1 Me ul ul Jakob ko milekag ni be tay ni be sor i yan ngalan e ngek. 2 Me guy ba luwed u daken e ted ni bay dalip ran’ i saf ni kar pired nga but’ u to’oben. Yu ran’ i saf nem e yibe pi’ e ran ngorad ko re luwed nem, ni bay ba malang ni ba ga’ ni ka ni upunguy ngay. 3 Nap’an nra yib urngin e yu ran’ i saf nem ngaram, me yib e pi’in yad ma gafaliy e saf ra chuweged e re gaf i malang nem u langan e re luwed nem ngar pi’ed e ran ngorad. Miyad fulweg e re gaf i malang nem nga tagil’.”

4 Me fith Jakob ngorad ni ga’ar, “Pi tafager, u uw e kambad riy?” Me lungurad, “Kugbad u Haran.” 5 Me fithrad ni ga’ar, “Gimed manang Laban ni be’ nib mo’on ni fak Nahor?” Me lungurad, “Gamad manang.” 6 Me fith ni ga’ar, “De m’ar?” Me lungurad, “De m’ar. Mu sap, ke yib Rachel ni be’ ni bpin ni fak nike un nga ba ran’ i saf ni fak e chitamngin.” 7 Me ga’ar Jakob, “Chiney e kab tamilang, dawori taw ngal’an ni ngan fek e yu ran’ i saf ney nga taferad, mang ndab mu pi’ed e ran ngar unumed mi gimed fulwegrad ngar ked e pan?” 8 Me lungurad, “Dabiyag ni gu dorgad, ya ra mu’ulung urngin e yu ran’ i saf ngara’ min chuweg e re gaf i malang ney; ma aram mfin gu pi’ed e ran ngorad.”

9 Nap’an ni ka be non Jakob ngorad, me taw Rachel nike fek fa ran’ i saf rok e chitamngin. Ir e ma gafaliy e saf rok e chitamngin. 10 Fa’ani guy Jakob Rachel ni karbad fa ran’ i saf ni fak Laban ni walagen e chitiningin, me yan ko fare luwed, nge pug fare gaf i malang, me pi’ e ran ngak fapi saf. 11 Ma aram me faray owchen fare pin, me yornag e felfelan’. 12 Me weliy ngak Rachel ni ga’ar, “Fak Rebekah gag ma be’ rog e chitamam.” Me mil Rachel nge yan ni nge weliy ngak e chitamngin. 13 Ma fa’ani rung’ag Laban murung’agen Jakob ni fak Rebekah ni walagen, me mil i yib ni ngar mada’gow, me yib i gumuchmuch ngak nge faray owchen, me fek i yib ngalan e naun rok. Me weliy Jakob ngak Laban salpen ni urngin. 14 Me ga’ar Laban ngak Jakob, “Gadow ta’ab racha’.” Me par Jakob u rom nreb e pul.

15 Me ga’ar Laban ngak Jakob, “Be’ rog gur, machane dab mmaruwel rog ndariy puluwom. Uw urngin puluwom ni ga ba’adag ni nggu pi’ ngom?” 16 Ma l’agruw e ppin ni bay ni fak Laban; bin ilal e Leah, ma bin bitir e Rachel. 17 Mi Leah e gathi rib pidorang; mi Rachel e rib fel’ i tay kenggin ma ba pidorang. 18 Ma ba’adag Jakob Rachel, me ga’ar Jakob, “Bay gu maruwel rom ni medlip e duw, ma ga pi’ Rachel ni bin bitir e bpin ni fakam nggu le’engiy.” 19 Me ga’ar Laban, “Kabfel’ u wun’ug ni gu ra pi’ ngom ko bin ni gu ra pi’ ngak yugu reb e pumo’on, ere mpar rog.” 20 Me maruwel Jakob ni medlip e duw ni bochan Rachel, me finey nsusun e ri in e rran, ni bochan e ri ba’adag Rachel.

21 Me ga’ar Jakob ngak Laban, “Ke taw ko fa ngiyal’ ni mog ngog; ere mpi’ fare pin ni fakam ngog nggu le’ay.” 22 Ma aram me ngongliy Laban ba mur ni fan ko mabgol nge pining urngin e girdi’ ngay ko gin’em. 23 Machane re nep’ i n’em, me fek Laban Leah i yan ngak Jakob, me pag Rachel, me par Jakob nge Leah nrogon e mabgol. ( 24 Me pi’ Laban be’ ni bpin ni sib rok ni aram Zilpah ngak Leah ni fak.) 25 Ma fa’ani reb e rran riy ni kadbul me pir’eg Jakob ni Leah e ka ni pi’ ngak. Me ga’ar ngak Laban, “Mang ni kam rin’ e biney e pa’ ngog? Kug maruwel rom ni bochan e nge yog Rachel ngog. Ere mang ni kam ban nigeg?” 26 Me ga’ar Laban, “Gathi yalen u roy ni nga ni fek e bin bitir e bpin ni fakay nga ni pi’ ko mabgol ndawori mabgol e bin ilal. 27 Mu son nge m’ay e re wik ni baara’ ni yibe madnomnag e mabgol rom riy, mu gu pi’ Rachel ngom ni fa’an ka ga ra maruwel rog ni medlip e duw.” 28 Me fel’ u wan’ Jakob, ma faani m’ay fare wik ni yibe madnomnag e mabgol riy, me pi’ Laban Rachel ni fak ngak Jakob nge le’engiy. ( 29 Me pi’ Laban be’ ni bpin ni sib rok ni aram Bilhah ngak Rachel ni fak.) 30 Miki par Jakob nge Rachel nrogon e mabgol, ma ka ba’adag Jakob Rachel ngak Leah. Me maruwel rok Laban ni ku medlip e duw.

31 Ma fa’ani guy SOMOL ni gathi rib adag Jakob Leah, me ayuweg ngi i diyen rok Jakob, me par Rachel nde yog ni nge diyen. 32 Me diyen Leah me gargel ni bochi pagel. Me ga’ar, “I SOMOL e ke guyeg ni gu be gafgow, chiney e bayi adageg e pumo’on rog”; me tunguy fithingan ni Ruben.*RUBEN: Gowa fare bugithin ni Hebrew ni “mu gguy, ba pumo’on ni fakay, mu guy e gafgow rog.” 33 Me diyen nge gargel bayay ni ku reb e pagel. Me ga’ar, “I SOMOL e ku ke pi’ e chi pagel ney ngog, ya ke rung’ag nde adageg e pumo’on rog”; ma aram me tunguy fithingan ni Simeon.†SIMEON: Gowa fare bugithin ni Hebrew ni “rung’ag.” 34 Me diyen nge gargel bayay ni ku reb e pagel. Me ga’ar, “Chiney e bayi gel e pagan’ rok e pumo’on rog ngog, ni bochan e kug gargeleg dalip i pagel ni fak”; me tunguy fithingan ni Levi.‡LEVI: Gowa fare bugithin ni Hebrew ni “michigiy.” 35 Me diyen nge gargel bayay ni ku reb e pagel. Me ga’ar, “Yaney e nggu pining e magaer nge sorok ngak SOMOL”; me tunguy fithingan ni Judah.§JUDAH: Re ngachal ney ni Hebrew e gowa fare bugithin ni “magaer nge sorok.” Me tal ndaki diyen.