48
Gafgow ni tay yu Moab
1 Irera’ e n’en ni yog SOMOL ni Gubin ma Rayag Rok u murung’agen yu Moab:
“Nge kireban’uy ngak e girdi’ nu Nebo —
ya yochi binaw rorad e ke mogothgoth!
Yu Kiriathaim e kan kol,
yoror riy nib gel ni fan ko mael e kan buthug nga but’,
ma girdi’ riy e kan tamra’nag;
2 dakriy felngin yu Moab.
Ke kol e to’ogor yu Heshbon
ma kar makath niged ni ngar gathayed fare nam nu Moab.
Fare binaw nu Madmen e bay i math gulngan;
me thelap e salthaw nga langgin ni togopluw.
3 Girdi’ nu Horonaim e yad be yor ngalang ni yad be ga’ar,
‘Gafgow! Riya’!’
4 “Kan gathay yu Moab;
be yan lungun e bitir ni be yor.
5 Yi be rung’ag lamrad ni yad be yor
u kanawo’ i yan nga talang nga Luhith,
ma lungun e yor ko ngochngochan’
i yan nga p’ening nga Horonaim.
6 Yad be non ni yad be ga’ar, ‘Ngan gur, ngad mil niged e pogofan rodad!
Ni bod ba dongki nu ted nib malboch!’
7 “Gur yu Moab, e ke pagan’um nga gelngim nge fel’ rogon rom,
ma mus ngom e chiney ma bay ni kolem;
fare got rom i Kemosh e bay ni fek ngabang,
nib chagil e pi tolang rok ngak nge pi prist.
8 Dariy reb e yochi binaw nra thay ko fare riya’;
loway nge daken e tafelfel’ e go’ bayi mogothgoth.
I Gag SOMOL e kugog e pi thin ney.
9 Ngan fal’eg rogon e malangen e yam’ ni fan ngak yu Moab;
ya dab kin’uw nap’an min thirif u but’.
Nge par e yochi binaw riy ni dakriy e wulgo’ riy,
ni dakriy be’ ni ku ra par riy bingyal’.”
10 Mu bucheg wa’athan e pi’in darir rin’ed e maruwel rok SOMOL u polo’ i gumicha’rad! Mu bucheg wa’athan e pi’in da rir thanged e pogofan.
Fapi binaw nu Moab e kan gothgathay
11 Ke ga’ar SOMOL, “Moab e gubin ngiyal’ ni be par ni dar buch ban’en rok ma da nir fek nga bang ni kalbus. Moab e bod e wayin ni kan tay ni dab ni bitbit ngay ma da nir ngal’weg u reb e melor nga reb. Lamen e yug ma par ni bfel’.
12 “Ere chiney e ke taw ko ngiyal’ ni nggu l’oeg e girdi’ nge pu’og yu Moab ni bod e wayin. Bay ra mlik niged fapi melor miyad bilbilig nge yoch yang. 13 Ma aram e piyu Moab e bay ra tamra’gad ko fare got rorad i Kemosh, ni ri bod piyu Israel nra tamra’gad ngak Bethel, ni fare got ni i pagan’rad ngak.
14 “Gimed e pumo’on nu Moab, mang ni gimed be yog ni gimed bogi falu’,
nike gagyel fanmed falu’ u fithik’ e mael?
15 Moab nge pi binaw riy e kan kirebnag;
ma pi’in pagel ni yad ba cheag e kan thang owcharad.
I gag e pilung, ni fare SOMOL ni Gubin ma Rayag Rok,
e kugog e pi thin ney.
16 Dabki n’uw nap’an e chiney;
me aw fare gafgow nga Moab!
17 “Ngan yor ni fan ko re nam nem, gimed e pi’in gimed ma par nib chuchugur ngay,
gimed gubin e pi’in ni gimed manang fal’ngin.
Bay mogned nim ga’ar gad, ‘Fare lung rok nib ga’ e ke math’;
gil’ilungun nge feni gel gelngin e dakriy.’
18 Gimed e pi’in ni gimed ma par u Dibon,
e ngambad nga but’ u gil’med nib gilbugwan
ngam pired nga but’ nga fithik’ e ab;
ke taw e girdi’ ni nge gothothay yu Moab
kar ted yung i tagil’ e ayuw ni dakriy e wulgo’ riy.
19 Gimed e pi’in ni gimed ma par u Aroer,
mu sak’iy gad u charen e kanawo ngam son gad;
mi gimed fith e pi’in yad be mil ni ngar chuwgad,
ngam nanged rorad e n’en nike buch.
20 Bay ra fulweged nra ga’ar gad, ‘Moab e kethay pa’,
ngan yornag ya ke m’ay fan.
Ngan weliy u charen fare lul’ ni Arnon i yan
ni yu Moab e kan gothgathay!’
21 “Pufthin e ke taw nga daken fapi binaw ni bay ko burey: u daken yu Holon, Jahzah, Mefaath, 22 Dibon, Nebo, Beth Diblathaim, 23 Kiriathaim, Bethgamul, Bethmeon, 24 Kerioth, nge Bozrah. Pufthin e ke taw nga daken gubin e pi binaw nu Moab, ni tin nib palog nge tin nib chugur. 25 Fare gelngin yu Moab e kan parsiy; ke puth gelngin. I Gag SOMOL e kugog e pi thin ney.”
