GOSPEL ROK
MATTHEW
Fare Gospel rok Matthew e be weliy fare thin ni bfel’ ni murung’agen Jesus ni ir fare Tabiyul. U daken Jesus e tay Got nga tagil’ e tin ni micheg ngak girdi’en ko bin Kakrom e M’ag. Re Thin Ni Bfel’ ney e fan ngak e girdi’ nu fayleng ni polo’, ma gathi kemus ni fan ngak e girdi’ nu Israel, ni yad fapi girdi’ ni i par Jesus u fithik’rad, ya ni gargeleg u Israel.
Som’on ko Gospel rok Matthew e bay riy murung’agen Jesus nni gargeleg, ma migid e bay riy murung’agen e tawfe ntay ngak Jesus nge murung’agen mo’onyan’ ni i guy rogon ni nge denen Jesus. Ma aram e ku bay riy rogon e machib ni i tay Jesus u Galile ma be golnag e pi’in nib m’ar u rom. Ma migid riy e bay murung’agen e milekag rok Jesus u Galile nga Jerusalem, nge pin’en ni buch ko bin tomur e wik ko par rok Jesus u fayleng, nge murung’agen nni kuruthnag nge fos ko yam’ ni tay.
Re Gospel rok Matthew ney e be dag ni Jesus e ir fare Sensey nib th’abi fel’, ni bay mat’wun ni be weliy fan e Motochiyel rok Got, ma be fil murung’agen e gagiyeg rok Got ngak e girdi’.
(1) Yu guruy ni 5–7 e bay riy murung’agen e machib ni tay Jesus u daken e burey, ni aram e be fil ngak e pi’in kar manged girdi’en e gagiyeg rok Got rogon e wok ni bfel’ nib m’agan’ Got ngay, nge tin nthingar rrin’ed, nge tin nra fel’ rogorad riy, nge gin ni yad be sor ngay ni aram e yafos ndariy n’umngin nap’an. (2) Guruy ni 10 e bay riy murung’agen Jesus ni be fil ngak fa ragag nge l’agruw i gachalpen urngin e tin ni bay fan ko maruwel rorad. (3) Guruy ni 13 e bay riy e fanathin ni murung’agen e gagiyeg rok Got. (4) Guruy ni 18 e be weliy rogon nma ngongol e pi’in kar manged gachalpen Jesus. (5) Guruy ni 24–25 e be weliy murung’agen e tin tomur e rran ko re fayleng ney nge wub ni bay tay Kristus.
Tin ni bay riy
Gargel ntay ngak Jesus nge fithingan e pi ga’ rok ni tabab rok Abraham 1:1—2:23
Machib nge tawfe ni i tay John nma tawfe 3:1–12
Tawfe ntay ngak Jesus, nge mo’onyan’ ni i guy rogon ni nge denen Jesus 3:13—4:11
Jesus ni be machib ma be ayuweg e girdi’ nu Galile 4:12—18:35
U Galile nga Jerusalem 19:1—20:34
Bin tomur e wik ni immoy Jesus u Jerusalem nge pi binaw nib chugur ngay (21:1—27:66)
Fos ko yam’ ni tay Jesus nge rogon ni i m’ug u fithik’ girdi’en 28:1–20
1
Babyoren e pi ga’ rok Jesus Kristus
(Luke 3:23–38)
Ireray babyoren e pi ga’ rok Jesus Kristus, ni be’ ni owchen David, me David e be’ ni owchen Abraham.
I Abraham e chitamngin Isak; me Isak e chitamngin Jakob; me Jakob e chitamngin Judah nge pi walagen Judah. Judah e chitamngin Perez nge Zerah (ma chitiningrow e Tamar); Perez e chitamngin Hezron; me Hezron e chitamngin Ram; me Ram e chitamngin Amminadab; me Amminadab e chitamngin Nahshon; me Nahshon e chitamngin Salmon; me Salmon e chitamngin Boas (me Rahab e chitiningin); me Boas e chitamngin Obed (me Ruth e chitiningin); me Obed e chitamngin Jesse; me Jesse e chitamngin David ni Pilung.
