1 Immoy be’ nib mo’on ko ganong rok Benjamin ni Kish fithingan, ni be’ nib yo’or ban’en rok, nib mo’on ni fak Abiel, nib mo’on ni fak Zeror, nib mo’on ni fak Bekorath, nib mo’on ni fak Afiah. 2 Ma bay ba pagel ni fak ni Saul fithingan, ni be’ nib picho’ay. Ma reb e de’ nib n’uw rok urngin e girdi’ nu Israel, ma ku er rogon ni ku ba picho’ay rorad.

3 Ma bay boch e gamanman ni dongki ni fak Kish ni karanod ngabang, me ga’ar ngak Saul, “Mfek reb e tapigpig nge un ngom ngam marow ngam gayew fapi dongki.” 4 Miyow yan ngabang i n’en u Efraim ni go’ burey ngu lan e nug nu Shalisha, machane dar piri’egew fapi dongki; aram mranow ngalan e nug nu Shaalim, ma dar piri’egew fapi dongki u rom. Miyow yan ko gin nib mil suwon ko Benjamin, machane ku dar piri’egew fapi dongki u rom. 5 Ma fa’an rabow ko nug nu Zuf, me ga’ar Saul ngak fare tapigpig rok, “Ngad sulow nga tabinaw, ya bay dabki leamnag e chitamag fapi dongki me par ni be magafan’ ngodow.”

6 Me ga’ar fare tapigpig, “Mu son! Bay be’ nib mo’on nib thothup ko re binaw ney ni ri ma tay e girdi’ fan, ya urngin ban’en ni yog e go’ yib i m’ug nib riyul’. Ngdarow da guyew, ya sana rayag ni yog ngodow e gin ni gadow ra pir’eg fapi dongki riy.”

7 Me fith Saul ni ga’ar, “Fa’an gadow rayan da guyew ma mang e gadow ra pi’ ngak? Ya dakuriy e ggan u lan e tutuw rodow, dariy ban’en rodow ni gadow ra pi’ ngak, fa bay?”

8 Me ga’ar fare tapigpig, “Bay bochi salpiy ni silber rog nrayag ni gu pi’ ngak, me yog ngodow e gin ni gadow ra pir’eg fapi dongki riy.”

9-11 Me fulweg Saul ni ga’ar, “Bfel’ e bin ni kam leamnag! Darow.” Miyow yan ko fare binaw nma par fare mo’on riy ni girdi’ rok Got. Ma nap’an ni yow be farthog i yan ngalang ko re binaw nem, miyow mada’nag bogi ppin ni karbad ni ngar linged e ran. Miyow fith fapi ppin ni lungurow, “Mogned, bay fa’anem nma guy ban’en u lan binaw?”

(Ya kakrom e fa’anra ba’adag be’ ni nge fith bbugithin ngak Got ma ra ga’ar, “Darod ngak fa’anem nma guy ban’en,” ya re ngiyal’ i n’em e ra bay be’ ni ba profet ma yima yog ni ir be’ nma guy ban’en.)

12 Me lungurad ngorow, “Bay, mu sapgow, ba’aram nga m’on romew. Mu gurgow; ya ka fini taw ngalan binaw e chiney, ya daba’ e ra pi’ e girdi’ ba maligach u daken e altar ni bay u daken e burey. 13 Yig gimew ra yan ngalan binaw mi gimew pir’eg ndawori yan nga daken e burey ni nge abich. Dabiyag ni nge abich e girdi’ ni fa’anra dawori taw ngaram, ya som’on e nge fal’eg wa’athan e re maligach nem; nge mu’ mfini abich e pi’in ni ka ni piningrad ni ngarbad. Marow nga talang e chiney, ma gimew ra mada’nag.”

14 Aram miyow yan ko fare binaw, ma nap’an nranow nga langgin mi yow guy Samuel nike yib ni aram e nge yan ko gin ba’aram ni nga ni meybil riy.

15 Ka reb e rran riy ndawori taw Saul, me ga’ar SOMOL ngak Samuel, 16 “Gonap’an e re ngiyal’ i n’ey gabul e bay gu pi’ be’ ko ganong rok Benjamin nge yib ngom; mu gapgepnag nge par ni ir e nge gagiyegnag piyu Israel ni girdi’ rog, ya ir e nge lagrad u pa’ e pi Filistine. Ya kug guy e gafgow ni be tay e girdi’ rog, ma kug rung’ag e myor ni man ayuw rorad ngog.”

17 Fa’ani guy Samuel Saul me ga’ar SOMOL ngak, “Irera’ fare mo’on ni gu weliy murung’agen ngom. Ir e bayi gagiyegnag e girdi’ rog.” 18 Me yan Saul ngak Samuel nga charen e garog me fith ngak ni ga’ar, “Mog ngog e gin nma par faanem riy nma guy ban’en.”

19 Me fulweg Samuel ngak ni ga’ar, “I gag e en nma guy ban’en. Mm’onow rog ko gin yima meybil riy. Ya gimew e ngam unew ngog e daba’ ko abich. Ma bayi gabul ni kadbul mu gu pi’ e fulweg ko tin ngam fithew ngog mi gimew yan. 20 Ma fapi dongki nike gaman dalip e rran ni karanod ngabang e dab mu rus nigew, ya kan piri’egrad. Machane mini’ e en nrib magan’ piyu Israel ngak? I gur — gur nge girdi’en e tabinaw rok e chitamam.”

21 Me ga’ar Saul, “I gag be’ ko ganong rok Benjamin ni fare ganong ni ir e th’abi achig u Israel, ma tabinaw rog e th’abi sobut’ ko biney e ganong. Ere mang ni ga be non ngog ni er rogon?”

22 Me pow’iy Samuel Saul nge fare tapigpig rok Saul ngalan ba singgil ni ba ga’ me yog bang ngorow ni bay nga taban e tebel u baley, ni aram e gin ngar pirew ngay, ma girdi’ nike yan e thin ngorad ni ngarbad e yad bay ko re tebel nem ni gonap’an e yad guyey u gubin. 23 Me ga’ar Samuel ngak fa’anem ni girdi’en e lum, “Mfek fare gi ufin i yib ni gu pi’ ngom mu gog ngom ni ngam fal ngabang.” 24 Me fek fare girdi’en e lum baraba’ i ay e gamanman nge bang e ufin nni mel’eg ni yagagen nge yib i tay nga m’on rok Saul. Me ga’ar Samuel, “Mu sap, be’er e gin ntay ni fan ngom; mu koy. Gu cha’riy ni ngam koy ko ngiyal’ney ni gadad e pi girdi’ ney ni kug piningrad.”

Aram me un Saul ngak Samuel ko abich e rofen nem. 25 N’apan nra chugad ko fa gin tagil’ e meybil ngranod ngalan binaw, mranod ra ngongliyed rogon e chob rok Saul nga daken e chigiy,*DAKEN E CHIGIY: Ngiyal’ nem e naun e ba taffayen daken e chigiy riy, ere ba ga’ nma mol e girdi’ u daken. 26 me mol u rom.

Be puf e woch me pining Samuel Saul ni bay u daken e chigiy ni be ga’ar, “Mu od, nga darow.” Me od Saul ngranow Samuel nga kanawo’. 27 Fa’anra tawgow nga taban fare binaw me ga’ar Samuel ngak Saul, “Mog ngak e re tapigpig nir nge m’on rodow.” Me m’on fare tapigpig me ga’ar Samuel, “Yugu mu son nggu weliy ngom e thin ni keyog Got.”