1 Girdi’ ko binaw nu Kiriath Jearim e ra feked fare Kahol ko M’ag rok SOMOL, miyad fek i yan ko naun rok Abinadab, ni bay u daken bochi burey. Miyad tabgulnag Eleazar nib mo’on ni fak ni ir e nge ayweg.

2 Fare Kahol ko M’ag rok SOMOL e par u Kiriath Jearim nib n’uw nap’an, ya gonap’an e reliw’ e duw. Re ngiyal’ i n’em e urngin piyu Israel ni ur yor niged e ayuw ngak SOMOL.

3 Me ga’ar Samuel ngak e girdi’ nu Israel, “Fa’an gimed ra sul ngak SOMOL u polo’ i lanin’med, ma thingar mu paged gubin e pi got rok yug boch e nam nge fapi liyos ni ya’an fare got ni Astarte fithingan. Mpi’ed gimed nib polo’ ngak SOMOL me par ni go ir e gimed be liyor ngak, ma aram e ra chuwegmed u tan pa’ e pi Filistine.” 4 Aram me n’ag piyu Israel e pi liyos ni bay rorad ni ya’an Baal nge Astarte, me par ni kemus ni go’ SOMOL e ur liyorgad ngak.

5 Ma aram me pining Samuel gubin piyu Israel ni ngar mu’ulunggad nga Mizpah, ni be ga’ar ngorad, “U rom e nggu meybil nagmed riy ngak SOMOL.” 6 Aram miyad mu’ulung nga Mizpah ni yad gubin. Miyad l’ing e ran ngar pu’oged nga but’ nib maligach ngak SOMOL, miyad pag e abich u lan e binem e rran ni polo’. Me lungurad, “Kad denengad nib togopluw ngak SOMOL.” U rom u Mizpah e aram e gin ni pithig Samuel e oloboch u puluwon e girdi’ nu Israel riy.

7 Ma fa’ani rung’ag e pi Filistine nike mu’ulung piyu Israel nga Mizpah, me yib fa lal i pilung rok e pi Filistine nge salthaw rorad ni ngar chamgad ngorad. Me rung’ag piyu Israel murung’agen me yib e marus ngorad, 8 me lungurad ngak Samuel, “Um par ni ga be meybil ngak SOMOL ni Got rodad nge ayuwegdad rok e pi Filistine.” 9 Me li’ Samuel ba pifak e saf me urfiy ni ga’ngin nge pi’ ni maligach ngak SOMOL. Me meybil ngak SOMOL ni nge ayuweg piyu Israel, me fulweg SOMOL taban e meybil rok. 10 Nap’an ni be pi’ Samuel fare maligach, ma ke chugur e pi Filistine ngak piyu Israel ni aram e ngar chamgad ngorad; ka chingiyal’ nem me non SOMOL u tharmiy nib togopluw ko pi Filistine ni bod e dirra’ ni be chub. Miyad balyang ngar milgad ni kar rusgad. 11 Me yan piyu Israel nga wuru’ yu Mizpah ngar lol’iged e pi Filistine ngar chugurgad nga Bethkar, ni yad be li’rad ngu’ur m’ad u kanawo’ i yan.

12 Me fek Samuel ba malang nge suweg u thilin yu Mizpah nge yu Shen, me ga’ar, “I SOMOL e ke ayuwegdad i yib ke mada’ ko chiney” — ma aram e tunguy fithingan ni “Malangen e Ayuw.” 13 Aram me waer e pi Filistine, me talegrad SOMOL ndakiyag ni ngarbad ni mael ko gin ntafen piyu Israel u n’umngin nap’an e yafos rok Samuel. 14 Urngin e pi binaw ni mus u Ekron nge mada’ nga Gath ni kol e pi Filistine e go’ sul ngak piyu Israel, aram me yan i par ni gubin yang e nam ni tafen piyu Israel nike sul ngorad. Miki gapas thilin yu Israel nge yu Kanaan.

15 I Samuel e i gagiyeg u Israel u n’umngin nap’an nib fos. 16 Gubin e duw nma yan u Bethel nga Gilgal nge nga Mizpah, ngi i pithig e yu pa’ i oloboch. 17 Me sul nga tafen ni bay u Ramah, ngki pithig e oloboch u rom. Me toy ba altar ni fan ngak SOMOL u Ramah.