4
UYawe ya oIsa̱rila ká̱ mpat
1 O fe nnap-nlà àYawe, ónəm oga aIsa̱rila,
ka̱kul uYawe uwa yà ká̱ nnap-nlà ka̱ apal onəm oga mbin va̱ ta̱.
Ka̱kul nnandər, ká̱ mma̱n ngga nnandər yà ka̱t,
kang ǹnyi Inan á yà kà̱ mbin ta̱ ka̱t.
2 Nsóng anung, akwam, ngba̱l unəm,
ayi ká̱ mmai gang atak,
kang ntar nchə̀r ka̱ anung ka̱ anung.
3 Ka̱kul nva̱ ta te mbin vyap,
nkpaktak onəm va̱ ka̱ ashishe i kwarman.
Izhé iga anyin ká̱ oga inyil iga apaɓur,
ká̱ oga igwali ka̱ ashe ìwá i kú.
4 Káp ká̱ nnà te, kang unəm uro á ná mpat ûwanwò ka̱t,
kang uza̱ a pyen ka̱t.
Ka̱kul nnap-nlà va̱ ta̱ ka̱ apal ɓu,
ánəm uga mpyal awop.
5 Ó lə̀p ìfang ìzwam ká̱ alum,
unəm uga nlà ìchu Inan i lə̀p ìfang kpa nzəng ká̱ wo.
Kang mi zhì unang wo.
6 Onəm mi zhì chit ka̱ atak nlàng ǹnyi.
Ka̱kul pa̱ o yang ká̱ ǹnyi,
te n yang ká̱ wo kà̱ ǹyà onəm oga mpyal awop mi.
Ka̱kul o kong ká̱ nnap mpakpak Inan wo chit,
te mi kong ká̱ ovan wo kpa.
7 Wa nva̱ onəm oga mpyal awop kà̱ ǹyə́l te,
wa nnà ta nnap mɓá̱ngɓa̱ng kà̱ ngga mpyal.
Mi ga̱ɓa̱n ìzhàn oza̱ i təm iya̱m ìwuswa.
8 Oza̱ kà̱ nrì ká̱ ishi oza̱ ka̱ atak
nnap mɓá̱ngɓa̱ng onəm mi,
kang oza̱ i ná nkam irəng óza̱ pa̱
a ga mpyal ká̱ nnəm mpat.
9 Wa nva onəm kà̱ nnəm te, wa nnà ta kpa onəm oga mpyal awop,
mi ga nnyám ntàn oza̱, kang mi pyát nnap nnəm óza̱.
10 Oza̱ i ri iya̱m-nrì, ká̱ nnà te afu i yə́l oza̱ ka̱t.
Oza̱ nəm mmai, ká̱ nnà te oza̱ myak ka̱t.
Oza̱ kap ká̱ uYawe
11 ka̱kul ngwop ichər.
Ncè ká̱ ndəng ìba̱ngba̱ng ǹsámsàm,
yar nnap nnəm oza̱.
12 Onəm mí ram ichən ka̱ atak ìchər ìva̱ mmá nəm ká̱ akún,
kang idari iva̱k oza̱ i là iya̱m iva̱ óza̱ kà̱ ngga nfa.
ARuhu aga mmai á nak oza̱ kà̱ nlar,
oza̱ kap ká̱ Inan oza̱ chit ka̱kul mmai.
13 Oza̱ i ná nləfər ka̱ apal ìtə́ngtə́ng aɓam,
kang oza̱ i dung nggù ka̱ apal aɗuktum,
ká̱ akum ìkun ichir, ká̱ agwakchi, ká̱ iswáng va̱ ayì oza̱ chəchàng.
Ka̱kul nva̱ ta te, ovan wo ochar kà̱ nnəm mmai, kang oka wo i ram onunggwan.
14 Mi yà ká̱ nnyám ntàn ovan ochar wo,
nva̱ oza̱ nəm mmai ka̱t,
ka̱t te oka wo nva̱ oza̱ i ram onunggwan ka̱t.
Ka̱kul onunggwan ká̱ ishi oza̱ táng mmai,
kang i ná nləfər nzəng ká̱ ochar oga nnəm mmai kà̱ nzhi ìchər.
Onəm oga nlàng nkpán ìpir nnàp , i zhì.
15 áIsa̱rila, káp ká̱ mmai ɓu,
kang wa nak uYahudi a pat ka̱t.
Kang o ga aGilgal, ka̱t te aBet-avən ka̱t.
Kang o sóng anung ká̱ uYawe uga irirì ka̱t.
16 Ka̱kul oIsa̱rila kák ishi wa nkak ishi ìya ìna,
Te ǹyangmata̱, uYawe i kpak oza̱ kpak
wa ivan itam ka̱ atak nrì nnəna̱n ɗò?
17 UEfərayim gwang ishi ká̱ ìchər,
re na pa.
18 Nva̱ngva̱ oza̱ i gba̱l ká̱ ngwa iya̱m iwawa te,
oza̱ i ga mpyal ká̱ nnəm mmai.
Oza̱ ma̱n nnap nnəm ngga ìwuswa na ji.
19 Ǹyə̀r i wur oza̱ ka̱ ashe abasəm wò,
te oza̱ i yar ìwuswa ka̱ atak nná nləfər iya̱m ipápà oza̱.