52
Got e bayi chuweg yu Jerusalem u pa’ e to’ogor rok
1 Jerusalem, mu gel me gilbuguwam bayay!
Binaw rok Got ni gab thothup, mon’ nga dakenam e mad rom nib gamog!
Pi’in gathi yad e girdi’ rog e dab kurbad ngalan e yoror rom bayay.Rev 21:2, 7
2 Jerusalem, mu chuweg e fiyath u dowam!
Mu chuw u fithik’ e fiyath ngam par nga tagil’im.
Gimed e girdi’ nu Zion ni ka mu kalbusgad,
mu pithiged e chen ni ka ni m’ag ngomed!
3 Be ga’ar SOMOL ni Th’abi Tolang ngak e girdi’ rok, “Dani chuw’iymed ko salpiy ni ngam manged sib, ma ku aram rogon ni bay ni chuwegmed ko sib ni dab ni pi’ e salpiy ni puluwonmed ni ngan pagmed. 4 Nap’an nim marod ni ngam pired u Egypt ni gimed e milekag u rom, ni gimed e lanin’med ni ngam rin’ed ni aram rogon; me modyargal yu Assyria ngomed ngan fekmed ngabang ni dan pi’ ba salpiy ni pulwonmed. 5 Chiney u Babylon e ku aram e n’en kan rin’ ngomed; ka mu kalbusgad u rom ni da nchuw’iymed. Pi’in ni yad be gagiyeg nagmed e yad be moning ma yad be dariyfan nigeg.Rom 2:24 6 Machane bayi taw nga bangiyal’ ma bay mogned ni Gag e Got, ma kug welthin ngomed.”
7 Rib falan’uy ni ngan guy
ba tamal’og ni be yib u daken e pi burey i yib,
nike fek e thin ni bfel’ i yib, ni murung’agen e gapas!
Nge yib i yog nib ga’ laman ni kan gel me ga’ar ngak Zion,
“Got rom e ir e pilung!”Act 10:36; Rom 10:15; Efe 6:15
8 Pi’in yad be matanagiy e binaw e yad be tolul,
yad be tolulnag e felfelan’ u ta’bang.
Ya kar guyed nga owcherad
nike sul SOMOL nga Zion!
9 Pin’en ni ka ni buthug u Jerusalem,
mu tolul niged e felfelan’.
SOMOL e ke fal’eg laniyan’ e girdi’ rok;
ke chuweg fare binaw rok u pa’ e to’ogor rok.
10 I SOMOL e bayi maruwel nga gelngin nib thothup;
bayi ayuweg e girdi’ rok,
ma ga’ngin e fayleng ni bay ni guy riy.
11 Gimed urngin e pi’in gimed be fek mam’en e Tempel,
mu chuwgad u Babylon ni ka chingiyal’ ney!
Dab mmathgad nga ban’en nike yog e motochiyel ndab mmathgad ngay;
mu ted gimed ni gimed ba thothup mi gimed chuw u lan e re binaw nir.
12 Yaney e dab kum chuwgad ni gimed ba gur;
ma gathi bay mu guyed rogon ni ngam thaygad!
I SOMOL ni Got romed e bayi pow’iymed
me yoror romed u gubin yang.
Fare tapigpig ni be gafgow
13 Be ga’ar SOMOL,
“Tapigpig rog e bayi yan i aw nga rogon e tin be muruwliy;
bayi gilbuguwan mu’un tay fan.
14 Pire’ e girdi’ nra guyed miyad gin ngak;
ya ke pig ya’an ngabang ni gowa gathi ba girdi’.
15 Machane chiney e bpire’ e nam ni bay ra ngatgad ngak,
pi pilung e bay ra ngatgad ngak ni ka ra paged langrad.
Bay ra guyed miyad nangfan
ban’en nda ur nanged.”
DRAFT VERSION — Proofreading in progress