1 Hiram ni Pilung nu Tyre e i par ni yow fager David, ma fa’ani rung’ag nike yan Solomon nga luwan David ni chitamngin ke pilung, me l’oeg owchen e nam rok ngranod ra guyed. 2 Me pi’ Solomon e thin nge sul ngak Hiram ni ga’ar: 3 “Ga manang ni chitamag i David e de yag rok ni nge toy ba tempel ni ngu’un liyor riy ngak SOMOL ni Got rok ni bochan e yigi i mael ngak e pi nam ni to’ogor rok ni yad ba liyeg. De yag ni nge toy fare tempel nge mada’ ko ngiyal’ ni gagiyeg Got nge gel David ngak urngin e pi to’ogor rok. 4 Machane chiney e SOMOL ni Got rog e ke tay e gapas u gubin yang u chireg. Dakriy e to’ogor rog, ere da kugur magar ko cham. 5 SOMOL e micheg ngak e chitamag i David ni ga’ar, ‘Fakam e ir e bay gu turguy nge mang pilung nga tomrem, ma ir e bayi toy ba tempel ni fan ngog.’ Ere ku gu turguy ni nggu toy e re tempel nem ni ngu’un liyor ngak SOMOL ni Got rog riy.2 Kro 2:1 6 Ere mpi’ e pumo’on rom ngranod nga Lebanon ngar th’abed e gek’iy ni cedar ni fan ngog. Girdi’ rog e bay ra uned ngorad ko maruwel, ma bay gu pi’ puluwon e tirom e girdi’ nrogon ni bay mog. Ga manang ni dariy be’ ko tirog e girdi’ ni manang rogon i th’ab e gek’iy ni bod feni salap e tirom e girdi’.”

7 Fa’ani taw e thin rok Solomon ngak Hiram mri felfelan’, me ga’ar, “Ke magaer SOMOL, ya ke pi’ ngak David ba pagel nib gonop ke mang pilung ko re nam nem ni pire’ e girdi’ riy!” 8 Me pi’ Hiram e thin nge yan ngak Solomon ni ga’ar, “Ke taw e thin rom ngog, ma kug duwgiliy ni nggu rin’ e tin ka mu wenignag ngog, ni aram e bay gu pi’ e ren ni cedar nge pine. 9 Girdi’ rog e bay ra feked e pi ren nem u Lebanon ngar mada’ niged ko day, miyad m’ag ni bod e wup’eb ngar feked u maday ko gin ka mu turguy. Me pithig e tirog e girdi’ e m’ag riy u rom, ma aram e ke milfan ngak e tirom e girdi’. Me gur e ngam leamnag e n’en ni nge kay e tirog e girdi’.”

10 Me pi’ Hiram ngak Solomon urngin e ren ni cedar nge pine ni nge yag ngak, 11 ra reb e duw me pi’ Solomon ngak Hiram 100,000 e barril e wheat nge 110,000 e gallon e gapgep ko olive.

12 I SOMOL e tay u gil’ e n’en ni micheg nge pi’ e gonop ngak Solomon. Mi i par ni bfel’ thilin Hiram nge Solomon, miyow ngongliy e tha’ u thilrow.

13 Solomon ni Pilung e 30,000 e pumo’on u gubin ni turguyrad ko nam nu Israel ni ngar maruwelgad, 14 me tay Adoniram ni ir e ngi i guyrad. Me tayrad ni yad dalip ulung, nra reb e ulung ma 10,000 e girdi’ ni bay riy, ma ra reb e ulung me maruwel u Lebanon ni ta’reb e pul, ma l’agruw e pul ni ngar pired u taferad. 15 Ma ku 80,000 e girdi’ ni tayrad Solomon ngabang ni go’ burey ngu’ur puyed e malang, ma 70,000 e girdi’ ni nge gachowriy, 16 me tay 3,300 ni ngu u rogned rogon e maruwel. 17 Miyad puy e malang ni bfel’ ma ba ga’ yang ni nga ni fanay ko def ko tempel ni bod nike yog Solomon. 18 Girdi’en e maruwel rok Solomon nge Hiram, nge girdi’ ko binaw nu Byblos e ra ngongliyed rogon e malang nge ren ni ngan fanay ko tempel.