5
Bangi babyor ni pilyeg e changar ngan guy ni be changeg
Gu sap bayay, ma aram mug guy bang i babyor ni kan bachiy ni be changeg u fithik’ e nifeng. Me fitheg fare engel ko mang e kug guy. Mug ga’ar ngak, “Bbabyor ni kan bachiy ni be changag u fithik’ e nifeng; re babyor nem e guyey e fit n’umngin ma ragag nge lal e fit radan.”
Ma aram me ga’ar ngog, “Daken e re gi babyor nem e kan yoloy ngay e buch wa’athan ni nge nad u daken e nam ni polo’. Ma barba’ i yang ko re babyor nem e be yog riy ni gubin e mororo’ ni bay ni chuweg u daken fare nam; ma barba’ i yang fare babyor e be yog riy ni gubin e pi’in yad ma mow ni go’ bogi ban’en e kiyra chuwegrad. I SOMOL ni Gubin ma Rayag Rok e be yog ni bay i l’oeg e re buch wa’athan ney nge yan, nge chuw ngalan e naun rok e pi’in tamororo’ nge lan e naun rok e pi’in ma mow ni go’ bogi ban’en. Ra par u lan e pi naun rorad ngar pired ni dakriy e fel’ rorad.”
Ba changar ni pilyeg ngan guy be’ ni bpin u lan ba dug
Ma aram me yib i m’ug bayay fare engel me ga’ar, “Mu changar! Ke yib ban’en!”
Mug fith ni lungug, “Ba mang?”
Me fulweg ni ga’ar, “Ba dug, ni be yip fan e denen ko fare nam ni polo’.”
Upongen fare dug e ni ngongliy ko plomow. Nap’an ni gu be yaliy, min pug upongen ngalang, mu lan fare dug e bay be’ ni bpin riy nike par nga but’!
Me ga’ar fare engel, “Re bpin ney e be yip’ fan e kireb.” Me chuchuy fare pin nga but’ u lan fare dug me fulweg e upong riy nga daken. Mug changar ngalang mug guy l’agruw i ppin ni yow be changag i yib ngog nib almarin porow ni bod pon e arche’ ni stork. Rabow ra chibiyew fare dug ngar changag nigew.
10 Mug fith fare engel ni lungug, “Uw e ngar fekew ngay?”
11 Me fulweg ni ga’ar, “Nga Babylon, ni aram e gin bay ra toyew e tempel riy ni fen. Nap’an e yira mu’ nag fare tempel, ma fare dug e bay ni tay u rom ngu’un meybil ngay.”