28
Jesus ni fos ko yam’
(Mark 16:1–10; Luke 24:1–12; John 20:1–10)
Ma tomuren e Sabbath, nnap’an ni be puf e woch ni kakadbul ko rofen ni madnom, me yan Maria Magdalene nge yugu reb e Maria ni ngar guyew fare low ko yam’. Mi yigi yib ba durru’ ni ba ga’; me yib ba engel rok Somol u tharmiy nga but’ nge lulubiy fare gaf i malang nge chuw u langan fare low, me par nga daken. Ma be galgal ni bod ram’en e uluch ma mad rok e rib wechwech ni bod e ayis nma mul u lang nga but’. Me yib e tamdag nib gel ngak fapi cha’ ni yad be matnag ngu’ur t’on gad mranod ra pired ni bod rogon e girdi’ ni kem’.
Me ga’ar fare engel ngak fa gali ppin, “Dab mu tamdaggow, gu manang ni kam bow ni ngam guyew Jesus, ni fa’anem nrichibiy ko kuruth. Ma daki moy u roy; ya ke fos ko yam’, ni bod rogon ni yog. Mirew ngaray ngam guyew e gin ntay ngay. Ere mu gurgow e chiney ngam marow nga mognew ngak pi gachalpen ni nge lungumew, ‘Kan faseg ko yam’, ni chiney e ke m’on romed nga Galile; nu rom e bay mu guyed riy!’ Dab mpagew talin e n’en ni kugog ngomew.”
Ma aram miyow gurgur ngar chuwgow ko fare low ni kar tamdaggow, machane kar felfelan’gow, miyow mil ngranow rognew ngak pi gachalpen.
Miyow gin ma keb Jesus ngorow me ga’ar, “Nge yib e gapas ngomew.” Miyow yib ra parawgow nga but’ u p’eowchen miyow kol e rifrif u ay ngar siro’gow ngak. 10 Me ga’ar Jesus ngorow, “Dab mu tamdaggow, marow nga mognew ngak pi walageg ngranod nga Galile, ya bay ra guyed gag u rom.”
Thin ni yog girdi’en e matnag
11 Ma nap’an ni yan fa gali ppin, me sul boch fapi salthaw ni ur matnagiyed fare low ngalan e binaw ngar weliyed e tin ni kar guyed ngak e pi tolang ko prist. 12 Me mu’ulung e pi’in tolang ko prist nge pi’in pi’ilal ngar puruy’gad; miyad fek e salpiy ni pire’ ngar pi’ed ngak fapi salthaw 13 me lungurad ngorad, “Nga mogned ni yib pi gachalpen ra iringed downgin nneap’ ni kam molod. 14 Ma fa’anra chey ni nang am e re bugithin ney, ma bay gguyed rogon nggu yal’uwegned u wan’ nge dabi l’ag e thin ngomed.”
15 Me fek fapi matnag fare salpiy miyad rin’ e tin kanog ngorad. Ere ke yan i mada’ ko bin daba’ e rran ma ireram e re morung’ag ni be wereg e girdi’ nu Israel i yan.
Jesus ni m’ug ngak pi gachalpen
(Mark 16:14–18; Luke 24:36–49; John 20:19–23; Acts 1:6–8)
16 Me yan fa ragag nge ta’reb i gachalpen Jesus ko fare burey ni bay u lan yu Galile ni ir e keyog Jesus ngorad ni ngranod ngay. 17 Ma fa’anra guyed Jesus miyad paraw nga but’ u p’eowchen, ni yugu aram rogon ni bay boch i yad ni i maruwar Jesus u wun’rad. 18 Me chuchugur Jesus ngorad me ga’ar ngorad, “Kan pag fan urngin ban’en ngog u tharmiy ngu but’. 19 Ere mmarod ngak girdi’en e pi nam u gubin yang ngam pingeged yad ngar manged pi gachalpeg, mi gimed tawfe nagrad nga fithingan e Chitamangiy nge Fak nge fare Kan Nthothup, 20 mi gimed fil ngorad rogon ni ngu’ur folgad u gubin e tin kugog ngomed ni ngu’um rin’ed. Ma dab mpaged talin ni gubin ngiyal’ ma gu bay romed, nge yan i mada’ nga tomuren e fayleng.”