25
Ba meybil ni nge pow’iyey SOMOL me mang manaf
Gu be meybil ngom, i gur SOMOL;
gu be par nib pagan’ug ngom, ya gur e Got rog.
Mu ayuwegneg nge dab gu waer nge siy gu tamra’;
dab mpag e to’ogor rog ngar giriggad ngog!
Pi’in yad be toer ngom e dab ra waergad,
machane pi’in nib machreg ni yad ma togopluw ngom e yad ma waer.
 
Got, mfil ngog e tirom e kanawo’;
mu dag ngog nggu nang.
Mfil ngog ngu’ug par ni gu ba yal’uw ko thin rom;
ya gur e Got rog, ni ga ma aywegeg.
Pagan’ug ngom ni gubin ngiyal’.
 
SOMOL, gu leamnag fanam gol nge rogon fare t’ufeg rom ni dabimus
ni kam dag ni kab kakrom i yib.
Mu n’ag fan u wun’um e pi denen rog nge tin ug oloboch riy ko ngiyal’ ni ku gub pagel;
SOMOL, dab mu pag tilig,
ya ga ba gol ma t’ufeg rom e dabimus!
SOMOL e mmat’aw ma bfel’;
mma fil ngak e pi tadenen e kanawo’ ni ngar leked.
Pi’in nib sobut’an’rad e ma fekrad i yan u daken e bin mat’aw e wo’,
mma fil ngorad e tin ir e mm’agan’ ngay ni ngar rin’ed.
 
10 Ma pow’iyrad i yan ni yad ba t’uf rok ma ba yul’yul’ ngorad,
ni urngin e pi’in yad ma falwok ko motochiyel rok ma yad ma fol ko tin ni yog.
 
11  SOMOL, mu n’ag fan u wun’um e denen rog, ni bod ni mog ni ga ra rin’,
ya denen rog e bpire’.
12 Pi’in yad ma fol rok SOMOL e yad ra fil rok e re wo’ ni ngranod riy.
13 Ma gubin ngiyal’ ni yad ra par ni bfel’ rogorad,
ma pifakrad e bay ra tafned e nam.
 
14  SOMOL e tafager rok e pi’in yad be fol rok,
ma micheg ngorad e m’ag u thilrad.
 
15 Gubin ngiyal’ ni SOMOL e gu ma sap ngak ni nge ayuwegneg,
me ir e ma lufeg ko oloboch.
16 Mu sap ngog, SOMOL, ngam runguyeg,
ya ma’agirag gag ma kug gafgow.
17 Mu chuweg e magafan’ rog ni kug aw nga fithik’,
ma ga chuwegneg u fithik’ urngin e oloboch rog.
18 Mu leamnag urngin e gafgow nike tay lanin’ug nge gafgow ni kug tay,
ma ga n’ag fan urngin e denen rog.
19 A mu guy urngin e to’ogor rog;
a mu guy gelngin e fanenikay ni yad be tay ngog!
20 Mu yoror rog ngam ayuweg e pogofan rog;
mu teg ndab gu waer,
ya ku gub ngom ni nggu naf nga tan pa’am.
21 Fanag mat’aw nge fanag yul’yul’ e nge mang yoror rog,
ya gur e ke pagan’ug ngom.
 
22 A Got, mu chuweg e girdi’ rom
nu Israel ko urngin e gafgow rorad ni kar pired nga fithik’!