1 Me ga’ar SOMOL ngak Moses, “Mu chuw u roy ngam man, me un fapi girdi’ ngom ni gur e mu fekrad nga wuru’ yu Egypt, ngam marod ko fare nam ni gu micheg ni gu ra pi’ ngak Abraham, Isak, nge Jakob nge pi’in owcharad. 2 Ma bay gu l’oeg ba engel ngi i m’on romed; ma bay gu tuluf e girdi’ ni Kanaan, nge piyu Hitt, nge piyu Amor, nge piyu Hiv nge piyu Jebus ngar chuwgad. 3 Ngam marod nga ba nam ni pire’ ban’en riy ma ba yong’ol e but’ riy. Machane gathi bay gu un ngomed, ya gimed girdi’en ba nam ni gimed ba gelan’, ma richey mu gu li’med u kanawo’ ngam m’ad.”

4 Ma fa’ani rung’ag e girdi’ nu Israel ni dabi un Got ngorad, miyad tabab ko meyor, ma dakuriy be’ ni tay e nunuw rok nga downgin. 5 Me yog SOMOL ngak Moses ni nge yog ngak fapi girdi’ ni nge ga’ar, “Gimed bogi girdi’ nib gelan’. Fa’an gu ra un ngomed ma dabi n’uw nap’an mu gu thang owchamed. Ere mu lufed e nunuw romed, mu gu leamnag ko mang e nggu rin’ ngomed.” 6 Ma aram me chuw piyu Israel ko burey nu Sinai nikuyima yog ni burey ni Horeb ngranod, ndakuriy bagayad ni tay e nunuw rok nga downgin.

7 Yungin ma par piyu Israel riy i yan, e ma fek Moses fare Tent nib thothup nga palog ko gin ni yad bay riy nge n’uf ngalang. Fithingan ni yima yog e Tent u p’eowchen SOMOL, mra ba’adag be’ ni nge fith ban’en ngak SOMOL me yan ngay. 8 Ma ngiyal’ nra yan Moses ko re Tent nem, ma gubin e girdi’ ni ngar sak’iygad, nge be’ me sak’iy nga langan e mab ko birok e tent nge yaliy Moses nge mada’ ko ngiyal’ nike yan i chuw nga langgin. 9 Ma nap’an nra yan Moses nga langgin, me yib fare gi manileng nib k’iy ngalang nge yib i rumog nga langan e mab ko fare Tent, me non SOMOL u fithik’ e gi manileng nem ngak Moses. 10 Ma nap’an nra guy urngin e girdi’ fare gi manileng nib k’iy ngalang u rom u langan e mab ko fare Tent, miyad sak’iy ngalang ngar siro’gad nra be’ ma kabay u langan e mab ko birok e tent. 11 Ma par Moses u p’eowchen SOMOL, ma yow ma welthin SOMOL ni bod rogon ruw i fager. Ma nap’an nra sul Moses ko gin bay yu Israel riy. Ma fa’anem ni kab pagel ni ta’yuw rok Moses, ni aram Joshua nib mo’on ni fak Nun, e nge par u lan fare Tent.

12 I ga’ar Moses ngak SOMOL, “Riyul’ ni kamog ngog ni ngug gafaliy e girdi’ nu Israel ko fare nam, machane da mog ngog e en ni bay mpi’ nge un ngog. Kamog ni ga manangeg ni bfel’ rogon ma gub fel’ u wun’um. 13 Fa’anra aram rogon, me ere mog ngog e tin ka mu tanomnag, nge yag ni ug fol rom ngki i par ni gub fel’ u wun’um. Dab mu pag talin ni gur e ka mu mel’eg e re nam ney ni nge milfan ngom.” 14 Me ga’ar SOMOL, “Mman ni gu bay rom, ma bay gu pi’ e toffan ngom.”

15 Me ga’ar Moses ngak, “Fa’anra dab mu un ngomad ma ngam guy rogon nge dab gu chuwgad u roy. 16 Ra di’in me nang be’ ni bfel’ u wun’um e girdi’ rom nge gag ni fa’anra dab mu un ngomad ngdarod? Ra gabay romad mra gagyelnag ni gamad ba thil ko girdi’ nu fayleng.”

17 Me ga’ar SOMOL ngak Moses, “Bay gu rin’ ni bod ni kamog, ya gu manangem ni bfel’ rogon ma gab fel’ u wun’ug.”

18 Me ga’ar Moses, “Wenig ngom, mu pageg ngguy ram’en e muluplup rom ko gin ga bay riy.”

19 Me fulweg SOMOL ni ga’ar, “Bay gu gagiyegnag nge yib gubin rama’eg ni bfel’ i th’ab p’eowchem, ma bay gog fithingag nib thothup. I Gag fare SOMOL, bay i kireban’ug mug runguy e en ni gu ba’adag ni nggu runguy me kireban’ug ngak. Rom 9:15 20 Dab gu pag ngam guy owcheg, ya en nra guy owcheg e ra yim’, 21 machane ba’aray bang u to’obeg nrayag ni ngam sak’iy riy u daken ba war. 22 Ma nap’an nra yib ram’eg nib muluplup ni nge yan u charem, mu gu tem ngalan magufen e war, mu gu upunguy pa’ag ngom nge mada’ ko ngiyal’ ni kug thumur u charem. 23 Ma aram e bay gu chuweg pa’ag, ma bay mu guy keru’ug ma dab mu guy owcheg.”