9
Pi Jew nra thirifed e pi to’ogor rorad u but’
Me taw ko rran ni ragag nge dalip ko pul ni Adar, ni aram fare rran ni ngan maruwel ko fare thin nike yog fare pilung, ma ku rofen ni be athpeg e pi to’ogor rok e pi Jew ni ngar gafgow niged e Jew. Machane gathi aram rogon ni aw ya pi Jew e ra gelgad. Gubin e binaw ni bay e Jew riy u lan gil’ilungun fare pilung, ma go’ ka ra fal’eged rogorad ni ngar chamgad ngak e en nge yib ni cham ngorad. Girdi’ u gubin yang e go’ rrusgad ngorad, dariy be’ ni yag ni nge togopluw ngorad. Gubin e pi tolang nu lan e yungi nug i yan, nge pi governor, nge pi tayugang’ ko am, nge pi’in owchen e en pilung e go’ ra ayuweged e pi Jew nem, ni bochan e go’ yad be tamdag ngak Mordekai. Go’ nnang u lan gil’ilngun fare pilung ni ngiyal’nem e ke ga’ lungun Mordekai u lan tafen e pilung ma ka be ga’ lungun i yan. Ere pi Jew e yag ni ngar rin’ed e tin yad ba’adag ngak e pi to’ogor rorad. Ra chamgad ko saydon ngar li’edyad ngarm’ad.
Go’ lan yu Susa ni aram fare binaw ntochuch ma 500 e girdi’ ni thang e pi Jew e pogofan rorad. 7-10 U fithik’ fapi girdi’ ni ka ni thang e pogofan rorad e bay ragag e pagel riy ni fak Haman nib mo’on ni fak Hammedatha, ni to’ogor rok e Jew: Parshandatha, Dalfon, Aspatha, Poratha, Adalia, Aridatha, Parmashta, Arisai, Aridai, nge Vaizatha. Machane yug aram rogon ma dar feked ban’en.
11 Ka rofen nem minog ngak fare pilung urngin e girdi’ ni ka ni li’rad u lan yu Susa. 12 Ma aram me ga’ar fare pilung ngak Ester ni Queen, “Go’ lan yu Susa ma 500 e girdi’ nike thang e pi Jew e pogofan rorad riy, nib mu’un fa ragag’ i pumo’on ni fak Haman ngay. Ere bu uw rogon e tin kar rin’ed u lan e yungi nug i yan! Ku mang e ga ba’adag e chiney? Nge yag ngom. Mog ngog komang e kag ba’adag, mu gu pi’ ngom.”
13 Me fulweg Esther ni ga’ar, “Fa’anra ba m’agan’um ngay i gur pilung me gabul ma ga pag e pi Jew ni yad bay u lan yu Susa ngku rin’ed bayay e tin ni mu pagrad ngar rin’ed e daba’. Min tining e ldow rok fa ragag i pumo’on ni fak Haman u tagil’ e mo’ochol ngalang.” 14 Me yog fare pilung ni ngan rin’ e ran’ey, mi ni wereg e thin riy u lan yu Susa. Mi ni tining e ldow ko fa ragag i pumo’on ni fak Haman ngalang. 15 Rofen ni ragag nge aningeg ko pul ni Adar miki yib e pi Jew ni yad bay u Susa nga ta’bang ngkur thanged e pogofan rok 300 e girdi’ nu lan fare binaw. Machane ku der feked ban’en rorad.
