1 Gimed yu Galatia ni balyang! I mini’ e ke pig ngomed? Ya ri gowa gimed be guy, nni weliy rogon e yam’ ni tay Jesus Kristus u daken e kuruth! 2 Ere mpi’ed e fulweg ngog ko ta’are bugithin ni ba’aray: i yag fare Kan Nthothup rok Got ngomed ni fan e um rin’ed e tin ni be yog e Motochiyel ngomed, fa bochan e mu rung’aged e Thin Ni Bfel’ ni yib rok Got me mich u wun’med? 3 Ra di’in me er fanmed balyang! Kam tababgad ko bin nib be’ech e pangin ni Kan Nthothup rok Got e ayuwegmed nge yag ngomed: ere gimed ba’adag ni gelngimed e ngam muruwliyed ngay ngam marod mmu’niged? 4 Ba ga’ e gafgow ni kani tay ngomed ni bochan e Thin Ni Bfel’ ni yib rok Got, ere ngam n’iged nge yan i aw nike m’ayfan? Rib muduwgil ni bay fan! 5 Mogned, i pi’ Got fare Kan Nthothup ngomed me ngongliy e maang’ang u fithik’med, ni gur fan e gimed be fol ko tin ni be yog e Motochiyel ngomed ara fan e mu rung’aged e Thin Ni Bfel’ ni yib rok Got me mich u wun’med?

6 Ri bod rogon murung’agen Abraham ni be weliy e babyor nib thothup ni be ga’ar: “I mich Got u wan’, ma bochan e michan’ rok ngak Got ma aram me matha’eg Got ngak ni ir reb e girdi’ nib mat’aw.” 7 Ere susun e ngam nanged ni girdi’ nib michan’rad ngak Got e ireram e pi’in nriyul’ ni yad e pi’in owchen Abraham. 8 Dawori taw ngay ma keyog e babyor nib thothup ni Got e bayi mat’awnag e pi’in gathi yad piyu Israel ngak u daken e michan’ rorad ngak. Aram fan ni machibnag e babyor nib thothup ngak Abraham e Thin Ni Bfel’ ni yib rok Got u m’on riy ndawori taw nga nap’an ni ba’aray ni ga’ar: “U dakenam e bayi fal’eg Got wa’athan urngin e girdi’ nu fayleng riy.” 9 Me mich u wan’ Abraham e re bugithin nem min fal’eg wa’athan; ere urngin e girdi’ nra mich Got u wun’rad e yira fal’eg wa’athrad ni bod rogon Abraham.

10 Pi’in ke pagan’rad ko Motochiyel ni yad be fol riy e yad be par nib buch wa’athrad. Ya be yog e babyor nib thothup ni be ga’ar: “En ni gathi urngin ngiyal’ ma be fol u urngin ban’en ni kan yoloy u lan babyoren e Motochiyel e ke kireb wa’athan!” 11 Ere chiney e kari tamilang ndariy be’ nra mat’aw ngak Got ni Motochiyel e nge mat’awnag; ni fan e be yog e babyor nib thothup ni be ga’ar, “En nike mat’aw ngak Got ni bochan e mich Got u wan’ e ir e ra fos.”*nike mat’aw ngak Got ni bochan e michan’ rok e ra fos; ara nike mat’aw ngak Got e ra par nib fos u daken e michan’ rok. 12 Machane Motochiyel e der toer ko mich u wun’uy ngak Got. Ya bod nike yog e babyor nib thothup ni be ga’ar, “En nra rin’ urngin e tin ke yog e Motochiyel ngak ni nge rin’ e ir e ra fos riy.”

13 Machane Kristus e ke chuwegdad ko buch wa’athan ni Motochiyel e ke fek i yib ngodad, ni bochan e kemang ir e ke buch wa’athan ni fan ngodad. Ni bod rogon nike yog e babyor nib thothup ni be ga’ar, “En ni kan tining nga ba ley i gek’iy e kan bucheg wa’athan.” 14 I rin’ Kristus ni aram rogon ni fan e fare tow’ath ni ognag Got ngak Abraham e nge yag ni ngan pi’ ngak e pi’in gathi yad piyu Israel, ni ngan pi’ ngorad u daken Kristus Jesus, ma aram e daken e michan’ rodad ngak e ra ni pi’ fare Kan ni Thothup riy ngodad ni ognag Got nra pi’.

