1 Me yib urngin e pi ganong nu Israel ngak David u Hebron me lungurad ngak, “Gamad e girdi’ ko nam rom. 2 Kakrom nnap’an ni Saul e pilung rodad, me gur e um tay murung’agen e salthaw nu Israel ko mael me yog SOMOL ngom ni bay um pow’iy e girdi’ rok me mang gur e um gagiyeg nagrad.” 3 Ma aram me yib urngin e pi’in yad be yog e thin rok piyu Israel ngak David nga Hebron. Me ngongliy ba m’ag u thilrad, ni ngongliy u p’eowchen Got, miyad liyef e gapgip nga lolugen ni aram e kar turguyed ni ir e ke mang pilung nu Israel. 4 Guyey e duw yangren David me mang pilung, me par ni ir e be gagiyeg ni aningeg i ragag e duw.1 Kro 3:4 5 I par u Hebron ngi i gagiyegnag yu Judah ni medlip nge baley e duw, me par u Jerusalem ngi i gagiyegnag yu Israel ni ga’ngin nge yu Judah ni guyey nge dalip e duw.

6 David ni Pilung nge girdi’ rok e ranod ngar maelgad ngak yu Jerusalem. Ma pi Jebus, ni aram e girdi’ ni be par u rom, e ra leam niged ndabiyag rok David ni nge kol e re binaw nem, ma aram me lungurad ngak, “Dabiyag ni nga mub ngalan e re binaw ney; pi’in ni malmit nge pi’in ni mugutgut e rayag rorad ni ngar ted gur ndabiyag ni nga mub ngalan.1 Kro 11:4–9 7 (Machane me kol David fa gin’em ni ka ni yororiy u Zion ni fan ko mael, ma aram mu u nog fithingan ni “Binaw rok David.”)

8 Rofen nem e ga’ar David ngak e girdi’ rok, “Gur bay be’ u roy ni fanenikan e pi Jebus ney ni bod rogog? Nikam taw ngabang nrayag ningam thang e pogofan rorad? Ra bay me yan u wol’ e ran ngalang nge og ngak e pi malmit nge pi mugutgut nem ni gafgow.” (Aram tapgin me lunguy, “Pi’in ni malmit nge pi’in ni mugutgut e dabiyag ni ngranod ngalan e naun rok SOMOL.”)

9 Me par David u lan fa gin’en nni yororiy ni fan ko mael me tunguy fithingan ni Binaw rok David. Me longobiy ko yoror ni fan ko mael, ni mus ko yoror nu Millo nge yib i mada’ ko gin ni bay tafen e pilung riy. 10 Mi i gel i yan, ya SOMOL ni Gubin ma Rayag Rok e bay rok.

11 Hiram ni Pilung nu Tyre e l’oeg e pi tamal’og ngak David; me pi’ yuley i ren ngak David ni cedar fithingan, nge girdi’en e dimow naun, nge pi’in yad manang rogon i ubung e malang ni yima fanay ko naun ni ngar toyed ba tafen e pilung ngak David. 12 Ma aram me nang David u wan’ ni SOMOL e ke turguy ni nge mang pilung nu Israel, ma be gagiyegnag e nam rok David ngi i fel’ rogon ni fan ngak e girdi’ rok Got ni bay riy.

13 Nap’an ni chuw David u Hebron nge yan i par nga Jerusalem, me kunuy yugu boch e ppin nu Jerusalem ni nge par bochi yad ni ngar manged ppin rok, ma boch i yad e ngar pired ni le’engin, mu kun diyennag boch e pagel nge ppin ni fak. 14 Bitir nni gargeleg ni fak u Jerusalem e Shammua, nge Shobab, nge Nathan, nge Solomon, 15 nge Ibhar, nge Elishua, nge Nefeg, nge Jafia, 16 nge Elishama, nge Eliada, nge Elifelet.

17 Me rung’ag e pi Filistine ni David e ke mang pilung nu Israel; miyad yan ni yad gubin ni ngar koled. Fa’ani rung’ag David, me yan nga p’ening ko fare yoror ni ka ni ngongliy ni fan ko mael. 18 Me yib e pi Filistine ko loway nu Refaim ngarbad ra pired ngay. 19 Me fith David ngak SOMOL ni ga’ar, “Bfel’ u wun’um ni gu ra yan gu cham ngak e pi Filistine? Mog, ga ra gagiyegnag ngug gel?”

Me ga’ar SOMOL ngak, “Mman, ya bay gu gagiyegnag ngam gel.”

20 Ma aram me yan David nga Baal Perazim, miyad mael e pi Filistine me gel ngorad u rom. Me ga’ar David, “I SOMOL e ke aw ngak e pi to’ogor rog ke weregrad ni bod ba lul’ ni ba ga’ ni sugubur nge yib e ran riy nga daken e binaw.” Ma aram min tunguy fithingan e gin’em ni yu Baal Perazim.*BAAL PERAZIM: Re ngachal ney e fan e “Somol ni thumur riy nga barba’.” 21 Pi Filistine e ra n’aged e pi liyos rorad u rom, me fek David nge salthaw rok fapi liyos ngranod.

22 Me yib e pi Filistine ra pired bayay ngalan fare loway nu Refaim. 23 Miki fith David SOMOL bayay, me fulweg SOMOL ngak ni ga’ar, “Dab mman u roy ngam cham ngorad, machane ngam liyeg ngam man mu og ngorad u keru’rad, ko fa gin nib chugur ko fa yu ke gek’iy ni balsam. 24 Nap’an ni ga ra rung’ag lingan ban’en ni bod lingan ay e salthaw ni be yib u fithik’ i ran’ e gek’iy u lang, ma ga fal’eg rogom ni ngam og ngorad, ya aram e kug m’on rom kug wan ni ngug gagiyegnag e pi salthaw rok e pi Filistine ngar waergad.” 25 Me rin’ David e tin keyog SOMOL, me tuluf e pi Filistine u Geba ngranod ngar mada’gad nga Gezer.