16 Ma ku errogon e pi Jew ni yad bay u lan e yungi nug i yan, ya go’ ra yu ulunggad ngar ayuweged yad rok e pi to’ogor. Miyed thang e fan rok 75,000 e to’ogor rorad. Machane ku der feked ban’en. 17 Ren’ey e ni rin’ ko ragag nge dalip fane pul ni Adar, nge rofen ni ragag nge aningeg fane pul mar toffangad, miyad tay e binem e rran ni ngu’ur murgad ma yad be felfelan’. 18 Machane pi Jew nu Susa e yad ma yib nga ta’bang e rofen ragag nge dalip nge ragag nge aningeg fane pul, miyad toffan ko rofen ni ragag nge lal, miyad tay e re rran nem ni ngar murgad miyad be felfelan’. 19 Irera’ fan ni pi Jew ni yad ma par u lan yuchi binaw nib achig e yad ma tay e rofen ni ragag nge aningeg e rran ko pul ni Adar ni yaran e falfelan’, nge mur, ma yad be thilyeg e tow’ath rorad ni ggan.
Fare madnon ni Purim
20 Me tay Mordekai e pin’ey nga babyor nge pi’ babyoren nge yan ngak gubin e pi Jew ni tin nib chugur nge tin nib palog ni yad ma par ko fare nam nu Persia, 21 ni be yog ngorad ni ngu’ur madnom niged e rofen ni ragag nge aningeg fane pul nge rofen ni ragag nge lal fane pul ko pul ni Adar ni gubin e duw. 22 Irera’ e pi rran ni thang pi Jew owchen e pi to’ogor rorad; irera’ e re pul ni meyor nge marus ni un tay e thil nge yib e felfelan’ nge fel’ laniyan’ nga luwan. Minog ngorad ni ngu’ur madnom niged e gali rran ney ni yad be mur u fithik’ e felfelan’, ma yad be pi’ rorad e ggan ni tow’ath ma ngkur pi’ed boch ko pi’in gafgow. 23 Ma aram me fol e pi Jew ko tin keyog Mordekai ni ngar rin’ed, me par fare madnom nib yalen ni yima rin’ ni gubin e duw.
24 I Haman nib mo’on ni fak Hammedatha, ni reb i owchen Agag ma ir e to’ogor ko Jew, ir e girengiy e pow (“purim,” ni yad ma yog) ni nge duwgiliy e rofen ni ngan thang mit e pi Jew; i turguy ni nge thirifrad u but’. 25 Machane yan Ester ngak e en pilung, me yoloy fare pilung e tin ngan rin’ ni Haman e nge aw fare gafow ngak ni tanomnag ni nge aw ko pi Jew, ir nge pifak ni pumo’on e ni uchliyrad ko fare tafen e mo’ochol 26 Ireram fan ni fa gali rran ni yaran e madnom e Purim fithingan, bochan e tin nni yoloy ngalan e re gi babyor ney, e aram e n’en nra machda’ niged, ma aram e n’en ni aw ngorad, 27 me tay e pi Jew nib motochiyel rorad nge pi’in owcherad, nge pi’in ra pachegedyad ko Jew, ni gubin e duw ko gali rran nem, ma yira madnom nrogon nike yog Mordekai ni ngu’un rin’. 28 Mi ni duwgiliy ni gubin e pi tabnaw rok e pi Jew u gubin e nam nge gubin e mfen i yan nga m’on e dab ra paged talin ni ngu’ur madnom niged fa gali rran ni Purim ni dariy n’umngin nap’an. 29 Ere Ester ni Queen, ni be’ ni bpin ni fak Abihail, e cheag ngak Mordekai, ngkura yoloyew bang e babyor ni murung’agen e Purim ni yow be ta’chiylen e madnom ni Purim. 30 Re gi babyor ney e ni yoloy ni nge yan ngak gubin e Jew, min pi’ yuyang nge yan ko fa 127 yang i nug ko nam nu Persia. Ni be athapeg e gapas nge fel’rogon nga daken e pi Jew, 31 ma be pow’iyrad nge pifakrad ni ngu’ur madnom niged e Purim u ngilan’, ni bod rogon fapi yalen nra tayew ngal’an ma ngan pag e abich ma nge kirban’uy. Re thin ney e yog Mordekai nge Ester ni Queen ni dabisiy ni ngan rin’. 32 Ester e ta’chiylen ngari micheg e pi yalen nem ni Purim, ni ngan yoloy nga lane babyor ko nam.