14
Hosea ni wenig ngak piyu Israel
1 Gimed e girdi’ nu Israel, mu sulod ngak SOMOL ni Got romed. Denen romed e be dol’ nagmed. 2 Mu sulod ngak SOMOL, mi gimed meybil ngak ni nge lungumed, “Mu n’ag fan urngin e denen romad, me fel’ u wun’um e meybil romad, ma gamad pining e sorok ngom ni bod ni ku gogned ngom ni gamad ra rin’. 3 Yu Assyria e dabiyag ni ngar chuweged gamad ko riya’, ma pi os ko mael e dabiyag ni ngar yororiyed gamad. Ri dab ku gogned bayay ngak e pi liyos romad ni yad e Got romad. A SOMOL, ga ma dag e wurngan’ ngak e pi’in dakriy be’ ni yad ra man ayuw ngak.”
I SOMOL ni micheg ni bayi fal’eg rogon yu Israel bayay
4 Be ga’ar SOMOL,
“Bay gu fulweg e girdi’ rog ngog.
Ma bay ra pired nri yad ba t’uf rog,
ya dakugur damumuw ngorad.
5 Rogog ngak piyu Israel
e bod e n’uw ko but’ ni fengfeng.
Bay yib e muk’uf rorad ni bod e floras;
ma bay yan lik’ngirad nib to’ar nga fithik’ e but’ ngar pired ni yad mmudugil
ni bod e pi gek’iy nu Lebanon.
6 Ma bay ra chigargad ngar tugulgad
ngar pired ni bfel’ ya’arad ni bod e gek’iy ni olive.
Bay i yan gol’ochinginrad ni bfel’
ni bod e gek’iy ni cedar nu Lebanon.
7 Ma aram e bay ur pired bayay ni gag e gu be yoror rorad.
Bay ra yunged e woldug ni grain
mi i yib wom’engirad ni pire’ ni bod bangi milay’ ni grape.
Ma bay i yan murung’agrad ni bod e wayin nu Lebanon.
8 Ma girdi’ nu Israel e dakriy bochi ban’en ni yad ra rin’ ko pi liyos,
ma aram e bay ug fulweg taban e meybil rorad ma gu be ayuwegrad.
Bay gu par ni kug mang manaf rorad ni bod fa mit i gek’iy ni yugu ma par nib galunglung yuwan;
I gag kenggin gubin e pi fla’ab rorad.”
Tin tomur e thin
9 Pi’in yad ba gonop e mang e yugur nanged fan e pin’ey ni ka ni yoloy miyad tay nga lanin’rad. Pi kanawo’ rok SOMOL e bmat’aw, ma pi’in nib mat’aw e yad ma yan riy, ma pi’in tadenen e ma tun ayrad ngar dol’gad, ya darir folgad riy.
DRAFT VERSION — Proofreading in progress