5
ÌPyang ìga aɗor
1 O gwong achwang ónəm oga aIsa̱rila, kà̱ ìpyang ìga aɗor va̱ mmami kà̱ nshìshi ka̱ apal ishi wo á.
2 Uza̱ ru chit, i yà ká̱ ngwong lap ka̱t,
uyen ɓyen ugəkgək uIsa̱rila ru chit.
Mmá yang ká̱ na kà̱ mbibin,
unəm uro yà pa̱ á gha̱p na a wong ka̱t.
3 UPonzhinan uYawe là onəm oga aIsa̱rila pa̱,
<<Ììtong va̱ i re ǹre ká̱ onəm ìkalong pa̱ ìzəng fa agbai te,
onəm ìgba̱l pa̱ ìzəng i ga i le,
ìro va̱ nnyi i re ǹre ká̱ onəm ìgba̱l pa̱ ìzəng fa agbai te,
pa̱ ogba̱pchi i ga i le.>>
O ɓa atak Inan na o lár
4 Iya̱m va ta̱ uYawe là ónəm oga aIsa̱rila,
<<O ram mi na o lár,
5 kang o ram aBetel ka̱t,
kang o ga aGilgal,
ka̱t te o pa̱l aBəyersheba ka̱t.
Ka̱kul mi ga ngwur onəm oga aGilgal i ga izwal
kang aBetel nnyi te i təm atak alakchi.>>
6 O ram uYawe na o lár,
ka̱t te uza̱ i fa wa apər
kà̱ nzhi aYusufu, i ri,
unəm uga njəjip ka̱ aBetel yà ka̱t.
7 Mmawo va o ga̱ɓa̱n akwali a nandər wal ìɗángɗáng
kang o kà̱r nnandər kà̱ mbin á yà iya̱m ilakchi ka̱ atak wo.
8 Uza̱ uwa fa ká̱ izhan ivanɓyen ká̱ nɗukkəri,
uza̱ uwa ga̱ɓa̱n atak akpá̱rkpà̱r ɓa anung ipin
alum nyáng ìzwam,
uza̱ wór ndəng ìwá
tar ka̱ apambin,
aɗiɗin pa̱ uYawe.
9 Wa aməlam, uza̱ i zhì onəm okankam,
kang i shin oga akamsəlang.
10 Oza̱ yang unəm unandər kà̱ nkəlang,
kang unəm va̱ i là nnandər te, oza̱ jan na.
11 Ka̱kul o tòng onəm oga nkun,
kang o nak amwa ìpirkur oza̱ ká̱ ìfan,
nzhi wo ngga ipáng nnəna̱n va̱ o me te,
ó yà ka̱ nra ka̱ ashishe ka̱t.
O yà ka̱ ngwa ndəng ìba̱ngba̱ng
iga ashe ìram wo inəna̱n ka̱t.
12 N nyi mmak nnap mɓá̱ngɓa̱ng wo nyi,
ká̱ iya̱m inga iga nnəm ayər va̱ mmawó kà̱ nnənəm.
Mmawo kà̱ nyán ká̱ onəm onəna̱n kang o ka̱m iya̱m ka̱kul nkà̱r nnandər,
te o nak pa̱ mmá náp akwali aga nnandər onəm oga nkun kà̱ nkəlang ka̱t.
13 Ka̱kul nva̱ ta te, unəm va̱ tətàn te uza̱ á ma̱r pa̱ kwak,
ka̱kul nra va̱ ta̱ nra mɓá̱ngɓa̱ng.
14 Ram inəna̱n iɓá̱ngɓa̱ng ka̱t,
ka̱kul na o lár,
nna chit te uYawe, Inan uga nggatək i yà nzəng ká̱ wo
dakdak wa nva̱ o là.
15 O yang inga,
o ma̱n inəna̱n.
O náp akwali aga nnandər kà̱ nkəlang wo,
mwote uYawe, Inan iga nggatək i nyám nnap nnəna̱n á ɓo akum aYusufu.
16 Ka̱kul uPonzhinan uYawe, Inan iga nggatək là pa̱,
<<Mí ga ǹyə́ng ayə́ng ká̱ aɗor ka̱ agəntəng,
mí nə́m ìwar ka̱ apal asa̱l.
Mí wór onəm ka̱ ashe ìram
ka̱ onəm oga nnyi nshì ìpyang pa̱ oza̱ á ɓa á yə́ng ikú.
17 Mí yə́ng ikú nza̱ atak nggo ka̱ ashe iram wo,
ka̱kul mi watar ka̱ ashe wo,*5.17 Ngwatar ka̱ ashe wo kà̱ nnyám akwali áYawe wa nva ka̱ ashe Nfa 12.12.>>
uYawe à là.
ÌLum àYawe
18 Álak ká̱ wo chit,
mmawó va̱ ká̱ ìgwak kà̱ ìlum àYawe á.
Iza̱ ìlum àYawe i nəm a wo yà?
Ìlum va̱ ta ìlum ìkpá̱rkpà̱r, ìghanghan ka̱t.
19 I yà wa ánəm va chər ìlir
te á ga pa ìwu kà̱ ìdəshìli.
Ka̱t te wa ánəm va chər ɓa
da̱r awo ka̱ izər nzhi
te ìpwang kà̱p na.
20 Nnandər ìlum àYawe ìkpá̱rkpà̱r ìghanghan ka̱t,
ìlum va̱ ta pa̱ zhiwuli pa̱ haa ka̱t.
21 <<N yang, n ɗom awop wo aga nnəm nchang izər ka̱t,
mɓut awop wo nəng ká̱ mi paɗi.
22 A yà pa̱ o ná iya̱m inana iga nshì pa̱ ɗwot ká̱ iya̱m inana iga ìpirkur te,
mi yà ká̱ nkəka̱m ka̱t.
Mi yà ká̱ nnak ishi ká̱ iya̱m nkang wo imwalmwal
ka̱kul iya̱m inana iga ntəm ikángkáng ka̱t.
23 Ga ká̱ ngghám achu ɓu ka̱ cho,
iya̱m inə́mnə́m ɓu a chàng sang nggo te,
n ɗom nfife ka̱t.
24 Ka̱ aɗor nva̱ ta te, re akwali aga nnandər á nang wa ndəng awang,
kang inəna̱n wa awangsang va i fu ka̱t á.
25 O ɓa ká̱ nləfər iya̱m ipápà iga iya̱m nkang, ká̱ iya̱m inana iga ìram wo ɓa á mi,
nva̱ mmawó ka̱ ashe anyin ìzun ìsəm pa̱ ineɗing ɗò, óIsa̱rila?
26 Iya̱m va̱ o nəm te, o wur ìchər wo
va mí wór pa̱ aSakut ûponzhi wo,
ká̱ aKaiwan inan wo iga izhan,
iva o nəm ká̱ awo wo á.
27 Ka̱kul nva̱ ta te, mi ga ká̱ wo ka̱ ashe mbin nro kà̱ mpyal aDimaska.>>
UYawe, aɗiɗin pa̱ Inan iga nggatək, à là.