1 Gu thamiy gelngin SOMOL ni yib ngog nib gel me fekeg nge yan i teg ngalan ba loway nike sug daken e but’ riy ko yil. 2 Ma gamow lekag fare loway, mu gguy ni pire’ e yil ni bay riy nike mlik’. 3 Me ga’ar ngog, “Fak e girdi’, ga be leamnag ma ku rayag ni nge fos e pi yil ney?”

Mu gu fulweg ngak ni lungug, “ SOMOL ni Th’abi Tolang, kemus ni gur e rayag ni ngam pi’ e fulweg ko bug nir e thin.”

4 Me ga’ar, “Mu weliy e yi’iy ngak e pi yil ney. Mog ngak e pi yil ney nike mlik’ ni ngar motoyilgad ko thin rok SOMOL. 5 Mu weliy ngorad ni Gag SOMOL ni Th’abi Tolang e gu be yog ngorad ni be lungug: Bay gu pi’ e pogofan romed nggu fasegmed bayay. 6 Bay gu tay e ufin nga dowmed, mu gu ing e biyach u wuru’. Bay gu pi’ e pogofan romed nggu fasegmed bayay. Ma aram e bay mu nanged ni Gag e SOMOL.”

7 Ma aram mu gu yi’iy ni bod nnog ngog. Nap’an ni gu be welthin mu gu rung’ag lingan bogi ban’en ni be chachafin, me sul fapi yil nge ul ul. 8 Ma nap’an ni ku gu be yaliy, me sul e ufin nge biyach nge ing fapi yil. Machane dariy e pogofan ko fapi dowef.

9 Me ga’ar Got ngog, “Fak e girdi’, mu yi’iy ngak e nifeng. Mog ngak e nifeng nike yog SOMOL ni Th’abi Tolang ni nge yib e nifeng u gubin yang nge fulweg e pogofan nga fithik’ e pi dowef ney ngar fosgad bayay.”

10 Mu gu yi’iy ni bod nnog ngog. Me sul e pogofan ngak fapi dowef nib yam’, miyad fos ngar sak’iygad. Ma yad bod e salthaw ni pire’ ni pire’.

11 Me ga’ar Got ngog, “Fak e girdi’, girdi’ nu Israel e yad bod e pi yil ney. Yad be yog ni kar mlik’gad ndakuriy ban’en ni be l’agan’rad ngay, ma dakuriy farad. 12 Ere mu yi’iy ngak piyu Israel ni girdi’ rog ngamog ngorad ni Gag SOMOL ni Th’abi Tolang e bay gu bing e pi malangen e yam’ ni yad bay riy. Mu gu chuwegrad riy, nggu fulwegrad ko nam nu Israel. 13 Nap’an ni bay gu bing e pi malangen e yam’ ni ka ni k’eyag e girdi’ rog riy nggu fekrad nga wuru’, ma bay ra nanged ni Gag e SOMOL. 14 Bay gu pag athon l’ugunag ngorad nggu fasegrad, mu ur pired ko nam rorad. Ma aram e bay ra nanged ni Gag e SOMOL. Kug micheg ni bay gu rin’ e ren’ey ma ri bay gu rin’. I Gag SOMOL e gu be yog e pi thin ney.”

15 Me non SOMOL ngog bayay. 16 I ga’ar, “Fak e girdi’, mu fek ba ley i gek’iy ngam yoloy e pi thin ni ba’aray nga daken: Nam nu Judah. Mu kum fek ba ley ngam yoloy e pi thin ni ba’aray nga daken: Nam nu Israel. 17 Ma aram ma ga puthuy taban e gal ley i gek’iy ney ngam kol nga pa’am ni gowa ta’ab ley i gek’iy. 18 Girdi’ ko nam rom e bay ra weniggad ngom ni ngam weliy fan ngorad. 19 Ma ngamog ngorad ni Gag SOMOL ni Th’abi Tolang e bay gu fek e ley ni ba’aram e gek’iy ni be yip’ fan yu Israel nggu pethuy ko ley ni ba’aram ni be yip’ fan yu Judah. Bay gu ngongliy ta’ab ley i gek’iy ko gal ley i gek’iy ney nggu kol u lan pa’ag.

20 “Mu kol e gal ley i gek’iy ner ni kam yoloy e thin ngay, ma gguy rogon nge guy e girdi’. 21 Ma ga weliy ngorad ni Gag SOMOL ni Th’abi Tolang e bay gu chuweg e girdi’ nu Israel u lan e pi nam ni kranod ngay, bay gu kunuyrad mu gu fulwegrad ko nam rorad. 22 Bay gu ulunguyrad ngar manged girdi’en ta’ab nam u daken e pi burey nu Israel. Bay ra pired ni ta’reb e pilung e be gagiyeg nagrad, ma gathi bay kur pired ni yad girdi’en ruw i nam ara rki’gad ngar l’agruw ulunggad u tan pa’ l’agruw i pilung. 23 Dab ku ra ta’ay niged yad ko fapi liyos ni sunsonogor bi’id ara ra alit niged yad ko denen. Bay gu pithigrad ko yupa’ i kanawo’ ni yad ma denen riy ngu’ur n’igedgag. Bay gu machalbog nagrad; bay ra manged girdi’ rog, mu gu mang Got rorad. 24 Ba pilung ni bod e tapigpig rog i David e bayi mang pilung rorad. Yad gubin ni bay ra cheaggad nge par ni ta’ab pilung e be gagiyeg nagrad ma bay ur folgad ko pi motochiyel rog nri yad ba yul’yul’ ngay. 25 Bay ra pired ko fare nam ni gu pi’ ngak e tapigpig rog i Jakob, ni fare nam ni i par pi chitamangirad ni kakrom riy. Bay ra pired u rom, ma ku er i tay pifakrad nge urngin e pi’in bay yib ni owcherad ni dariy n’umngin nap’an. Ba pilung ni bod e tapigpig rog i David e bay i gagiyeg nagrad ni dariy n’umngin nap’an. 26 Bay gu ngongliy ba m’ag u thilmad nra micheg ni dabki buch ban’en rorad bingyal’. Bay gu tayrad ni yad bmuduwgil mu gu yo’or nagrad, ma bay gu duwgiliy ni Tempel rog e nge par u lan taferad ndariy n’umngin nap’an. 27 Bay ug par rorad u rom; nggu mang Got rorad miyad mang girdi’ rog. 28 Nap’an ni bay gu tay e Tempel rog ngaram ni nge par u fithik’rad ni dariy n’umngin nap’an, ma aram e pi nam e bay ra nanged ni Gag SOMOL e ku gu mel’eg yu Israel ni ngar manged girdi’ rog.”