Moab e bayi Sobutan’
26 SOMOL e ke ga’ar, “Mu gagiyegnag yu Moab nge chingnag, ni bochan e be togopluw ngog. Moab e bayi leap u fithik’ e sul’ugun rok, me minmin e girdi’ ngak. 27 Moab, ka gamnang rogon ni um moningnag e girdi’ nu Israel. U mog e thin ni kireb ngorad ni gowa bogi mororo’?
28 “Gimed e girdi ni gimed ma par u Moab, e ngam paged e yochi binaw romed! Mmarod ngam pired nga thartharen e rech! Mu boded e dove nma ngongliy tafen pifak u merichlen thilthilin e war. 29 Moab e ri ba ufanthin! Kug rung’ag feni ufanthin, tolngan, nge girdi’ nma moningnag, nge rogon ni yad ba uf ngorad. 30 I Gag SOMOL e gu manang e tolngan rorad. U fan sorok ni yad be tay e dariy rogon, ma pin’en ni yad be rin’ e dabi n’uw nap’an nra par. 31 Ere aram e bay gu yornag gubin e girdi’ u lan yu Moab nge girdi’ nu Kir Heres. 32 Bay gu yornag e girdi’ nu Sibmah, nib gal ko meyor ni gu tay ko girdi’ nu Jazer. Fare binaw nu Sibmah, ga bod kenggin e grape nike yib papa’ngin ke mada’ nga ba’ nem e Dead Sea ke yan i taw nga Jazer. Ma ke chiney ma pi wom’ngin e gek’iy rom u nap’an e yal’ nge grape rom e kan gothgathay. 33 Felfelan’ nge uf e kan chuweg ko fare nam nu Moab nib yong’ol but’an. Kug taleg l’ogwen e wayin ni yibe pirdi’iy; dakriy be’ ni nge ngongliy e wayin me tolulnag e felfelan’.
34 “Girdi’ nu Heshbon ngu Elealeh e be yor ngalang, ni yira rung’ag lamrad nga Jahaz; ma ku ra rung’ag e girdi’ nu Zoar, ma ku aram rogon nga Horonaim ngu Eglath Shelishiyah. Mus ko lul’ nu Nimrim ma ke mlik. 35 Bay gu taleg e girdi’ nu Moab ndab kur ngongliyed e maligach ni mo’oruf ko yung i tagil e meybil rorad nge maligach ni yad ma pi’ ko pi got rorad. I Gag SOMOL e kugog e pi thin ney.
36 “Ere lanin’ug e be yor ni fan ngak yu Moab nge fan ngak e girdi nu Kir Heres, ni bod be’ ni be thoy e ngal ni tangin e yam’, ni bochan e gubin ban’en ni farad e go’ ke thay u pa’rad. 37 Yad gubin ni kar puyed lolugrad ma kar th’abed sobarad. Yad gubin ni kar rasayed pa’rad ma yad gubin ni kar chuwgad ko mad ni tutuw. 38 Daken gubin e naun u Moab nge gubin e yungin nma mu’ulung e girdi’ ngay e go’ meyor e yibe tay riy, ni bochan e kug bilig yu Moab ni bod ba rume’ ni dariy be’ ni ba’adag. 39 Ke wearwear yu Moab! Kar yor gad ngalang! Yu Moab e ke m’ay fan. Ke aw ni dakriy woton u but’ ma gubin e nam u charen i yan e bay ur moning niged. I Gag SOMOL e kugog e pi thin ney.”
Dakuriy e gin nge mil yu Moab ngay
40 I SOMOL e micheg ni ba nam e bayi garpow u daken yu Moab ni bod ba eagle nike pithig pon, 41 ma yochi binaw nge yungi tagil e ayuw e bay ni kol. Re rran nem e pi salthaw nu Moab e kar dugow gad ni bod be’ ni bpin ni nge gargel. 42 Bay ni thirif yu Moab u but’ nge dabki mang reb e nam, ni bochan e i togopluw ngog. 43 Marus nge low nge wup e be sonnag e girdi’ nu Moab. I SOMOL e keyog e pi thin ney. 44 En nra guy rogon ni nge mil ko marus e ra mul ngalan e low, ma en nra gararaw ngalang ko fare low e bayi aw ko wup, ni bochan e ke duwgiliy SOMOL e ngiyal’ ni nge aw e riya’ nga Moab. 45 Pi’in nra milgad nike m’ay chalrad ni yad be guy rogon ni ngar pir’eged e ayuw u Heshbon, ni aram fare binaw ni immoy bingyal’ ni i gagiyegnag Sihon ni Pilung, machane ke aw e nifiy ngay. 46 Ke gafgow e girdi’ nu Moab! Ni girdi’ ni yad ma tay fan Kemosh e kan thang owcharad, ma pumo’on ni pifakrad nge ppin e kan fekrad ni kalbus.
47 Machane pi rran ni bay yib e bayi gagiyegnag SOMOL yu Moab nge sul e flaab rok nga tagil’ bayay. Gubin e pin’ey ni yog SOMOL e aram rogon nra taw ngay u puluwon yu Moab.
DRAFT VERSION — Proofreading in progress