109
Gun’gun’ ni tay be’ u fithik’ e gafgow
1 Got, gu be pining e sorok ngom; dab mu par ni kam th’abgulungam!
2 Girdi’ ni kireb nge pi sasalap e yad be cham ngog.
Yad be lifith e thin ni murung’ageg,
3 ma yad be yog e thin ni kireb ni murung’ageg,
yad be cham ngog ndariy tapgin.
4 Yad be togopluw ngog, ni yug aram rogon ni yad bt’uf rog
ni gu ma pi’ e meybil ni farad.
5 Yad be fulweg ngog e kireb ni taban e fel’
nge fananikan ni taban e t’ufeg.
6 Mu mel’eg boch e pi tapufthin nib kireb nge pufthinnag e to’ogor rog,
ma ga pag reb e to’ogor rok nge yog thibngin.
7 Mang e yug ni pufthinnag nge m’ug nib kireb e rok;
mang e yigi par ni mus ko meybil rok ma ba oloboch!
8 Mang e yigi pay nge math e fan rok;
mang e yigi fek be’ luwan ko maruwel rok!
9 Mang e yigi par pifak ni kanim’ rorad,
me par le’engin ni dakuriy figirngin!
10 Mang e yigi malethay pifak;
mang e yi gun tulufrad ko gin ke mogoth ni yad ma par riy!
11 Mang e fek e pi’in i tay e malfith ngorad urngin e tin bay rok,
mang e yib e pi milekag ngar feked urngin e tin i muruwliy.
12 Mang e yigi par ni dariy be’ nra gol ngak
ara ayuweg pifak ko ngiyal’ nike yim’ rorad.
13 Mang e yigi math mit e pi’in owchen,
mang e yigni pagtalin fithingan u lan e bin bayib e mfen.
14 Mang e yigi yib ngan’ SOMOL e kireb rok e pi ga’ rok kakrom,
me pag ni dabi n’agfan e denen rok e chitiningin bi’id.
15 Mang e yigi par SOMOL ni bay u wan’ e pi denen rorad,
machane mang e yugun pag tilrad!
16 Ya re mo’on nem e da i yib ngan’ ni nge gol’;
I gafgownag ma be thang e pogofan rok e pi’in gafgow,
nge pi’in bt’uf e ayuw rorad, nge pi’in ni dabyag ni ngar ayuwegedyad.
17 Ri ba’adag nma yibil ni nge buch wa’athan be’ — mang e yigi mang ir e buch wa’athan!
Dabun ni nge fal’eg wa’athan be’, mang e yigi dariy be’ ni fal’eg wa’athan!
18 Ka ri macham ngak nma yibiley be’ nga kireb, ni bod e mun mad;
mang e yigi rich e yibil rok ni kireb nga fithik’ i dow ni bod e ran
nge nga fithik’ e yil rok ni bod e gapgep.
19 Mang e yugur upunguyed ni bod e mad
me par u lukngun ni bod e leed ni gubin ngiyal’!
20 SOMOL, mu gechignag e pi to’ogor rog ni aram rogon —
pi’in yad ma yogneg nga dalib!
21 Machane gur SOMOL rog ni Th’abi Tolang, mu ayuwegneg ni bod ni kam micheg,
ma ga chuwegeg u fithik’ ni bochan feni manigil e t’ufeg rom.
22 Gu ba gafgow ma bt’uf e ayuw rog;
be amith fithik’ i lanin’ug.
23 Bay gu m’ay ngabang ni bod e taglul’ ni gonowrug;
ma ku gu un ko nifeng ni bod ba chachangeg.
24 Ke m’ay gelngin bugug ni bochan e uyngol;
kug par ni go’ bayach nge yil.
25 Nap’an nra guyeg e girdi’ miyad minmin ngog;
miyad chichingeg lolgerad u fithik’ e migrig.
26 A SOMOL ni Got rog, mu ayuwegneg;
ni bochan fare t’ufeg rom ni dabimus, mu ayuweg e pogofan rog!
27 Mu gagiyegnag e pi to’ogor rog ngar nanged
ni gur e cha’ ni ga be ayuwegneg.
28 Go manga yad ra yibilayeg, machane ga ra fal’eg wa’athag.
Mang e yigi waer e pi’in yad be gafgow nigeg,
me mang gag ni tapigpig rom e gu felan’.
29 Mang e yigi mathrow e pi to’ogor rog ko tamra’;
mang e yug ro’ned e tamra’ nga dakenrad ni bod ba wuru’ e mad nib n’uw.
30 Bay gu pining e magaer ngak SOMOL nib ga’ lamag;
bay gu pining e sorok ngak u fithik’ e girdi’ nike mu’ulung,
31 ni bochan e Ir e ma n’ufeg e pi’in ke gafgow
mma ayuweg e pogofan rorad u pa’ e pi’in kar turguyed e gechig rorad ni yam’.
DRAFT VERSION — Proofreading in progress