49
Rib balyang ni yima toer ko fel’ rogon
Mu telmed urngin e girdi’!
Motoyilgad e girdi’ u gubin yang,
pi tolang nge pi sobut’,
nge pi fel’ rogon nge pi gafgow.
Ba tamilang lanin’ug;
bay ug weliy e thin nib gonop.
Bay gu tiyan’ug nga ba salepow,
nggu weliy fan ni gu be chubeg e musik ni harp.
Dagur rus ko ngiyal’ ni gu be par u thathren e riya’,
ni ngiyal’ nike yon’eg e pi to’ogor nga longob,
ni girdi’ ni kireb ni be pagan’rad ko fel’ rogon rorad,
ni yad ba uf ko machaf rorad nib yo’or.
Dabyag rodad ni nge mang gadad e da biyuliyed gadad,
dabiyag ni ngad pi’ed puluwon e pogofan rodad ngak Got,
ya puluwon e pogofan ko girdi’ e yugub pag feni tolang.
Ya n’en ni gadad ra pi’ ni puluwon e dabi gaman
ni nge talegdad ko yan nga low
ngad pired ni dab da m’ad bi’id.
10 Demutrug be’ ma rayag ni nge guy ni mus ko girdi’ nib gonop ma be yim’,
ni ta’reb rogon ko girdi’ nib balyang ma ba minan’.
Yad gubin ni yad be pag e pin’en ni bay rorad ni pire’ nga pa’ e pi’in owcharad.
11 Yad be leamnag ni pi naun rorad e bayi par ni dariy n’umngin nap’an;
nu rom e bay ra pired riy ni gubin ngiyal’
yad be tunguy fithingrad ko yungi binaw ntaferad.
12 Feni sorodad e dabiyag ni nge talegdad ko yam’;
ya ri bay dm’ad ni bod e gamanman.
13 A mu guy e n’en ke rin’ e pi’in yad e yad be toer ngorad,
nge n’en ke buch rok e pi’in ke nemow u wun’rad e pin’en ni bay u pa’rad ni ka ra fla’abgad riy.
14 Ke m’ay i turguy ni ngarm’ad ni bod e saf,
ma yam’ e ir e bayi mil farad ngak.
Ma pi’in nib mmat’aw e yad ra gel ngorad,
ma be par dowrad ni be wod ko gin ni kan k’eyagrad riy
nib orel ko tabinaw rorad!
15 Machane Got e ra ayuwegneg;
bayi chuwegeg u gelngin e yam’.
16 Ngiyal’ nra yo’or ban’en rok be’ ma dabi magawon nga lanin’um,
nge ngiyal’ nike mun daken e fel’ rogon rok;
17 ya ra yim’ ma dabiyag ni nge fek nge un ngak;
ya fel’ rogon rok e dabi un ngak nga low.
18 Mus ni fa’anra be par be’ nike nemowan’ ngak ko biney e tamilang,
ma yibe pining e sorok ngak ni bochan e mon’og ni be tay,
19 ma ri bayi yan nge yan i cheag ko pi chitamngin kakrom ni karm’ad,
ko gin ni ba lumor riy ndariy n’umngin nap’an.
20 Feni sorodad e dabiyag ni nge talegdad ko yam’;
ya ri bay dm’ad ni bod e gamanman.