10
Ke ngochan’ug ko yafos rog.
Mmotoyil nggu weliy e tin dabug ngom.
Got, dab mu gechig nigeg.
Mog ngog! Mang e kug bucheg?
Mog, mat’aw ni ngarim gafgow nigeg?
Ni ngam dabuy ban’en ni gur e mu sunumiy?
Ma ga siminmin ko pi liyab rok e pi’in kireb?
Ga ma guy ban’en ni bod ni gamad ma guy?
Gur, yafos rom e bod feni ngoch e yafos romad’?
Me ere mangfan ni ga be fal’eg i gay gubin e pi denen rog
ma ga be yaliy gubin thibngig?
Ga manang nde buch e rog,
ma dariy be’ nrayag rok ni nge ayuwegneg u pa’am.
 
Rifrifen pa’am e ngongliyeg me chamiyeg,
ma chiney e kagal raba’ i pa’ef nir e nge thangeg.
Kag manang ni mu sunumiyeg ko but’;
ere ngkum masengseng nigeg ngkug sul ko ab?
10 Gur e mu pi’ gelngin e chitamag mu gu sum;
gur e mu chugliyeg u lan yin e chitnag.
11 Gur e mu ngongliy dowag ni mu tay e yil nge gaf ngay
ma ga upnguy e yil ko ufin nge biyach.
12 Gur e ka mu pi’ e yafos ngog nge t’ufeg ni dabimus,
ma ayuw rom e ke teg ni gu bfos.
13 Machane chiney e kugnang ni ka aram nap’an i yib
ni um mithag rog ni ga be leamnag ni ngam gafgow nigeg.
14 Um yaliy ni ngam guy ko gu ra denen fa,
ya ngam siyeg ni ngam n’ag fan rog.
15 Yug nap’an ni gu ra denen, ma kug kireb u wun’um,
machane nap’an ni gu ra ngongliy e tin bmat’aw, ma dab mogneg nga fel’.
Kri kirban’ug ma ke li’eg e tamra’.
16 Fa’an gu ra ngongliy ban’en nge yan i aw nib manigil,
mag tulufeg ni bod ba layon;
mus ko maang’ang ni ga ra ngongliy ni ngam gafgow nigeg.
17 Gubin ngiyal’ ma bay boch, ban’en ni ngam togopluwnag ngog;
damumuw rom ngog e be gel i yan;
gubin ngiyal’ ma ga be leamnag reb e cham ni ngam tay ngog nib be’ech.
 
18 Got, mang ni mpageg ngan gargel nigeg?
Kabfel ni mang e gum’ u m’on ni dawori guyeg be’.
19 Nggu wan u mayal nga low ni dab gu tal
e ta’reb rogon feni bfel’ ko bin nda gu sum.
20 Gathi ke chugur nga tungun e yafos rog? Mu pageg ngug par nma’agirag gag!
Mu pageg nggu felfelan’ ko chingiyal’ney ni kugub fos.
21 Ke chugur ni nggu wan ma dab kug sul bi’id
ngug wan nga ba binaw nib lumor ma ba kireban’uy riy,
22 bbinaw ko lumor nge wagagey,
ko gin nib lumor e tamilang riy.