BABYOR NI
EZRA
Murung’agen e Re Ke Babyor Ney
Fare Babyor ni Ezra e ba ul ul ko babyor ni Kronicles, ni murung’agen boch e girdi’ ni ur kalbusgad u Babylonia min pagrad ngar sulod, me sul rogon e par nge liyor u lan yu Jerusalem nga rogon. Ba’aray yarmen e pin’en ni un rin’: 1) Bin somm’on e ulung nni pag nge sul nga Jerusalem e Cyrus ni Emperor nu Persia e yog. 2) Fare Tempel e kun toy bayay min yiblay ngan ognag ngak Got, min fulweg nga rogon e pigpig nge liyor ni yima tay riy ngak Got u lan yu Jerusalem. 3) Me boch e duw nga tomuren miki sul reb e ulung nga Jerusalem ni cha’ ni ga’ riy e Ezra, ma ku ir e cha’ nrib tamilangan’ ko Motochiyel rok Got, ma ku ir e ayweg e girdi’ ngar yaramiyed e pi gam’ing ko taliw nge ngongolen e par rorad, ya nge yag rorad ni ur koled falen e pi yalen rorad nu Israel.
Gathon e Re Ke Babyor Ney
Bin somm’on e sul u Babylon 1:1—2:70
Fare Tempel nni toy bayay min ognag ngak Got 3:1—6:22
Ezra ni sul ni yad boch fapi kalbus 7:1—10:44
1
Cyrus ni yog ngak e pi Jew ni ngar sulod ko nam rorad
1 Re duw i n’en ni som’on ni emperor*EMPEROR: Cyrus nu Persia e kol fare binaw nu Babylon ko mael u nap’an 539 B. C. u m’on ndawori yib Kristus me tabab ko gagiyeg ni ir e ke mang pilung. Cyrus u Persia, me gagiyegnag SOMOL laniyan’ nge yog bbugithin nga ni yoloy nga babyor nga ni be’eg ngak e girdi’ u gubin yang ni be gagyegnag. Nrin’ e ren’ey ya nge yib i m’ug nib riyul’ e tin ni yog SOMOL u l’ugun Jeremiah ni profet.Jer 25:11; 29:10
2 “Ba’aray e thin ni yog Cyrus ni Emperor nu Persia. I SOMOL, ni ir fare Got nu tharmiy, e ke teg ni gag e pilung ko fayleng ni ga’ngin, ma ke pi’ e maruwel rog ni ngug toy ba tempel ni fan ngak u Jerusalem ni bay u lan e nug nu Judah. 3 Mang e yigi par Got romed ni gimed gubin, gimed e pi’in girdi’en. Ngam marod nga Jerusalem ngam toyed bayay fare Tempel rok SOMOL, ni ir fare Got nu Israel, ni fare Got ni yima liyor ngak u Jerusalem. 4 Fa’anra bay reb i girdi’en u reb e nam nib kalbus ni ba’adag ni nge sul, ma girdi’ ni yad bbuguliyoror e ngar pi’ed e re ayuw ni ba’aray ngak. Ngar pi’ed ngak e silber nge gol, nge chugum nge gamanman nma fek e chugum, nge tow’ath ni ngan pi’ u lan e Tempel rok Got u Jerusalem.”
5 Ma pi lolugen e yu ke girdi’ ko pi ganong rok Judah nge Benjamin, nge pi prist nge pi Levite, nge urngin e pi’in ke tay Got nga lanin’rad ni ngranod e ra fal’eged rogorad ni ngranod ngar toyed e Tempel rok SOMOL u Jerusalem. 6 Urngin e pi’in yad bbuguliyoror e ra ayuwegedrad ngar pi’ed bo’or ban’en ngorad: boch ban’en nni ngongliy ko silber nge gol, nge chugum, nge gamanman nma fek e chugum, nge ku boch ban’en nib tolang puluwon, nge tow’ath ni ngar pi’ed ngak SOMOL u Tempel.
7 Me sulweg Cyrus ni Emperor fa yu raba’ i dabiy nge kap ni fek Nebukadnezzar ni Pilung u Jerusalem nge yib i tay ngalan e tempel ko tirok e got. 8 I pi’ ngak Mithredath, ni ga’ ko tachubgil salpiy rok e pilung, ni ir e the’eg ni fan ngak Sheshbazzar, ni fare governor nu Judah, 9-10 ni ba’aray rogon:
| yu raba’ i dabiy nib gol ni fan ko maligach | 30 |
| yu raba’ i dabiy nib silber ni fan ko maligach | 1,000 |
| yu raba’ i dabiy | 29 |
| yu raba’ i dabiy ni gol nib achig | 30 |
| yu raba’ i dabiy ni silber nib achig | 410 |
| nge ku boch e talin e maruwel | 1,000 |
11 Urngin u gubin e pin’em e 5,400 ni aram e fapi dabiy nib gol nge silber nge boch tatalin e maruwel ni fek Sheshbazzar ko fa ngiyal’nem ni ir nge boch e kalbus e ra chuwgad u Babylon ngarbad nga Jerusalem.
*1:1 EMPEROR: Cyrus nu Persia e kol fare binaw nu Babylon ko mael u nap’an 539 B. C. u m’on ndawori yib Kristus me tabab ko gagiyeg ni ir e ke mang pilung.
DRAFT VERSION — Proofreading in progress