15 Pi walageg ni girdi’en Kristus, nggu weliy murung’agen ban’en ngomed ni nggu susunnag nga ban’en ni yima rin’; fa’anra weliy l’agruw ni’ murung’agen ban’en me ta’reb lanin’row riy miyow sayin nga babyor ni aram e m’ag ko fare bugithin ni kar weliyew, ma dakuriy be’ ni ngki th’ab e re m’ag nem ara ki puthuy ban’en ngay. 16 Ere Got e ognag ngak Abraham e tin ni nge pi’ ngak Abraham nge ngak be’ ni bay sum ni owchen Abraham. Ma de yog ni ga’ar, “nge ngak e pi’in bay ra sumgad ni owchen Abraham,” ni fan e re bugithin nem e bo’or e girdi’. Machane rogon ni yog e ga’ar, “nge ngak be’ ni bayi sum ni owchen Abraham,” ni fan e re bugithin nem e kemus nta’abe’, ni aram Kristus. 17 Ba’aray e ren’en ni gu be yip’ fan, i Got e ngongliy ba m’ag u thilin e girdi’ nge ir me ga’ar e bayi par ni bod rogon nike yog. Ma fare Motochiyel ni fini pi’ Got ni aningeg mir’ay nge guyey e duw nga tomuren e re m’ag ney, e dabiyag ni nge th’ab e re m’ag nem me thang e tin nike ognag Got ni bayi pi’. 18 Ya fa’an manga n’en ni nge pi’ Got e nge yib ngodad u daken e re Motochiyel nem, me ere dabki yib ngodad u daken e n’en ni ognag nra pi’. Machane i Got e pi’ ngak Abraham e n’en ni ognag ngak ni fan e yog ngak Abraham nra pi’ ngak.

19 Ere mang ni pi’ Got fare Motochiyel? I puthuy ko n’en ni ognag ni nge pi’ ngak Abraham ni fan e nge dag ko mang e ngongol nib kireb, me finey Got ni nge par e re Motochiyel nem nge yan i mada’ ko ngiyal’ ni bay yib i m’ug riy fa’anem ni ir e owchen Abraham, ni ir fa’anem ni ognag Got. Ma fare Motochiyel e pi’ Got ngak e pi engel ngarbad ra pi’ed ngak e girdi’, ni bay be’ nib mo’on ni ir e mang maaf ko re Motochiyel ney u thilin e pi engel nge girdi’. 20 Machane maaf e daki t’uf ni fa’anra kemus ni ta’abe’; ma Got e ta’abe’.

21 Gur fan e re bugithin ney e aram e ke togopluw fare Motochiyel ko tin ni yog Got ni bayi rin’? Aram e danga’! Ya fa’an mang e ke pi’ Got ba motochiyel ni ir e rayag ni nge pi’ e yafos ngak e girdi’, me ere rayag ni nge mat’aw e girdi’ ngak Got u daken e re Motochiyel nem. 22 Machane fare babyor nib thothup e keyog ni girdi’ ko re fayleng ney ni polo’ e yad bay u tan gelngin e denen, ni bochan e pi arorad nra michan’ ngak Jesus Kristus e rayag ngorad fare tow’ath ni ognag Got nra pi’ ngak e pi’in ke mich Jesus Kristus u wun’rad.

23 Machane u m’on ko ngiyal’ ndawori taw nga nap’an ni aram e nge mich Kristus u wun’uy ma i ta’dad e Motochiyel nike loknag e naun ngodad ni gad bod e kalbus nge yan i mada’ ko ngiyal’ ni bayi dag Got e re mich ney riy. 24 Ere re Motochiyel nem e ir e i gagiyegnagdad, me ir e mang sensey ngodad nge yan i mada’ ko ngiyal’ ni yib Kristus riy, ni aram e rayag ni ngad mat’awgad ngak Got u daken e michan’ rodad ngak Kristus. 25 Ere chiney e ke taw nga nap’an ni nge michan’uy ngak Kristus, ma aram e fare Motochiyel ni mang sensey ngodad e gathi ku ir e be gagiyegnagdad.

26 Yu daken e michan’ romed ngak Kristus e ir e ke yag ni mmanged pifak Got riy ni gimed gubin, ni aram e kam ta’ab girdi’gad Kristus Jesus. 27 Ya kan tawfe nagmed ko ta’ab girdi’ ni kam ted Kristus, ma aram fan nike yag ngomed fel’ngin Kristus. 28 Ere ta’reb rogon piyu Israel nge pi’in gathi yad piyu Israel, ma ku errogon e pi’in yad e sib nge pi’in gathi yad e sib, ma ku errogon e pi’in pumo’on nge ppin, ni bochan e gimed gubin ma kam ta’ab girdi’gad Kristus. 29 Fa’anra ke mil suwmed ngak Kristus, me ere kam manged pi owchen Abraham, ni aram e bayi yag ngomed e tin ni ognag Got nra pi’.