65
Sorok nge Pongmagaer
1 A Got, girdi’ e thingar ur pininged e magaer ngom u Zion
miyad pi’ ngom e tin rmicheged ni bay ra pi’ed ngom,
2 ni bochan e ga ma fulweg taban e meybil.
Urngin e girdi’ e ngarbad ngom
3 ni bochan e denen rorad.
Pi kireb romad e ke gel ngomad,
machane ka mu n’ag farad.
4 Ba felan’ e pi’in ni kam mel’egrad,
ni kam fekrad ni ngar pired u lan e naun rom nib thothup!
Bayi gaman u wun’mad e pin’en ni bfel’ ni bay ko naun rom,
ni aram fare Tempel rom nib thothup!
5 Taban e meybil romed ni ga ma fulweg e gel ni gamad ma tay ko mael,
ga be rin’ bogi ban’en ni yira ngat ngay nga mu ayuwegmad.
Girdi’ u gubin yang u fayleng,
nge girdi’ ni yad mmal’af nga ba’nem e pi regur e gur e pagan’ rorad.
6 Kam tay e pi burey nga tagil’rad u daken gelngim,
ni ga be dag gelngim nib gel.
7 Ga ma mocha’nag e day nike cham,
nge lingan e n’ew ni be pil;
ma ga ma gapasnag e wagey ni be tay e girdi’.
8 Ke ngat e fayleng ni polo’
ni bochan e pi maang’ang ni ka mu ngongliy.
Ngongol rom e yi be garusnag ko felfelan’
u baraba’ e fayleng nge mada’ nga baraba’.
9 Ga be dag ni ga be ayuweg e but’ ko n’uw ni ga be pi’;
ga be fal’eg rogon be par nib yong’ol.
Ka mu suguy e pi lul’ ko ran;
ga be pi’ e woldug ko but’.
Irera’ rogon ni ka mu rin’:
10 ga be pu’og e n’uw nga daken e pi flang ni kan gi’ e but’ riy,
ga be tarannag;
ga be munguynag e but’ ko n’uw ni ga be pi’
be dammalnag e woldug.
11 Ga be gagiyegnag be yib e ggan ko woldug ni pire’ ni bochan e gab gol!
Gubin yang ni ga ra yan riy ma be yo’or ban’en riy!
12 Yungi ted nma kay e gamanman e pan riy e ke sug ko gamanman;
ma sigre’en e pi burey e ke sug ko felfelan’.
13 Ma yungi flang e ke sug ko saf,
ma yochi loway e ke suguy e wheat;
yad be tolul ma yad be tang ko felfelan’!
DRAFT VERSION — Proofreading in progress