1 Nga tomuren nike m’ay fare madnom ma gubin e girdi’ nu Israel nranod ngalan gubin e pi binaw nu Judah ngar bilged e yu raba’ i malang, miyad th’ab nga but’ e pi pow rok Ashera ni fare got ni bpin, miyad gathay e pi altar nge yungin tagil’ e tayfan rok e pi’in ndar nanged Got. Ma ku aram e n’en ni rrin’ed u daken yu Judah ni ga’ngin, nge fa yuyangi nug rok Benjamin, Efraim, nge Manasseh; ma aram miyad sul ni yad gubin nga taferad. 2 Miki ngongliy bayay Hezekiah ni Pilung fare ulung rok e prist nge pi Levite, nu lan e re ulung nem e ra be’ ma bay e maruwel rok ni kanduwgiliy. Pi maruwel ney e bmu’un ngay e maligach ni mo’oruf nge maligach nma gapaseg thilin Got nge girdi’, nge liyor u lan fare Tempel, nge sorok nge magaer ni yad be pining e gubin yang ko fare Tempel. 3 Mu fithik’ e yu ran’ i gamanman rok ni saf nge garbaw e i fek e en pilung e pi gamanman riy ni fan ko maligach ni mo’oruf ni gubin e kadbul nge blayal’, nge tin yima pi’ ko rofen ni Sabbath, nge tin yima pi’ ko fare Madnom ko M’ug e Pul, nge tin kabay e madnom ni kandugliy u lan e motochiyel rok SOMOL.

4 Miki yog fare pilung ngak e girdi’ nu Jerusalem ni ngar feked i yib e maligach ni bay mat’wun e prist nge pi Levite ngay ni ngan pi’ ngorad, ya nge puf puluworad nge yag nra rin’ed e tin nthingar rrin’ed nike yog e Motochiyel rok SOMOL. 5 Yug nap’an ni yog fare pilung e ren’ey, me fek e girdi’ nu Israel e pi tow’ath rorad i yib ni tin th’abi fel’ e grain, nge wayin, nge gapgep ni olive, nge honey, *HONEY: gan e ngul ni athib ko floras nma kunuy. nge ku boch ban’en ni wom’ngin e woldug, mu ku ra feked i yib ragag e pasent u gubin e tin ni bay rorad. 6 Gubin e pi girdi’ ni yad ma par u lan fapi binaw nu Judah nra feked e ragag e pasent u gubin e garbaw nge saf rorad, mu ku yad fek i yib e tow’ath ni bo’or ngar pi’ed ngak SOMOL ni Got rorad. 7 Bin dalip e pul e ni tabab i ulnguy e pi tow’ath nem, nge yan i taw ko bin medlip e pul mi ni tal i pi’. 8 Nap’an ni guy Hezekiah ni Pilung nge pi tolang ko salthaw rok urngin e pin’en ni kani pi’, miyad pining e sorok ngak SOMOL nge girdi’ rok ni piyu Israel. 9 Me non fare pilung ngak e prist nge pi Levite u murung’agen fapi tow’ath, 10 ma ba’aray e n’en ni yog Azariah ni Prist ni Th’abi Ga’ ni be’ ni owchen Zadok ngak fare pilung, “Nap’an ni tabab e girdi’ i fek e pi tow’ath rorad i yib ngalan fare Tempel, ma gubin ngiyal’ nib gaman e n’en ni ngad ked ma ku bo’or e tin ni aw. Bay e pin’ey ni gubin rodad ni bochan e ke fal’eg Somol wa’athan e girdi’ rok.”

11 Me yog fare pilung ni ngan toy e senggil ni yima cha’ar ngay u lan fare Tempel 12 mi ni tay gubin e pi tow’ath nge pi ragag e pasent nga langgin ngan cha’riy ni dabi buch ban’en riy. Ma be’ ni Konaniah fithingan ni reb e Levite e ra ted ni nge mang ga’ riy me Shimei nib mo’on ni walagen e ta’ayuw rok. 13 Ragag e pi Levite e ni tayrad ni ngu’ur maruwel gad u tan pa’row: Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath, nge Benayah. Picha’ ney e Hezekiah ni Pilung nge Azariah ni Prist ni Th’abi Ga’ e ra mel’egewrad. 14 Kore nib mo’on ni fak Imnah ni reb e girdi’ nib Levite ni ir e ba tolang ko pi tamatnag ko fare Garog ni Ngek ko fare Tempel, ma ku ir e ba milfan ngak e pi tow’ath ni yibe pi’ ngak SOMOL nge tin nge wereg ko pi prist nge pi Levite. 15 Mu lan e tin kabay e binaw nma par e prist riy e ba’aray e pi’in ni Levite ni yad ba yul’yul’ i ayuweg ko re gaf i maruwel ney: Eden, Miniamin, Jeshua, Shemayah, Amariah, nge Shekaniah. Yad ma f’oth e ggan ni ta’reb rogon i yan rok pi walagrad ni ku boch e Levite nrogon ko miti maruwel rorad, 16 ma gathi rogon e re ke girdi’ ni yad bay riy. Yad ma pi’ e f’oth rok gubin e pumo’on ni guyey e duw yangren ngalang ni bay e maruwel rorad ni gubin e rran u lan fare Tempel nrogon e pi liw ni yad bay riy. 17 Fapi prist e ni pi’ e maruwel rorad ni nrogon e re ke girdi’ ni yad bay riy, ma pi Levite nike gaman e rliw’ e duw yangarrad ngalang e ni fal’eg e ulung rorad mi ni pi’ e maruwel ngorad. 18 Yad gubin nni yoloy fithingrad nga babyor nib mu’un e pi le’engirad ngay nge pifakrad, nge gubin e pi’in nma par u tan pa’rad, ni bochan e rib duwgil ni urngin ngiyal’ ma bfel’ rogorad ni ngar ngongliyed e maruwel rorad nib thothup. 19 Ma immoy e pi pumo’on u fithik’ e prist ni ur pired u lan e binaw nni pi’ ngak e pi’in owchen Aron nge yungi flang ni tagil’ e chugol gamanman ni ka yuyang ko pi binaw ney, pi pumo’on ney e yad ma fek e f’oth ni ggan ngu’ur pi’ed ngak gubin e pumo’on ni bay ko tabnaw ko prist nge ngak gubin e pi’in bay fithingrad u babyoren e yuke girdi’ ko genong ni Levi.

20 Me rin’ Hezekiah ni Pilung e tin nib mat’aw ma bm’agan’ SOMOL ni Got rok ngay u daken yu Judah ni ga’ngin. 21 I fel’ rogon gubin ban’en u pulwon ni bochan gubin e tin i rin’ ni fan ko fare Tempel nge rogon ni i tiyan’ ko motochiyel, i rin’ ni bay laniyan’ riy, ma rib yul’yul’ ngay ma kari pi’ ir ni polo’ ngak e Got rok.