BABYOR NI
JOSHUA
Murung’agen e Re Ke Babyor Ney
Fare babyor ney ni Joshua e be weliy rogon ni yan yu Israel ra pired nga Kanaan, ni aram fare nam ni micheg Got nra pi’ ngorad. Kanney e babyor e ni tunguy Joshua ngay ya ireram e re mo’on ni yim’ Moses me yan nga luwan ngi i pow’iy yu Israel.
Re ke babyor ney ni Joshua e l’agruw guruy. Guruy ni m’on (1–12) e murung’agen Somol ni ayuweg yu Israel ngar koled bokun e binaw nu Kanaan ni tin gang’ nge tin achig. Ayuw rok Somol riy yungiyal’ e ma un e maang’ang u fithik’. Ni bod rogon, e mael u Jeriko, ni Somol e buthug nga but’ e yoror riy ni malang (6:20). Ma nap’an e mael u Gibeon me gunugunuy Somol e malang ni ayis u tharmiy nga daken e pi salthaw ni to’ogor rorad ngi i pirdi’iyrad u but’. Ki duwgiliy Somol e yal’ u lang ya nge n’uwnag e rran ni nge yag ni ngar koled ngar li’ed urngin nrayag e salthaw ni to’ogor rorad u m’on ni nge ling e yal’ (10:1–15).
Machane Somol e siyeg ni nge ayweg yu Israel ni fa’an yad ra th’ab fare m’ag ni yog ni go’ ir e ngu’ur liyorgad ngak miyad be fol ko tin keyog. Ni bod rogon, fare mael nra ted u Ai, ni waer yu Israel ni bochan ta’abe’ ni kirebnag fare m’ag u thilin yu Israel nge Somol (7:1–12).
Ma guruy ni l’agruw (13–24) e be weliy rogon nni kuweg e binaw nge reb fapi genong me tafnay bang. Yu Israel e ra koled bang e but’ ni bay u ba’ ni ngek e lul’ ni Jordan. Giney e but’ e kan mu’ i ognag ngak e genong rok Ruben, nge Gad, nge baley ko Manasseh, machane dabisiy ni ngar ayuweged e tin ba’aram e genong nu Israel ngar koled ga’ngin yang yu Kanaan. Genong rok Judah, Efraim, nge ley ni ngal e Manasseh e ra gurgad ngar pired ko yuyang ni taferad e binaw. Gin kabay ko fa gi binaw e ni lekag ngan th’ethab, ma aram me dag Somol ngak Joshua e yuyang ni nge par rok reb e genong nge reb ko fapi genong nike magach. Pi Levite e de yag bang e binaw ngorad nib ga’ ni bod e tin ba’aram e genong, ni bochan e yad e tin ba mal’eag e tapigpig rok Somol. Machane ni pi’ ngorad yochi binaw ni kem’ay i toy nib achig nib wer u daken e re nam nem.
U tungun e re ke babyor ney e l’agruw yay ni welthin Joshua riy ni ri be yog fane rib manigil Somol ko girdi’ nu Israel. Me yog Joshua ban’en ko girdi’ ni ngar athamgiliyed ni ga’ar: “Mu liyorgad ku SOMOL, mi gimed fol rok, mi gimed par ni gimed ba yul’yul’ ngak ni gubin ngiyal’.” (24:14)
Gathon e Re Ke Babyor Ney
Joshua ni mang ir e i gafaliy yu Israel 1:1–9
Yu Israel ni ra th’abed e lul’ nu Jordan ngar koled yu Jeriko 1:10—6:27
Akan ni togoplow ku Somol 7:1–6
Fare mael ntay u Ai 8:1–35
Girdi nu Gibeon nra ban niged e pi tayugang’ nu Israel 9:1–27
Joshua ni non ko yal’ nge duwgil u tagil’ 10:1–15
Yu Israel nra feked ga’ngin yang ko but’ nu Kanaan 10:16—12:24
Nam nde yag ni kol yu Israel 13:1–7
Binaw ntafen boch e genong ko ba’ ni ngek e Jordan ni Moses e duwgiliy 13:8–33
Binaw ntafen e pi genong ko ba’ ni ngal e Jordan 14:1—19:51
Yochi binaw ni tagil’ e ayuw ko girdi’ nike thang e pogofan 20:1–9
Yochi binaw ntafen e genong ko Levite 21:1–45
Pi genong nu ba’ ni ngek nra sulod nga taferad 22:1–34
Welthin ni tay Joshua ko tomur, nge yam’ ni tay 23:1—24:33
1
Got e yog ngak Joshua ni nge kol yu Kanaan
