3
Girdi’en e pi nam nra mageygad u lan fare binaw
Ma aram, me pag SOMOL boch girdi’en e pi nam u lan fare binaw nge sikengnag yu Israel ni daro’ned ko pi mael ni un tay u Kanaan i rin’ ni arrogon ni fan e nge fil ngak e pi mfen nu Israel rogon e mael, ni rib ga’ ni fan ngak e pi’in ndawor ru’uned ko mael bingyal’. Tin ni magech u lan fare nam e fa lal i binaw ko Filistine, urngin yu Kanaan, nge yu Sidon, nge yu Hiv ni ur pired u lan fapi Burey nu Lebanon ni tabab ko Burey nu Baal Hermon me yan nge mada’ ko wo’ u thilin e burey u Hamath. Ni tayrad ni nge mang ba sikeng ngak yu Israel ni ngan guy ko yad ra fol ko pi motochiyel ni pi’ SOMOL u pa’ Moses ngak e pi chitamangirad kakrom fa dangay.
Ma aram me par piyu Israel u fithik’ piyu Kanaan, Hitt, Amor, Peris, Hiv, nge piyu Jebus. Ur mabgolgad ma yad be tay fan e pi got rorad.
Othniel
Fapi girdi’ nu Israel e ra paged talin SOMOL ni Got rorad; rdenengad nib togopluw ngak ngu’ur tedfan e pi liyos ni Baal nge Asherah ni fare got ni bpin. Ma aram me damumuw SOMOL ngak yu Israel me pag e Kushan Rishathaim ni Pilung nu Mesopotamia nge kolrad. Miyad par u tan pa’ ni meruk e duw. Ma aram me yor yu Israel ngalang ngak SOMOL, me pi’ SOMOL be’ ni nge chuwegrad u tan pa’ fare pilung. Ni aram Othniel, ni chitamngin Kenaz ni be’ ni walagen Kaleb nib bitir ngak. 10 I yib fare gelngin SOMOL nga daken, me mang ba tagagiyeg nu Israel. Me yan Othniel ko mael, me gelnag SOMOL ko pilung nu Mesopotamia. 11 Me aw e gapas u lan fare nam ni aningeg i ragag e duw, ma aram me yim’ Othniel.
Ehud
12 Me denen bayay e girdi’ nu Israel nib togopluw ngak SOMOL. Ireram fan ni tay SOMOL Eglon ni Pilung nu Moab nge gel nga Israel. 13 I peth Eglon ngak pi Ammon nge pi Amalek; miyad gel ngak yu Israel ngar koled yu Jeriko, ni fare binaw ko gek’iy ni palm. 14 Me par yu Israel u tan pa’ Eglon ni ragag nge meruk e duw.
15 Ma aram me yor piyu Israel ngalang ngak SOMOL, me l’oeg be’ ni nge chuwegrad u tan pa’ Eglon. Ni aram Ehud, ni be’ ni pumo’on nib gilay’, ni Gera e chitamngin, ni be’ ko ganong rok Benjamin. Me l’oeg e girdi’ nu Israel Ehud ni nge yan i pi’ bogi tow’ath ni fen Eglon ni Pilung nu Moab. 16 Ma ke ngongliy Ehud bangi saydon ni fen nruw raba’ ma bm’uth ni gonop’an reb e fit nge l’agruw e inch n’umngin. Me m’ag nga tan e mad rok u ba’ ni mat’aw. 17 Ma aram me fek fapi tow’ath i yan ngak Eglon, ni be’ ni pumo’on nrib sugsug. 18 Nap’an ni pi’ Ehud fapi tow’ath ngak fare pilung me yog ngak e pi’in ru’uned ngak ni ur feked fapi tow’ath ni ngar sulod nga taferad. 19 Machane Ehud e ir rok e cheal nge sul ko fapi malang ni kan ker downgin u to’oben yu Gilgal, nge sul ngak Eglon, me ga’ar ngak, “Gur Pilung, bay bbugithin nib mith ni ngog ngom.”
Ma aram me ga’ar fare pilung ngak e pi tapigpig rok, “Mu chuwgad romow!” Miyad yan nga wean ni yad gubin.
20 Ma aram e fare pilung e bay u rom ni go’ ir ni bpar nga but’ u lan e senggil rok nib tagarbeb, me yan Ehud ngak me ga’ar, “Bay bbugithin nike yib rok Got ni fan ngom.” Me sak’iy fare pilung. 21 Me girengiy Ehud fare gi saydon ni bay u ba’ ni mat’aw rok ko ba’ ni gilay’ i pa’ nge rruchuy ko yal rok fare pilung. 22 Ga’ngin fare saydon ni rich nga fithik’ ni mus nga kolngin, ma mam ko yal rok e ke upnguy fare gi saydon. De luf Ehud fare gi saydon ko yal rok fare pilung, nike yani for u keru’. 23 Ma aram me yan Ehud nga wean, me ning e pi mab nga fitikeru’, me man’nag ni gubin, 24 me chuw. Me yib e pi tapigpig miyad guy ni kan man’nag e pi mab, machane mar leam niged ni bay fare pilung u naun ni be pithig rogon. 25 Miyad son ni n’umngin nap’an nra leam niged ni ngar son niged, machane fa’ani n’uw nap’an ni dawor i bing e mab, miyad fek e kiy ngar binged e mab. Ma bay fare masta rorad nib thig u daken e faraf nib yam’.
26 Ma ke thumur Ehud ko ngiyal’ ni ba’aram ni yad be son. I yan nge pag fapi malang ni kan ker downgin nge mil nga Seirah. 27 Nap’an ni taw nga daken e ted nu Efraim ni go’ burey, me thoy ba yabul ni be pining e girdi’ nu Israel ni ngranod ko mael; ma aram me pow’iyrad u rom nga pe’ning. 28 Me ga’ar ngorad, “Mu lekedgag! I SOMOL e ke gel nagmed rok e pi to’ogor romed, ni piyu Moab.” Aram miyad lek Ehud nga tan e pe’ning ngar koled fa gin’en nma th’ab piyu Moab e lul’ ni Jordan riy nga barba’; dar paged ta’abe’ nge thap nga barba’. 29 Rofen nem e ra li’ed gonap’an e 10,000 e tin th’abi cheag ko salthaw nu Moab; dariy ta’abgayad ni yag ni nge mil. 30 Rofen nem e gel yu Israel ngak yu Moab, ma aram me aw e gapas u lan fare nam ni meruk i ragag e duw.
Shamgar
31 En migid ni yog e thin e Shamgar ni be’ nib pumo’on ni fak Anath. Ku errogon ir e ki ayuweg e yafos rok yu Israel, ya li’ nge yim’ 600 e Filistine ngab ler i gek’iy ni yima gafaliy e garbaw ngay.