1 Immoy be’ ni girdi’ rok Naomi ni Boaz fithingan, ni bo’or ban’en rok ma ba’ ga’ fan, ni girdi’en figirngin Naomi ni Elimelek. 2 Me ga’ar Ruth ngak Naomi, “Mu pageg nggu wan nga milay’ nggu kunuy wom’ngin e barley nike pag girdi’en e maruwel ndar feked. Gu manang nra gu pir’eg reb e mo’on nra pageg nggu maruwel rok.”

Me fulweg Naomi ni ga’ar, “Fakag, mman.”

3 Ma aram me yan Ruth nga daken e milay’ ngi i lek keru’ e pi’in yad be maruwel, ni aram e be kunuy wom’ngin e barley ni kan pag u but’. Me yan i puluw nga bangi milay’ ni fen Boaz.

4 Me taw Boaz ni aram e ke yib u Bethlehem. Me ga’ar ngak fapi girdi’en e maruwel, “I SOMOL e ngi i par romed!” Miyad fulweg ni lungurad, “I SOMOL e nge ayuwegnem!” 5 Me fith Boaz e tapigpig rok ni be’ ni be tay murung’agen e pi’in yad be maruwel rok Boaz ni ga’ar, “Mini’ e fak e re rugod nem?” 6 Me fulweg fare tapigpig ni ga’ar, “I ir fare pin in be’ u bang ni fa’ani un ngak Naomi u Moab ngaray. 7 Be yog ngog ni nggu pag nge lek keru’ girdi’en e maruwel ngi i kunuy wom’ngin e barley. Ma ke maruwel ni kab kadbul ke mada’ ko chiney ma ke tal ni nge yan i gif buchu’uw nga naun u milay’.” 8 Me ga’ar Baoz ngak Ruth, “Fakag, mu telim ngog. Ngam tay ni kemus ni giney e milay’ e ngu’um kunuy wom’ngin e barley riy; mu par u roy ngu’um un ngak e pi’in rugod ko maruwel. 9 Mu yaliyrad ngam guy e gin yad be maruwel riy, ma ga par rorad. Kugog ngak e pi pumo’on ni yad be maruwel rog ni nge dab rabad ra magawon niged gur. Mra yib e belel ngom, ma ga yan mu unum e ran ko fapi rume’ ni kar suguyed ko ran.” 10 Me siro’ Ruth nge yan i math owchen ko but’, me ga’ar ngak Boaz, “Gur e ri gab gol ngog. Mangfan be’ ni nge gol ngak ba milekag?” 11 Me fulweg Boaz ni ga’ar, “Kanog ngog urngin ban’en ni kam rin’ ni fan ngak e chitiningin figirngim ni ka nap’an ni yim’ figirngim; ma kug nang rogon ni mu pag e chitamam nge chitinam nge nam rom nge rogon ni mub nga mub mu par nga fithik’ girdi’en reb e nam ni da mu nangrad. 12 Mang e yigi pi’ SOMOL puluwom ko tin ka mu rin’; mang e yigi pi’ SOMOL puluwom ni polo’, ni fare Got nu Israel, ni ir e ka mub ni ngam naf nga tan pa’!” 13 Me fulweg Ruth ni ga’ar, “Ri gab gol ngog; kam pi’ e athamgil nga lanin’ug ko thin ni ga be yog ngog nib munguy, ni yugu aray rogog ni de ta’reb tolngig ngak reb e pi tapigpig rom.”

14 Me taw nga nap’an e abich me ga’ar Boaz ngak Ruth, “Moy iray; ngam fek bang e flowa ngam lthag nga fithik’ e wayin nib mugnin ngam koy.” Ma aram me yan i un ngak girdi’en e maruwel ko par nga but’, me pi’ Boaz e grain ngak ni kan urfiy; me kay nge fos, me aw boch ni de m’ay rok. 15 Ma fa’ani sak’iy nge yan ni nge kunuy e grain, me ga’ar Boaz ngak e pi tapigpig rok, “Dab mu talaged ni mus ni fa’anra kunuy e grain ko gin kan yuthumnag kan ulunguy ngay. 16 Mu girngiyed yu pa’ e grain u fithik’ e tin kam thum niged ngam paged nge yib i fek; ma dab mu puwan’gad ngak.” 17 Ma aram mi i kunuy Ruth e grain u daken e gi milay’ nem nge yan i gonowrug; ma nap’an e mu’i pirdi’iy, ma gonpan rliw’ nge lal e pawn. 18 Me fek e tirok e grain nge sul ngalan binaw, me dag ngak e chitiningin figirngin urngin e grain nike kunuy. Miki pi’ ngak e ggan ni aw ko fare abich ni un ngay. 19 Me fith Naomi ngak ni ga’ar, “U uw e mu kunuy e grain riy e daba’? Milay’ rok mini’ e um kunuy e grain riy? Mang e yigi fal’eg Got wa’athan e re mo’on nike mit owchen rom!” Me yog Ruth ngak Naomi ni i kunuy e grain u daken e milay’ rok be’ nib mo’on ni Boaz fithingan. 20 Me ga’ar Naomi ngak, “Mang e fal’eg SOMOL wa’athan Boaz! I SOMOL e ma tay u gil’ e tin ke micheg ngak e pi’in nib fos nge pi’in karm’ad.” Me ul ul ngay nge ga’ar, “Re mo’on nem e gadad girdi’ ni rib chugur, ir reb e pi girdi’ ni yalen ni nge ayuwegdow.” 21 Me ga’ar Ruth, “Ma ku er rogon nike ga’ar ngog e ngu’ug un ngak e pi tapigpig rok ngu’ug kunuy e grain nge mada’ ko ngiyal’ ni nga ni mu’ i yuthumnag.” 22 Me ga’ar Naomi ngak Ruth, “Fakag, errogon, kabfel ni ngam un ko maruwel ko pi’in ppin ni yad ma maruwel u milay’ rok Boaz. Ya ra milay’ rok yug be’ ma sana ra unib ni magawon nigem.” 23 Ma aram mi i un Ruth ngak e pi tapigpig rok Boaz ko maruwel ngi i kunuy e grain nge yan i mada’ ko ngiyal’ ni ka ni mu’ i thumnag gubin e barley nge wheat riy; ma aram mi i par rok fare pin ni chitiningin figirngin.