’ar, “Mu rin’ lanin’um, ya bay Got rom.”

3 Machane re nep’ nem me ga’ar Got ngak Nathan, 4 “Mman ngamog ngak e tapigpig rog i David ni be lungug ngak, ‘Gathi gur e en ni ngam toy ba tempel ni nggu par riy. 5 Ka nap’an ni gu ayuweg e girdi’ nu Israel u pa’ yu Egypt nge mada’ ko chiney ma dariy bangiyal’ ni kug par u lan ba tempel; gubin ngiyal’ ni gu ma par u lan e pi tent ma gu mayan u bang nga bang. 6 Ma n’umngin nap’an e milekag ni kug tay ni gamad e pi girdi’ nu Israel mdariy bangiyal’ ni kug fith reb e pi tayugang’ ni gu mel’eg, ko mangfan ndawor rtoyed ba tempel ngog ko gek’iy ni cedar.’

7 “Ere mog ngak e tapigpig rog i David ni Gag SOMOL ni Gubin ma Rayag Rog, e be lungug ngak, ‘Kug fekem ko maruwel rom ni tagafaliy e saf u lan e yungi flang kug tem ni gur e tagagiyeg rok e girdi’ rog nu Israel. 8 Ug un ngom ko yung i n’en ni um man riy, ngu’ug gel ngak urngin e pi to’ogor rom nnap’an ni ga be yan i yan nga m’on. Bay gu ga’nag bugwam ni bod e pi tayugang’ ko fayleng. 9-10 Kug duwgiliy bangi ban’en ni fan ngak e girdi’ rog nu Israel ma kug tayrad ngay, ko gin bay ra pired riy ndab ku ni gafgow nagrad. Kingyal’ rthum’gad ngalan e re nam ney mi i li’rad e girdi’ ni tamacham, machane biney e dabki buch bayay. Kug micheg ngomed ni gu ra gel ngak gubin e to’ogor romed mu gu pi’ ngomed e pi’in owchemed. 11 Nap’an ni ga ra yim’ ngan k’eyegem ngak e pi chitamngim, ma bay gu tay rebe pagel u fakam ni nge pilung ma bay gu tay gil’ilungun nib gel. 12 Ma ir e en ni bayi toy ba tempel ni fan ngog, ma bay gguy ni ngi i par ni pi’in owchen e ngu’ur gagiyeggad ni dariy n’umngin nap’an. 13 Bay gu mang chitamngin ma bayi mang ba pagel ni fakag. Ma dab gu chuweg e ayuw rog rok ni bod ni gu rin’ ngak Saul, ni facha’ ni gu chuweg ni nge mang gur e mu pilung. 14 Bay gu tay nge milfan e pi girdi’ rog ngak nge gagiyeg rog ni dariy n’umngin nap’an. Pi’in owchen e dab ra talgad ko gagiyeg.’ ”

15 Me yog Nathan ngak David urngin e tin ke dag Got ngak.

16 Ma aram me yan David ni Pilung ngalan fare Tent u p’eowchen SOMOL, me yan i par nga but’ me meybil ni ga’ar, “SOMOL ni Got, n’en ni kam mu’ i rin’ ni fan ngog, e dariy rogog ni ngam rin’ ngog, nge tabnaw rog. 17 Ma ku dawor mu tal, kum micheg boch ban’en ni fan ngak e pi’in owcheg ko tin bayib e duw nga m’on, me gur SOMOL ni Got, e kam teg ni bod be’ nib ga’fan. 18 Mang boch ban’en ni kabay nrayag ni nggog ngom! Ri gamnangeg ni bfel’ rogon, machane yug aram rogon ma ka mu tay fag, i gag e re tapigpig rom ney. 19 I gur e lanin’um ni ngam rin’ e biney ni fan ngog ma kamdag ngog ni bayi ga’fag. 20 SOMOL, dariy be’ ni bod gur; gubin ngiyal’ ma gamad manang ni kemus ni go’ gur e Got. 21 Dakuriy reb e nam u fayleng ni bod yu Israel, ni gur e mu lagrad ko sib kammang nagrad girdi’ rom. Fapi maang’ang nge tin um rin’ ni fan ngorad ni bfel’ e garareg bugwam u fayleng. Gur e mu leag e girdi’ rom u pa’ yu Egypt mag tuluf e pi nam nnap’an ni be yan e girdi’ rom i yan nga m’on. 22 Kam tay yu Israel ni tirom e girdi’ ni dariy n’umngin nap’an, me gur, SOMOL e kammang Got rorad.

23 “A SOMOL, arme chiney e ngam tay nga tagil’ e tin kam micheg ni murung’ageg nge pi’in owcheg ni ga ra rin’ e chiney i yan ngaram, ma ga rin’ e n’en nmog ni ga ra rin’. 24 Bayi ga’ bugwam, ma girdi’ e dariy n’umngin nap’an ni bay ur ga’argad, ‘Fare SOMOL ni Gubin ma Rayag Rok e Got u ga’ngin yu Israel.’ Me gur e bay mu ayuweg gil’ilungug ni gubin ngiyal’ i yan ngaram. 25 Ku gu thog ni nggu meybil ni aray rogon ngom, i gur Got rog, ni bochan e gur e kamdag urngin e pin’ey ngog, ni gag e tapigpig rom, ma kamog ngog ni bay mu pilungnag e pi’in owcheg. 26 SOMOL, i gur e Got, me gur e kam micheg e pin’ey nib manigil ngog. 27 Gu be wenignag ngom ni ngam fal’eg wa’athan e pi’in owcheg ya ngi i par e felfelan’ rorad ko fal’eg wa’ath rom, SOMOL, i gur e kam tow’ath nagrad, ma fal’eg wa’ath rom e bay i par u dakenrad ni urun.”