1 Nap’an ni yim’ Moses ni tapigpig rok SOMOL, me ga’ar SOMOL ngak Joshua, ni ir e i ayuweg Moses ko maruwel, me Nun e chitamngin, 2 “Tapigpig rog i Moses e ke yim’. Ere mfal’eg rogom e chiney, ni gur nge urngin e girdi’ nu Israel, ngam th’abed e lul’ ni Jordan ngam marod ngalan fare nam ni ir e nggu pi’ ngomed. 3 Ni bod ni gog ngak Moses, ni kug pi’ ngomed e girdi’ rog ga’ngin fare nam ni bay mmarod u daken. 4 Ma mathil romed e yan i mus ko fa gi ted ni desert ni bay u lan e yimuch me yan i mada’ ko fapi Burey nu Lebanon ni bay ngalan e lel’och; me tabab ko fare lul’ ni ba ga’ ni Eufrates fithingan ni bay ko ngek, nge ga’ngin yang e nam rok e pi Hittite nge yib i mus ko fare gi Day ni Mediterranean ni bay ko ngal. 5 Joshua, dariy be’ nrayag rok ni nge gel ngom u n’umngin nap’an e yafos rom. Bay gu un ngom ni bod rogon ni ug un ngak Moses. Mar dab gu pagem.Deu 31:6, 8; Heb 13:5 6 Mu par ni gab gel ma dab mu rus, ya gur e bay mu pow’iy e pi girdi’ ney nge yag ngorad e re nam nem, ni ir e gog ngak pi chitamangirad ni bay gu pi’ ngorad. 7 Machane mu par ni gab gel, mar dab mu rus, ma ngam guy rogon ni ngu’um fol u urngin fapi Morochiyel ni pi’ e tapigpig rog i Moses ngom. Dab mpag bochiyang riy ma aram e demturug e gin’en ni ga ra yan ngay ma rayag rom e tin ga be muruwliy. 8 Thangri dab mu pag talin fare babyor ko Motochiyel, thingar um fil ni rran nge nep’, ma ngam guy rogon ngu’um rin’ urngin ban’en ni bay riy ni kan yoloy. Ma aram e ra fel’ rogom ma ga ra man’og. 9 Mu tay u wun’um ni kugog ngom ni ngam par ni ga ba gel ma dab mu rus! Dab mu tamdag ma dabi mulan’um, ya Gag, SOMOL ni Got rom, e gu bay rom ko yungi n’en ni bay um man riy.”
Joshua ni yog ko girdi’ e n’en ni ngar rin’ed
10 Ma aram me ga’ar Joshua ngak e pi’in yad ma yog e thin, 11 “Mmarod u lan e gin’ey ni kad n’ufed e pi tent rodad riy nge lungumed ngak e girdi’, ‘Mu fal’eged rogon e chugum romed, ya ka dalip e rran ma aram e ngam th’abed e lul’ ni Jordan nga ba’nem ngam koled fare nam ni bayi pi’ SOMOL ni Got romed ngomed.’ ”
12 Me ga’ar Joshua ko ganong rok Ruben nge Gad nge baley e ganong rok Manasseh,Jos 22:1–34; Num 32:4–22 13 “Mu tafinay niged e tin ni yog Moses ni tapigpig rok SOMOL ngomed, ni SOMOL ni Got romed e bayi pi’ e re nam ney ni bay nga ba’ ni ngek e Jordan ni ngam tafned. 14 Pi le’engimed, nge pifakmed, nge gamanman romed e bay ra pired u roy, ma pi salthaw romed ni kar fal’eged rogorad ko mael e bay ra m’onod rok piyu Israel ni fan e ngar ayuwegedrad 15 ma nap’an ni bay ra koled e re nam nem nike pi’ SOMOL ni Got romed ngorad, ma aram e bay mu sulod ngam pired ko gi romed e binaw ni pi’ Moses ni tapigpig rok SOMOL ngomed ko gin’ey ni bay nga ba’ ni ngek e Jordan.”
16 Miyad fulweg ngak Joshua ni lungurad, “Bay gu rin’ed urngin e tin kamog ngomad, ma gamad yan ko gin’en ni kam pi’mad ni nggu warod ngay. 17 Bay ug folgad rom ni bod rogon ni ug folgad rok Moses ni gubin ngiyal’ ni fa’anra i un e SOMOL rom i Got ngom ni bod ni i un ngak Moses! 18 Demturug e tin ga ra yog ma en nra togopluw ngay ara de fol riy e ngan li’ ngem’. Ere mu par ni ga ba gel ma dab mu rus!”
DRAFT VERSION — Proofreading in progress