Me David e chitamngin Solomon (ni chitiningin e leengin Uriah); Solomon e chitamngin Rehoboam; me Rehoboam e chitamngin Abijah; me Abijah e chitamngin Asa; me Asa e chitamngin Jehoshafat; me Jehoshafat e chitamngin Joram; me Joram e chitamngin Uzziah; me Uzziah e chitamngin Jotham; me Jotham e chitamngin Ahaz; me Ahaz e chitamngin Hezekiah; 10 me Hezekiah e chitamngin Manasseh; me Manasseh e chitamngin Amon; me Amon e chitamngin Josiah; 11 me Josiah e chitamngin Jekoniah nge pi walagen Jekoniah, ko fa ngiyal’nem ni fa’an nni fek piyu Israel nga Babylon.
12 Ma nga tomuren ni kan fek piyu Israel nga Babylon me Jekoniah e chitamngin Sealtiel; me Sealtiel e chitamngin Zerubbabel; 13 me Zerubbabel e chitamngin Abiud; me Abiud e chitamngin Eliakim; me Eliakim e chitamngin Azor; 14 me Azor e chitamngin Zadok; me Zadok e chitamngin Akim; me Akim e chitamngin Eliud; 15 me Eliud e chitamngin Eleazar; me Eleazar e chitamngin Matthan; me Matthan e chitamngin Jakob; 16 me Jakob e chitamngin Josef, me Josef pumo’on rok Maria, mi Maria e chitiningin Jesus ni yibe pining Messiah ngak.
17 Ere ragag nge aningeg e mfen ko ba’ ni matam, ni chitamangiy nge pifakay ni pumo’on ni mus rok Abraham nge yib i mada’ ngak David, ma ragag nge aningeg rok David nge yib i mada’ ko ngiyal’ nni fek e girdi’ riy nga Babylon, ma ragag nge aningeg ko ngiyal’nem nge yib i mada’ ko ngiyal’ nni gargeleg fare Messiah riy.
Jesus Kristus nni gargeleg
(Luke 2:1–7)
18 Ba’aray rogon nni gargeleg Jesus Kristus. I Maria ni chitiningin Jesus e nduwgiliy ni ngi i par ma yow ra mabgol Josef ba ngiyal’, machane dawor ra mabgolgow me pir’eg Maria rok nike diyen u gelngin fare Kan Nthothup. 19 Me Josef ni ir e nge mang figirngin e be’ ni gubin ngiyal’ mma rin’ e tin nib mat’aw; ere dabun ni nge kirebnag thin Maria nga fithik’ e girdi’, ma aram me finey ni ngar weargow ni dabi nang be’. 20 Ma nap’an ni ka be leamnag ni aram rogon, me mol me m’ug ba engel rok Somol ngak u malik’ay me ga’ar ngak, “Josef, ni gur owchen e ganong rok David, dab mu tamdag ni ngam fek Maria nge mang le’engim. Ya gelngin fare Kan Nthothup e ke yib ngak Maria ke diyen. 21 Ya bayi gargeleg bochi pagel ma ngam tunguy fithingan ni Jesus — ya bayi ayuweg girdi’en nge chuwegrad ko denen ni yad be ngongliy nge thapegrad ngak Got.”
22 Urngin e pin’ey ni yodoroy ni fan e nge yib i m’ug nib riyul’ e tin ni yog Somol u l’ugun e profet ni ga’ar, 23 “Fare pin ndawori nang e pumo’on e bayi diyen nge gargeleg bochi pagel, ma bay ni pining Immanuel ngak” (ni fan e re ngachal nem e, “Bay Got rodad”).
24 Ma fa’ani od Josef me rin’ fa tin keyog fare engel rok Somol ngak ni nge rin’, ma aram me leengiy Maria. 25 Machane me falnag Josef ir rok Maria nge yan i mada’ ko ngiyal’ ni gargeleg Maria fare tir riy. Me tunguy Josef ngachalen fare tir ni Jesus.