BABYOR NI
NEHEMIAH
Murung’agen e Re Ke Babyor Ney
Re ke babyor ney e rayag ni ngak ki’eg nge yag aningeg guruy riy: 1) Sul ni tay Nehemiah nga Jerusalem, ko gin’en ni l’oeg fare pilung nu Persia ni nge yan ngay nge gagiyegnag yu Judah. 2) Fare yoror ni malang nib liyeg e binaw nu Jerusalem nni ubung bayay. 3) Motochiyel rok Got ni be’eg Ezra ngak e girdi’ me weliy e girdi’ e denen rorad ngak Got. 4) Ku boch banen ni i rin’ Nehemiah u nap’an nib governor u Judah. N’en nri be gagyelnag e re ke babyor ney e Nehemiah ni be’ nri ma toer ngak Got ma rib ta meybil.
Gathon e Re Ke Babyor Ney
Nehemiah ni sul nga Jerusalem 1:1—2:20
Fare chabog ni yoror nu Jerusalem nni ubung bayay 3:1—7:73
Fare Motochiyel nni be’eg, nge fare M’ag nni be’echnag 8:1—10:39
Ku boch ban’en ni rin’ Nehemiah 11:1—13:31
1
Magafan’ rok Nehemiah ngak yu Jerusalem
1 Thin rok Nehemiah nib mo’on ni fak Hakaliah.
U lan fare pul ni Kislev*KISLEV: Bin mereb e pul ko kalendar ni Hebrew, ni tabab u lukngun e November nge mada nga lukngun e December. ko duw ni reliw’, ngiyal’nem e gu bay u Susa ni aram e tochuch. 2 Hanani, ni reb fapi pumo’on ni walageg, e yib i taw ngaram ni yad boch e pumo’on nrabad u Judah, mu gu fith selpen yu Jerusalem ngorad nge selpen e pi Jew ni kar suled u kalbus u Babylonia. 3 Miyad ga’ar ngog. “Pi’in nra mageygad ndar m’ad u lan binaw nra milgad u kalbus e yad be gafgow, ma yi be changar ngorad nga but’; ma fare yoror nu Jerusalem e ke puth nga but’, ma pi garog riy e ke mo’oruf nga but’. 4 Fa’an gu rung’ag e pi thin ney mug par nga but’ ngu yor, ere ug yor ni in e rran; ma aram mugu pag e abich mugu meybil u p’eowchen Got nu tharmiy. 5 Ni lungug, “SOMOL ni Got nu tharmiy, gur Got e th’abi ga’ gelngim ma gab Got ni yima rus ngom, me gur e ga ma tay e m’ag u gil’ ni mu ngongliy u thilmed e pi’in yad ba t’uf rom, ni pi’in ni ga bt’uf rorad ma yad ma fol ko tin kamu tay chiylen. 6 SOMOL, mu changar ngog ngam telim ko meybil rog ni gu be tay ni rran nge nep’ ni fan ngak e tapigpig rom ni er yu Israel. Nggog ngom ni gamad piyu Israel e gamad be denen. Pi chitamngig ni kakrom e ur denengad ma ku er rogog. 7 Ngongol romad e ba togopluw ngom, ma da ug folgad ko thin rom. Fapi motochiyel ni mpi’ ngomad u pa’ Moses ni tapigpig rom e da ug folgad riy. 8 Mu leamnag e tin mog ngak Moses ni lungum, ‘Ra um pired yu Israel ndamur yul’yul’gad ngog ma bay gu weregmed ko pi nam i yan. 9 Ma fa’an gimed ra sul ngog ngu’um folgad ko tin gog ngomed ni ngu’um rin’ed, ma gu ra fulwegmed ko gin gag e kug turguy ni ngu’un liyor ma yibe meybil ngog riy, ni yugu aram rogon ni kam wergad kam mada’gad ko gin ni mus e fayleng ngay.’
10 “SOMOL, pi girdi’ ney e tapigpig rom, ni pi girdi’em. Gelngim nib gel nge feni sorom e mu chowegrad ngay. 11 Mu telim ko meybil rog nge meybil rok urngin e tin ni kabay e tapigpig rom ni yad ba’adag ni ngu’ur ted fam. Mu man’og nigeg e daba’, ma ga gagiyegnag e en ni pilung nge runguyeg.”
Ngiyal’nem e gag e ba milfan e wayin ko en pilung ngog.
*1:1 KISLEV: Bin mereb e pul ko kalendar ni Hebrew, ni tabab u lukngun e November nge mada nga lukngun e December.
DRAFT VERSION — Proofreading in progress