1 I SOMOL e pi’ e pi gafal ni ba’aray ngak Moses 2 ni fan ngak e girdi’ nu Israel. Tomuren medlip e rran nike gargaleg be’ ni bpin bochi pagel, ma be par nib ta’ay, ni ku aram rogon nra par nib ta’ay u nap’an nib pal u yu pul. 3 Ma re rran ni gaman e meruk fen ngay, ma fare tir e thingar ni maad’adnag ni bod ni yog e motochiyel rok Moses. 4 Ma aram e ngki par fare pin ni guyey nge dalip e rran mfini arow u racha’en ni i yan; thangri dabi math nga ban’en nib tabgul ara yan nga langgin fare Tent nib thothup nge taw nga nap’an ni ka ni aroweg.

5 Ma ragag nge aningeg e rran nra par be’ ni bpin nib ta’ay u nap’an nike gagaleg fak ni bochi pin, ni ku aram rogon nra par nib ta’ay u nap’an nib pal u yu pul. Ma aram e ngki par fare pin ni nel’ i ragag nge nel’ e rran fini arow u racha’en ni i yan.

6 Ma nap’an nra gaman nap’an ni arme ke arow fare pin, ni demturug ko ba pagel fak fa bpin, ma thingri fek ba fak e saf ni ta’reb e duw rok i yan ko prist nga langan e garog ko fare Tent u p’eowchen SOMOL ni ngan fanay ko maligach ni mo’oruf nge reb e bulogol ara ba dove ni maligach ko denen. 7 Ma fare prist e nge pi’ e maligach rok fare pin ngak SOMOL ma nge bangbengnag rogon fare pin ni nge arow, ma aram e ke be’ech. Irera’ e n’en thangri rin’ be’ ni bpin u tomuren nike garagel.

8 Fa’anra fare pin e dabyag ni pi’ puluwon reb e fak e saf, ma thangri fek i yib l’agruw i bulogol ara l’agruw e dove, ni reb riy e fen e maligach ni mo’oruf ma reb e maligach ko denen, ma fare prist e nge bangbengnag rogon ni nge arow fare pin, ma aram e ke be’ech.