30
Inan i ɓək anung âMasar
1 UYawe là nnap ká̱ mi kà̱ɗi pa̱, 2 <<Á ya anəm, là anung, là pa̱, <UNəm uga nzhi uYawe là pa̱,
<< <Ónəm oga aMasar, ó yə́ng
ka̱kul nra ngga nnəm ayər va̱ ta.
3 Ka̱kul ìlum rwam chit,
nra aYawe dát chit,
i yà nra ngga ìlulu,
awalang aga nzhì mbín.
4 Ndokchi i ɓa ka̱ apal aMasar,
mɓək anung i yà ka̱ aKush.
Awalang va̱ mmá gbá̱ng onəm ka̱ aMasar,
kang ìdudur mí wur, te mbang akukum i chwan.
5 Ìkum i ri aKush, ká̱ aPut, ká̱ aLudi, ká̱ nkpaktak aArabiya, ká̱ aLibiya, ká̱ nkpaktak onəm oga mbin va̱ sar nnap ká̱ aMasar i tak ka̱ na ka̱ atak ndokchi.
6 << <UYawe là pa̱,
<< <Onəm va̱ lə́p asəm âMasar te oza̱ i ru,
ìkəkam va̱ uza̱ i fam ká̱ te i kùr,
mí gbá̱ng oza̱ ká̱ ndokchi i ɓàn ka̱
aMikdol i ga i chu aSewene, mmami,
uNəm uga nzhi uYawe, n là.
7 Kang oza̱ i təm agúng ka̱ ashe oga mbín va̱ təm agúng chit,
kang oga itutong i təm agúng ka̱ ashe oga itong va̱ təm agúng chit.
8 Awalang va̱ mi ma̱l apər ka̱ ashe aMasar,
kang n gbá̱ng nkpaktak onəm oga nna nka̱mshi á na,
te oza̱ i nyi pa̱ mmami na uYawe.
9 << <Ká̱ nda va̱ ta te onəm oga nrè i fa ka̱ atak mi ka̱ ashe oga ajirgi ndəng, oza̱ i na ayər âKush va̱ kà̱ ntəm pa̱ shat. Kang mɓək anung i ɓa ka̱ apal oza̱ kà̱ nra ngga nzhì aMasar. Dər nna ta̱, á ɓa chit.
10 << <UNəm uga nzhi uYawe là pa̱,
<< <Mi nak ìdur oga aMasar i kùr,
ka̱ awó aNebukadnezar uponzhi uga aBabel.
11 Uza̱ ká̱ onəm wò, onəm va nəm ayər ji pa̱ kpaktak ka̱ ashe oga mbín,
mi re oza̱ i ɓa ká̱ nzhì ka̱ apambin va̱ ta.
Oza̱ i zə̀p oga ndokchi oza̱ ka̱ apal aMasar,
kang mbin va̱ ta i yə́l ká̱ akúm.
12 Mi nak awang aNilu i wom,
kang mi yap ká̱ mbin va̱ ta ka̱ awó onəm oɓá̱ngɓa̱ng.
Mi ɓa ká̱ nzhì ka̱ apambin va̱ ta ká̱ nkpaktak iya̱m va̱ ka̱ ashishe,
ka̱ atak awó onəmchən.
Mmami uYawe, n là.
13 << <UNəm uga nzhi uYawe là pa̱,
<< <Mi zhì oga ichər
kang mi nak oga ala̱ka̱n akpakpa ka̱ aMemfir i kùr,
kang uponzhi i yà kà̱ mbin aMasar lap ka̱t,
mi nak ayər i yà kà̱ mbin aMasar.
14 Mi nak aPatrot i yà agúng,
kang mi ma̱l apər âZowan,
mi pà akwali âNo.
15 Mi fə́r ká̱ mmən ìkum mi ka̱ apal aPelusiyum,
nna nkàm aMasar,
kang mi gbá̱ng nggatək ngga aNo.
16 Kang mi ma̱l apər âMasar,
aPelusiyum i ya nnàng mɓək anung,
aNo nnyi te mí nak oga akamsəlangkamsəlang i shin,
kang aMemfir i təm ka̱ ashe nɗaktak.
17 Ovannza̱m oga aWon ká̱ oga aPi-beset
i tak ka̱ atak ndokchi,
kang ochar nnyi te oza̱ i ga izwàl.
18 Ka̱ aTapanet te atak i kpà̱r,
ka̱ awalang va̱ n chwan iponzhi iga aMasar,
te nkə̀kam va̱ uza̱ i fam ká̱ te i kùr.
Ìlulu i gún na,
ovəvan ovan ochar nnyi te oza̱ i ga izwàl.
19 Kang wa nnà ta, mi ɓək anung âMasar,
te oza̱ i nyi pa̱ mmami na uYawe.> >>
UPonzhi Inan i nəm igwan ká̱ aMasar
20 Kà̱ nra ngga nfangshat ka̱ ape aga nggəshi kà̱ ìzun iga ìgba̱pchi ama̱n pa̱ zəng te, uYawe là nnap ká̱ mi pa̱, 21 <<Á ya anəm, m ɓəkchi ìgwal àFirona uponzhi uga aMasar chit, dər, mmá ran ìgwal va̱ ta ka̱t, le kang a tàn a kám a kur nkpán ndokchi ka̱t. 22 Ka̱kul nva̱ ta te, uYawe là pa̱, <Mmami kà̱ mmən ìkum ká̱ uFirona uponzhi uga aMasar, kang mi ɓun oga igwal pa̱ kpaktak, ìkamkam ká̱ ìro va̱ ka̱ m ɓəkchi chit á. Mi nak ndokchidokchi i ru ka̱ awúwo. 23 Mi lyangshin onəm oga aMasar ka̱ ashe oga mbín ngga apambin. 24 Kang mi nəm awó aponzhi uga aBabel i kám, mi nak ndokchi mi ka̱ ashe awúwo, te mi ɓəkchi awó aFirona, kang uza̱ i ɗum kà̱ mpipyal wa anəm va mmá nak aɓang á na aga nzhì irirì. 25 Mi kám awó aponzhi uga aBabel, kang awó aFirona ji wò i kú. Te oza̱ i nyi pa̱ mmami na uYawe, kà̱ nva̱ng va̱ mi nak ndokchi mi chit ka̱ ashe awó aponzhi uga aBabel, kang uza̱ i yichi na ka̱ apambin aMasar. 26 Mi lyangshin onəm oga aMasar ka̱ ashe oga mbín ngga apambin. Te oza̱ i nyi pa̱ mmami na uYawe.> >>