1 I SOMOL e non ngak Moses u lan e ted u Sinai ko bin m’on e pul ko duw nl’agruw nga tomuren nike chuw piyu Israel u Egypt. Ni ga’ar,Exo 12:1–14, 21–28 2 “Mu pag e girdi’ nu Israel ngar madnom niged e paluk’af u ngil’an ni kan turguy. 3 Rofen ni ragag nge aningeg ko re pul ney ni blayal’, ma girdi’ nu Israel e ngar madnom niged fare Paluk’af nri bod rogon urngin e pi gafal riy nge yalen ni yima rin’.” 4 Aram me yog Moses ngak e girdi’ ni ngar madnom niged fare Paluk’af, 5 me yan i blayal’ ko rofen ni ragag nge aningeg ko bin m’on e pul miyad rin’ ni aramrogon u lan e ted u Sinai. Fapi girdi’ e rin’ed urngin ban’en ni bod ni yog SOMOL ngak Moses.

6 Machane immoy boch e pumo’on ni yad ba ta’ay ni bochan e kar mathgad nga downgin e yam’, ma de yag ni ngar uned ko fare madnom ko Paluk’af e rofen nem. Mranod ngak Moses nge Aron 7 me lungurad, “Gamad ba ta’ay ni bochan e kug mathgad ko yam’, machane mangfan nda ni unegmad ngak e tin kabay yu Israel nggu pi’ed e maligach romad ngak SOMOL?” 8 Me fulweg Moses ni ga’ar, “Mu son gad nge taw ko ngiyal’ nike yog SOMOL ngog rogon e tin ngan rin’.

9 Me yog SOMOL ngak Moses 10 ni nge ga’ar ko fapi girdi’ nu Israel, “Nap’an nra ta’ay bigmed fa reb e pi’in owchemed ni bochan e ke math nga ba yam’ ara bay u milekag nib palog, ma kub’adag ni nge un i madnomnag e Paluk’af, 11 mrayag ni nge madnomnag u lan e bin migid e pul, ko rofen ni ragag nge aningeg ko pul nl’agruw ni nike blayal’. Gimed ra madnomnag ko flowa ni kan lith ndariy e is riy nge herb nib mo’oy. 12 Dab mu ted boch fapi ggan nge af ko bin migid e kadbul ma dab mu t’ared reb i yilen reb fapi gamanman. Mmadnom niged fare Paluk’af nrogon yalen ni ngan rin’.Exo 12:46; Jhn 19:36 13 Machane en nib be’ech nde ta’ay ma demoy u milekag mde un i madnomnag e Paluk’af, e yira n’ag ndabki mang girdi’eg, ni bochan e de pi’ fare maligach ngog ko ngiyal’ ni nge pi’ riy. Thangri gafgow u wenegan e denen rok.

14 “Fa’anra bay be’ u reb e nam u fithik’med ni ba’adag ni nge un i madnomnag e Paluk’af, ma thangri un i madnomnag ni bod rogon e pi gafal nge yalen ni yima rin’ riy. Ta’ab motochiyel e nge fol gubin e girdi’ riy, ndemturug ko be’ nu Israel ara be’ u yug reb e nam.”

15-16 Rofen nn’uf ngalang fare Tent rok SOMOL, me yib bangi manileng i ing. Ra nep’ ma bod ram’en e nifiy. 17 Ma nap’an nra langlang e re gi manileng nem u daken fare Tent ngalang, me pug piyu Israel e pi Tent rorad ngar milekaggad, ma nap’an nra sul nga but’, miyad n’uf e pi Tent rorad bayay. 18 Aray rogon ni i dag SOMOL ngak piyu Israel e ngiyal’ ni ngar milekaggad nge ngiyal’ ni ngar n’ufed e pi Tent rorad. N’umngin nap’an ni be par fa gi manileng u daken fare Tent, ma aram e ka be par piyu Israel ko fa gin’em. 19 Ma ra par fa gi manileng u daken fare Tent nib n’uw nap’an, miyad fol rok SOMOL ni dab ra milekaggad. 20 Yu ngiyal’ e ma par fa gi manileng u daken fare Tent nri in e rran; ere SOMOL e be dag ngorad ko ka yad be par ko gin ni kar n’ufed e Tent rorad riy fa ngar milekaggad. 21 Ba’ yu ngiyal’ nma par e gi manileng nem ni kemus ni blayal’ nge yan i mada’ ko kadbul, ma fa’ani muf ngalang miyad milekag. Demturug ko rran ara nep’ ma yugu ra muf fare gi manileng u daken fare Tent ngalang, miyad milekag. 22 Demturug ko l’agruw e rran, fa reb e pul, ara reb e duw, ma n’umngin nap’an ni be par fa gi manileng u daken fare Tent ma aram e ka be par piyu Israel ko fa gin’em; machane nap’an nra muf ngalang miyad milekag. 23 Yad ma tal ngar n’ufed e Tent rorad ma yad ma pug e Tent rorad ngar milekaggad nrogon ni be yog SOMOL ngorad u l’ugun Moses.