1 Me guy Jakob Esau nike yib ni yad fa 400 i pumo’on, me f’oth e bitir rok Leah, nge Rachel, nge fa gali ppin ni sib. 2 Me tay fa gal sib nge pifakrow nga m’on, me tay Leah nge pifak nga tomur rorad, me tay Rachel nge Josef nga th’abi tomur. 3 Me m’on Jakob rorad me siro’ ni dalip yay me mada’ ngak fare pumo’on ni walagen. 4 Me mil Esau i yib ngak, me yib i gumuchmuch ngak, me faray owchen. Mi yow l’agruw ni yow be yor. 5 Fa’ani sap Esau ni guy fapi ppin nge bitir, me fith ni ga’ar, “Mini’ e pi cha’nir ni kambad?” Me ga’ar Jakob, “Pi cha’ney e bitir nike runguyeg Got ke pi’ ngog.” 6 Me yib fa gali ppin ni sib ni yad pifakrow ngarbad ra siro’gad ngak; 7 me yib Leah nge pifak ngar siro’gad, me yib Josef nge Rachel u tomur ngar bow ra siro’gow ngak.

8 Me ga’ar Esau, “Ma fa tinem e girdi’ ni kug mada’gad mang farad?” Me ga’ar Jakob, “Farad e bochan e ngam runguyeg.” 9 Machane me ga’ar Esau, “Walageg, ba gaman e tin bay rog ban’en, mu tay rom e tin bay rom ban’en.” 10 Me ga’ar Jakob, “Wenig ngom, fa’anra kam runguyeg me ere mfek e tow’ath rom ni kug pi’. Ya owchem ni kug guy e gowa kug guy owchen Got, ya ri gab gol ngog. 11 Wenig ngom, mfek e re tow’ath rom ni kug fek i yib ni fan ngom; ya Got e ke runguyeg ke pi’ ngog urngin e tin nge yag ngog.” Me wenig i wenig ngak ma aram me fek.

12 Me ga’ar Esau, “Ngad fal’eged rogodad ngdarod. Bay gu m’on romed.” 13 Me ga’ar Jakob, “Ga manang ni pi’in ni bitir e yad bme’waer, ma thingar gu tafinaynag e saf nge garbaw nge pifakrad. Ya ra ni gur ngorad ni reb e rran, miyad yim’ ni yad urngin. 14 Wenig ngom, mm’on rog, ya bay ug saf’og i yib, ni bay gub ni gu be fol u payngin e garbaw nge bitir, nge mada’ ko ngiyal’ ni bay gu taw ngom nga Seir.” 15 Me ga’ar Esau, “Ere nggu tay boch e pi pumo’on rog ney rom.” Me ga’ar Jakob, “Kammagaer, machane kayag, ya yugu rayag rogomad ko wub.” 16 Ma karofen nem me sul Esau nga Seir. 17 Me yan Jakob nga Sukkoth, me toy ba naun u rom ni fan ngak nge boch e naun ni fan ko garbaw rok. Aram fan ntunguy yu Sukkoth*SUKKOTH: Fithingan e re gin’em ni thin ni Hebrew e fan e “bogi naun.” ko re gin’em.

18 Me taw Jakob nga Shekem ni bay u lan e nam nu Kanaan nde buch ban’en rok, ni aram e ke sul u Mesopotamia. Me n’uf fapi tent rok u daken bangi flang ni ba chugur ko fare binaw. 19 Me chuw’iy e re gi flang nem rok e pi’in owchen Hamor, ni chitamngin Shekem, ni 100 yang e silber e pi’ ni puluwon. 20 Me ubung ba altar u rom, me tunguy El ngay, ni aram e ke ga’ar, altar rok fare Got nu Israel.