1 Medlip e duw rok Joash me mang pilung nu Judah, me gagiyeg u Jerusalem ni aningeg i ragag e duw. Fithingan e chitiningin e Zibiah ni be’ ko binaw nu Beersheba. 2 I rin’ e tin nib m’agan’ SOMOL ngay u n’umngin nap’an ni i par Jehoyada ni prist nib fos. 3 Me mel’eg Jehoyada l’agruw e ppin ngar figirngiyew Joash ni Pilung miyow diyennag e pumo’on nge ppin ni pifak.

4 Me n’uw bochu’uw nap’an nike pilung Joash me turguy u wan’ ni ngan ngongliy e yungin ke kireb ko fare Tempel. 5 Me yog ngak e prist nge pi Levite ni ngranod ngak e girdi’ ko pi binaw nu Judah ngar kunuyed e salpiy nib gaman fare maruwel riy ni yu duw ni yima fal’eg e yungin nike kireb ko fare Tempel. I yog ngorad ni ngar papey gad machane me sowath fa pi Levite, 6 ma aram me pining Jehoyada ni ir e be gagiyeg nagrad ni nge yib i guy, me non ngak nib gel e thin rok ni ga’ar, “Mangfan ndamur guy rogon ni nge kunuy e pi Levite e tax rok yu Judah ngu Jerusalem ni yog Moses, ni fare tapigpig rok SOMOL ni ban’en nthingari pi’ e girdi’ ni ngan ayuweg i pi’ pulwon e tin ngan pi’ pulwon ko fare Tent u p’eowchen SOMOL?”

( 7 Pi gachalpen Athaliah ni fare pin nib kireb e ka ra kireb niged fare Tempel, ma kar fanayed boch e pin’en riy nib thothup ni ngu’ur tedfan Baal ngay.)

8 Me yog fare pilung ngak yu Levi ni ngar ngongliyed ba kahol ni ngu’un nin’ e salpiy ngay ngar ted nga langan e garog ko fare Tempel. 9 Miyad garareg e thin u daken yu Jerusalem ngu Judah ni nge gubin e girdi’ miyad fek i yib ngak SOMOL fare tax ni Moses ni fare tapigpig rok Got e som’on ni kunuy rok e girdi’ u daken ted ni desert. 10 Ren’ey e bfel’ u wan’ e girdi’ nge pi tayugang’ rorad, miyad fek e salpiy rorad ni tax i yib ngar suguyed fare kahol ngay. 11 Gubin e rran mma fek e pi Levite fare kahol i yan ngak fare tolang u tan pa’ e en pilung nib milfan fare kahol ngak. Ma yug nap’an nrasug ma fare tayol rok e en pilung nge en ni owchen fare Prist ni Th’abi Ga’ e yad ra fek fapi salpiy u lan fare kahol nga but’ miyad fulweg fare kahol nga tagil’. Ma bo’or e salpiy nra kunuyed.

12 Fare pilung nge Jehoyada e ra pi’ew fare salpiy ngak e pi’in nib milfan ngorad e yungin ngan ngongliy bayay ko fare Tempel, miyad pi’ pulwon e girdi’ ni manang rogon i ubung e malang, nge pi salap ko dumow naun, nge pi’in ba salap i ngongliy ban’en ko wasey ni ngar ngongliyed bayay e yungin ke kireb ko fare Tempel. 13 Urngin fa pi girdi’en e maruwel nra maruwelgad nib gel, miyad fulweg fare Tempel nga rogon ni immoy nsom’on nike gel bayay. 14 Nap’an nmu’ i ngongliy e yungin ke kireb, ma tin ni aw e gol nge silber e ni pi’ ngak fare pilung nge Jehoyada, min ngongliy yochi dabiy riy nge ku boch ban’en ni mam’en fare Tempel.

