12
1 UEfərayim i kpak ayə́r,
uza̱ i wà ayə́r nvàngváng nza̱ nra nggo
kang i ga mpyal ká̱ mmar akwam ká̱ ìfan.
Uza̱ yar nsar nnap-nlà ká̱ aAshur,
kang i ga ká̱ mmì ka̱ aMasar.
2 UYawe uwa yà ká̱ nnap-nlà ka̱ apal áYahudi,
uza̱ i nyám ntàn ûYakup ka̱ apal achəchən,
kang uza̱ i mwa na i ma ká̱ nnap nnənəm.
3 Ka̱ ashe afu uza̱ kpán ndong ashar á gənang wò,
kang uza̱ chu unəm te, á ma nggwak ká̱ Inan.
4 Uza̱ ma nggwak ká̱ uma̱leka, á ga nəm igwan,
uza̱ yə́ng kang à chal nnap nnəna̱nnəna̱n.
Uza̱ gwang ká̱ Inan ka̱ aBetel,
kang Inan là nnàp ká̱ na.
5 UYawe, Inan uga nggatək,
aɗiɗin uYawe, a va mí rəng na ká̱.
6 Te o le atak Inan wo,
o nyám mma̱n ká̱ nnandər,
o təm ká̱ nlok Inan pa̱ ɗəkər.
7 Uza̱ ɗom nnap mmwar atak ká̱ asikel
aga mmwap onəm wa oga aKanana.
8 UEfərayim là pa̱, <<N təm unəm uga ndur chit,
m ɓut ìdur chit ka̱kul ishi mi
ka̱ ashe nkpaktak nlə̀m mi, mmá ya mpat kà̱ mi ka̱t.>>
9 Mmami uYawe, Inan wo,
uva̱ fa ká̱ wo kà̱ mbin aMasar.
Mi nak o təm ka̱ ashe aghal kà̱ɗi ,
wa kà̱ ìlum ìnaknak ìga nchang izər.
10 N là nnàp ká̱ onəm oga nlà ìchu Inan,
te n nyám oga alár pa̱ makmak
kang n gba oga nnàp ka̱ atak oza̱.
11 A yà pa̱ inga nna yà ka̱ aGileyat te,
nnandər uza̱ i yà iya̱m ro ka̱t.
Oza̱ ná nləfər ká̱ ina ka̱ aGilgal,
ká̱ nnà te, atak nshì iya̱m awop oza̱
i yà wa ipáng iɓutɓut ka̱ anung ìram.
12 UYakup chər ga mbin aAram,
ka̱ ta na uIsa̱rila nəm inok ka̱kul achar,
ka̱kul achar uza̱ kpak iya̱m nkang.
13 Ka̱ atak ánəm uga nlà ìchu Inan, uYawe fa ká̱ uIsa̱rila ka̱ ashe aMasar,
kang ka̱ atak ánəm uga nlà ìchu Inan mmá kpak na.
14 UEfərayim bəshi nlak ìgwak,
te uPonzhinənan i re nchəchər ka̱ apal ishishi,
kang i mwa nnap nnəm ngga ìwuswawuswa á na.