3
Gimed e girdi’ nu Israel, mu telmed ko pi thin ni ba’aray nike weliy SOMOL ni murung’agmed, gimed fare nam ni ga’ngin ni fek nga wuru’ yu Egypt: “U fithik’ gubin e nam nu fayleng ma kemus ni gimed e gu ma nangmed ma gimed ba t’uf rog. Aram e n’en nike ubchiya’ nag e tiromed e denen, aramfan ni dabisiy nthingar ggechig nagmed.”
Maruwel rok ba profet
Rayag ni milekag l’agruw ni’ u ta’bang ndar weliyew ni ngar mada’ gow?
Gur rayag ni nge tolul ba layon u magerger ni ba ga’ laman ni fa’anra dawori pir’eg ba gamanman ni nge og ngak?
Gur rayag ngi i tolul ba layon ni kab bitir u lan tafen ni fa’anra dawori kol ban’en?
Gur rayag ni nge aw ba arche’ ko wup ni fa’anra dariy e wal riy?
Gur rayag ni nge pangthal ba wup ni fa’anra dawor i bit ban’en ngay?
Gur rayag ni yan lingan e yabul ko mael u lan binaw ni dabi rus e girdi’?
Gur rayag ni nge aw e riya’ ngab binaw ni gathi SOMOL e pag nge yib?
I SOMOL ni Th’abi Tolang e dariy ban’en nma rin’ nder ma dag ngak e pi profet, ni aram e pi tapigpig rok.
Nap’an nra tolul ba layon, me mini’ e ra par ndabi rus?
Ma nap’an nra welthin SOMOL ni Th’abi Tolang, me mini’ e rayag rok ni nge par ndabi weliy e thin rok?
Gafgow ni aw nga Samaria
Nge lungumed ngak e pi’in yad be par u lan e pi tafen e pilung u Ashdod ngu Egypt: “Mmu’ulung gad ko pi burey nu Samaria ngam guyed gelngin e wagagey u rom ko kireb ni yibe ngongliy u lan binaw.”
10 Be ga’ar SOMOL, “Pi girdi’ ney e yad be suguy e pi naun rorad ni gagang’ ko chugum nra feked u fithik’ e kireb nge yargal. Dar nanged rogon ni ngar yul’yul’gad. 11 Ere bay yib e to’ogor rorad nga ron’ed e nam rorad nga longob, miyad kirebnag e pin’en ni kar ngongliyed ni nge ayuwegrad ko mael, miyad fek e chugum u lan fapi naun rorad ni gagang’.”
12 Be ga’ar SOMOL, “Rogon ba layon ni be longuy ba saf me yib be’ nma gafaliy e saf i laeg rok l’agruw raba’ i ay fare saf ara ta’ab raba’ i yuwan tel, e aram rogon ni bayi ayuweg Got piyu Israel ni be par u Samaria — rib lich i yad e bayi fos. Ma chiney e yad ba thig u daken e pi couch ni tolang puluwon.” 13 Be ga’ar SOMOL ni Th’abi Tolang ma Gubin ma Rayag Rok, “Mu telmed e chiney, ngam ginanged e pi’in ni owchen Jakob. 14 Chirofen ni gu ra gechignag e pi girdi’ nem nu Israel ni bochan e denen rorad, e bay gu kirebnag fapi altar rok Bethel. Fapi gagey ko tabthung ko pi altar nem e bay nt’ar nge puth nga but’. 15 Bay gu kirebnag e pi naun ni yima par riy u ngilan’ e garbeb nge pi naun u ngilan’ e gowel. Pi naun ni kan nunuw nag ko nguwelen e elefent e bayi muchbu’ nga but’ nike kireb, ma urngin e pi naun ni ba ga’ e bay ni kirebnag.”