N’umngin nap’an nib fos Jehoyada, ma un pi’ e maligach u Tempel ni gubin ngiyal’. 15 Nap’an ni gaman e ra’ay nge guyey e duw rok Jehoyada ni kari pilbithir me yim’. 16 Mi ni k’eyag ngalan fapi low ko yam’ rok e pilung u lan e Binaw rok David ni bochan bugwan ko pigpig ni i tay ko girdi’ nu Israel, nge Got, nge fare Tempel.

17 Machane yug nap’an ni yim’ Jehoyada me gelfen e pi tayugang’ nu Judah ngak Joash ni Pilung ni yad e ngi i motoyil ngorad. 18 Ma aram me tal e girdi’ nda ku rir liyorgad ngak SOMOL u lan e Tempel rok, ni ir e Got rok e pi chitamngirad, miyad tabab i tayfan e pi liyos nge ya’an fare got ni bpin i Ashera. Pi denen ney e ir e bucheg e rorad me girengiy e damumuw rok SOMOL nga daken yu Judah nge yu Jerusalem. 19 Me pi’ SOMOL e pi profet ni nge yib i ginangrad ni ngar sulod ngak, machane daburad ni ngar motoyilgad. 20 Ma aram me yib e Kan Nthothup rok Got nga daken Zekariah nib mo’on ni fak Jehoyada ni prist. Me sak’iy ko gin nra guy e girdi’ riy me non nib ga’ laman ni ga’ar, “Be fithmed SOMOL ni Got ko mangfan nda kumur folgad ko tin ke ta’chiylen ma gimed be girengiy e gafgow nga dakenmed! Ka mu paged, ere ke pagmed!” 21 Me un Joash ni Pilung ngab makath nib togopluw ngak Zekariah, me malangnag e girdi’ i Zekariah u lan fare yoror ko Tempel ni bochan e keyog e en pilung ni ngan rin’. 22 Ma ke pag fare pilung talin ni Jehoyada ni chitamngin Zekariah e i pigpig ngak nrib yul’yul’, me yog ni ngan li’ Zekariah nge yim’. Ma nap’an ni be yan ni nge yim’ Zekariah me tolul ni be ga’ar, “Mang e guy SOMOL e tin ni ga be rin’ nge gechig nigem!”

23 Tungun e re duw nem, me yib fa raba’ i salthaw nu Syria nicham nga Judah ngu Jerusalem, ngar li’ed urngin e tayugang’, miyad fek e chugom ni yo’or u tan e mael ngar suled nga Damaskus. 24 Fa raba’ i salthaw nu Syria e ba’achig, machane me gel nagrad SOMOL ko fare raba’ i salthaw nu Judah nib ga’ ni bochan e fapi girdi’ e ka ra digeyed fare SOMOL ni Got ko pi chitamngirad. Irera’ rogon nni gechignag Joash ni Pilung. 25 I maad’ad Joash nib ubchiya’, ma nap’an ni yan fapi to’ogor me makath l’agruw e tolang rok nib togopluw ngak ngar li’ew nge yim’ u daken e chob rok ni bochan e ngar fulwegew pulwon ngak e pogofan rok fare mo’on ni fak Jehoyada ni prist ni yog ngan li’ nge yim’. Mi ni k’eyag Joash u lan fare Binaw rok David, machane dan k’eyag ngalan fapi low ko yam’ rok e pilung. ( 26 Fa gali cha’ nra makathgow nib togopluw ngak Joash e Zabad nib mo’on ni fak be’ ni bpin nu Ammon ni Shimeath fithingan, nge Jehozabad nib mo’on ni fak be’ nib bpin nu Moab ni Shimrith fithingan.) 27 Pin’en nnog ko babyor ko pilung e bay yatan e pi pagel ni fak Joash riy, nge pi yi’iy ni u nog nib togopluw ngak, nge babyoren rogon fare Tempel ni toy bayay. Amaziah nib mo’on ni fak e yan nga luwan nge mang pilung.