1 Kan nthothup rok Got e chibiyeg nge fekeg nga ba’ ni ngek e garog ko Tempel. Nu rom u charen e garog e gguy rliw’ nge lal e pumo’on riy, ni bay Jaazaniah nib mo’on ni fak Azzur nge Pelatiah nib mo’on ni fak Benayah rorad, ni yow l’agruw i tayugang’ ko fare nam.

2 Me ga’ar Got ngog, “Fak e girdi’, pi pumo’on ney e yad ma makath nag e kireb ma yad ma pi’ e fanow nib kireb u lan e re binaw ney. 3 Yad be yog ni yad be ga’ar, ‘Dabki n’uw nap’an mu kud toyed boch e naun bayay. Re binaw ney e bod ba th’ib ni yima lum riy, ma gadad bod e ufin u langgin, machane yug rogon riy ma be rungrunguydad ko nifiy.’ 4 Fak e girdi’, aram e chiney e ngam puwan’ ngorad.”

5 Meying fare kan nthothup rok SOMOL ngog, me yog SOMOL ngog ni nggu pi e re thin ni ba’aray ko girdi’: “Gimed e girdi’ nu Israel, I gag e gumnang e n’en ni gimed be yog nge n’en ni kam puruy’ niged. 6 Kam thanged e pogofan rok bo’or e girdi’ u roy u lan binaw nike sug daken e kanawo’ ko ldow.

7 “Ere irera’ e n’en ni Gag fare SOMOL ni Th’abi Tolang e gu be yog ngomed. Rriyul, re binaw ney e th’ib ni yima lum riy, machane bu uw e ufin? Downgin fapi girdi’ ni kam li’ed! Dab mmagach gad u roy bay gon’med nga wuru’ fare binaw! 8 Gimed ma rus ko saydon? Bay gu fek boch e pumo’on ni bay e saydon rorad ngar cham gad ngomed. 9 Bay gu fekmed nga wuru’ e binaw ngu pi’med nga pa’ e milekag. Kug duwgiliy ni gechig romed e yam’, 10 ni bay ni thang e fan romed u fithik’ e mael u lan tafenmed. Ma aram e gubin e girdi’ e bayi nang ni Gag SOMOL. 11 Re binaw ney e dabi rungrunguymed ni bod e th’ib nma rungrung ko ufin u langgin. Ma demturug e re gin’en ni gimed bay riy u lan yu Israel ma bay gu gechig nagmed. 12 Bay mu nanged ni Gag SOMOL ma n’umngin nap’an ni um folgad ko motochiyel ko pinam nib chuchur ngomed, e aram n’umngin nap’an ni um th’abed e motochiyel rog nge tin gog ngomed ni ngam rin’ed.”

13 Kangiyal’ i n’em ni gu be yi’iy, me thig Pelatiah nga but’ nike yim’. Mug paraw nga but’ nggu an owcheg nga daken e but’ nggu tolul ni lingug, “ SOMOL ni Th’abi Tolang, danga’! Mog ngam li’ urngin e girdi’ nike magach u Israel?”

14 Me ga’ar SOMOL ngog, 15 “Fak e girdi’, girdi’ ni yad be par u Jerusalem e yad be weliy murung’agem nge pi’in girdi’en e nam rom ni yad ba kalbus u bang. Yad be ga’ar, ‘Pi kalbus e kay gur ma’lafgad nga orel ni nggu’ur liyorgad ngak SOMOL. Ma ke pi’ ngomad fare but’ ni nggu tafned.’

16 “Mog e chiney ngak pichongim ni yad ba kalbus e n’en ni gu be yog, I gag e gu pi’rad ko pi nam u palog mu gu weregrad ngalan boch e nam. Ma chiney i yan ngaram e bay ug par rorad ko yungi n’en ni karanod ngay.

17 “Ere mog ngorad e n’en ni gu be yog, I gag SOMOL ni Th’abi Tolang. Bay gu kunkunuyrad ko pi nam ni gu weregrad riy, nggu fulwegrad bayay ko fare binaw nu Israel. 18 Ma nap’an ni yad ra sul, ma dabisiy ni ngar chuwegned gubin e pi liyos nib alit, mab sonogor ni yad ra pir’eg. 19 Ma bay gu pi’ ngorad reb e gumircha’ nge reb e tafnay nib be’ech. Mu gu chuweg gumircha’rad ni gelan’ nggu pi’ ngorad ba gumircha’ nma fol.Ezk 36:26–28 20 Ma aram e bay ra folgad ko motochiyel rog miyad tay u gil’ gubin e tin gog. Bay ra manged girdi’eg, mu gu mang Got rorad. 21 Machane bay gu gechignag e girdi’ ni ba’adag nma tayfan e liyos nib alit, ma ba sunsonogor. Gu ra gechig nagrad ko n’en ni kar ngongliyed.” I SOMOL ni Th’abi Tolang e keyog e pi thin ney.

22 Fa pin’en nib fos e tababnag e changag, ma fapi tayapyap e un ngorad. Ma fare ra’en nib makankan ni maluplup’en Got nu Israel e bay u dakenrad. 23 Ma aram me chuw fare ra’en nib malhen ni ko fare binaw nge yan i yan ko fare burey ni bay ko ngek riy. 24 U lan fare changar rog ni kan pilyeg e kan nthothup rok Got e chibiyeg ngalang nge fulwegeg ko fapi kalbus ni yad bay u Babylon. Ma aram me m’ay ngabang fare changar ni ug tay, 25 mug weliy ngak fapi kalbus urngin e tin ke dag SOMOL ngog.