5
Nnap-nshì aDebora
1 Ka̱ ilum va̱ ta te, uDebora ká̱ uBarak uya aAbinowam ununggwan shì nnap-nshì va̱ ta̱ pa̱,
2 <<Awalang va̱ onəm oga mpyal oIsa̱rila yar atak nsat oza̱,
awalang va̱ onəm na ishi oza̱ ka̱ ashe mma̱n oza̱ te,
ashep təm aji aYawe.
3 Ó fe mmawó oponzhi, ó gwong achwang mmawó ovan oponzhi,
mmami, à, mi shì nnap kpa ûYawe,
mi shì nnap-nshì ashep ûYawe, Inan oIsa̱rila.
4 <<ÁYawe, ka̱ awalang va̱ u fa ka̱ aSeyir,
awalang va̱ u fa ka̱ mbin aEdom te,
apambin yənggət, apal apaɓur zùk,
oga ìlulu zùk ndəng.
5 Oga aɓam yənggət ka̱ mpyal aYawe uga aSinayi,
ka̱ mpyal aYawe, Inan oIsa̱rila.
6 <<Ka̱ ashe nra aShamgar uya aAnat ununggwan,
ka̱ ashe nra aJayel te, mmá re ngwol oga anang asa̱l,
kang onəm oga nnəm achen wòl oga avan asa̱l aga ashe nzam.
7 ONəm oga ntəm ka̱ ashe ivan ìtong oIsa̱rila yà ka̱ ashishe lap ka̱t,
oza̱ yà ka̱ ashishe ka̱t, a ga chu awalang va̱ mmami, uDebora n wong,
n wong wa anang ka̱ ashe aIsa̱rila.
8 Awalang va̱ oIsa̱rila yak oga inan ìpipye te,
ìkum ɓa fa ka̱ oga anung asa̱l ìtong oza̱.
Ǹnyi te, mmá ya nggwanggwang nro, ka̱t te, aɓar aro
ka̱ ashe onəm oga nlung ìkum ìkalong ìsəm pa̱ ineɗing ka̱ aIsa̱rila ka̱t.
9 Ìgwak mi ga ka̱ atak onəm oga mpyal ìkum oIsa̱rila,
ka̱ atak onəm va na ishi oza̱ ká̱ nchang ìgwak.
Ashep təm aji aYawe.
10 <<Mmawó va̱ ó kwak oga azhaki achar aləfər,
mmawó va̱ ó təm ka̱ apal oga agodò nkongkong
kang mmawó va̱ ó chen ka̱ apal asa̱l,
ó nak ishi 11 ká̱ achu onəm oga nshì nnap ka̱ anung ndəng nka̱pka̱p.
Oza̱ ka̱ nshal nnap ka̱ apal igwan aYawe,
igwan va onəm oga ntəm ka̱ ivan ìtong ka̱ ashe aIsa̱rila nəm á.
<<Te onəm aYawe
fa ga oga anung asa̱l ìtong oza̱.
12 Yenda̱l, yenda̱l, aDebora.
Yenda̱l, yenda̱l, na u shì nnap.
Wong, aBarak,
wur izwal ká̱ okpa ìkum ɓu, áya aAbinowam.
13 <<Te aɓo onəm chumchum va̱ re
á ɓa atak onəm oga mpyal,
onəm aYawe fə́r vang atak mi,
ka̱kul nlung onəm kamkam.
14 Oro wong ka̱ aEfrayim, ova alə̀ng oza̱ ka̱ aAmalek kang a vàng,
akum ìjili aBenjamin oma yà ka̱ ashe onəm va̱ yar nva̱ng ɓu.
Onəm oga mpyal ìkum ka̱ aMakir fə́r vang,
ka̱ aZebulun te, onəm oga nkpán idari anəm uga mpyal ɓa.
15 Onəm oga mpyal aIsaka oma yà nzəng ká̱ uDebora,
nnandər, onəm aIsaka oma ka̱ yà nzəng ká̱ uBarak,
oza̱ yar nvəva̱ng fə́ng ga ashe aba̱nda̱m.
Ǹnyi te, ka̱ ashe akum ìjili aRuben te, anung gwar ka̱t.
16 Iza̱ nak kang ó təm ka̱ ashe afo itam yà?
ka̱kul pa̱ na ó fe mɓur ayər aga ngwór iya̱mkang ɗò?
Ǹnyi te, ka̱ ashe akum ìjili aRuben te, anung gwar ka̱t.
17 Akum ìjili aGileyat təm ka̱ agwong aUrdun,
sang kang akum ìjili aDan təm ka̱ atak oga agirgi ndəng ji oza̱ yà?
UAsher uwa ka̱ ntəm ka̱ anung ìwa,
uza̱ təm ka̱ atak mpa̱ng oga agirgi ndəng.
18 Onəm aZebulun ká̱ uNaftali jiwò te,
oza̱ yang ká̱ irirì oza̱ fa agbagba ìkum.
19 <<Oponzhi ɓa, oza̱ nəm ìkum,
oponzhi oKanana lung ìkum.
Ka̱ aTayanak, ka̱ atak oga ndəng ngga aMegido,
oza̱ wur iya̱m iga ngwur ka̱ atak ìkum ká̱ aazurfa ka̱t.
20 Ka̱ apaɓur oga izhan lung ìkum,
ka̱ ashe oga anang asa̱l oza̱, oza̱ lung uSisera.
21 Awang aKishon wur oza̱ ga ká̱,
awang agbakgbak va̱ ta, awang aKishon.
Chen ga, áirirì mi, yà ká̱ ikam.
22 Te ashar ipəri i chen i nap
mmá ka̱ nfe nnáp ndong ashar oza̱ i chen ká̱ ngghan ka̱kul nkam oga ashar oza̱.
23 <<UMa̱leka aYawe là pa̱, <vyap aMerot>,
vyap onəm oga ntəm ka̱ ashishe pa̱ gənggəng,
ka̱kul oza̱ ɓa pa̱ na ó ka̱mshi uYawe ka̱t,
pa̱ na ó ka̱mshi uYawe ka̱ nlung onəm kamkam ka̱t.
24 UJayel wà ká̱ nnap-nnəna̱n ji pa̱ kpaktak ka̱ ashe ochar,
uchar aHeber unəm oKeni,
uwà ká̱ nnap-nnəna̱n ji ka̱ ashe ochar oga ntəm ka̱ ashe aghal á.
25 USisera ɓəp ndəng te, uza̱ na mbyal á na.
Uza̱ ɓa ká̱ mbyal va̱ ká̱ mmì á na ka̱ ashe ìkpang onəm chumchum.
26 Uza̱ yar acham aga mpak aghal ka̱ awo,
uza̱ kpán nka̱m ala anəm uga inok ka̱ awo ari,
uza̱ ləp uSisera, uza̱ chwan ishi á na,
uza̱ chwan ishishi, kang a kyer na ka̱ mbe achwang.
27 Uza̱ kwangtal ka̱ mpyal achar va̱ ta,
uza̱ ru, uza̱ ra pa̱ kwak ka̱ ta,
uza̱ kwangtal ka̱ mpipyal, uza̱ ru,
ka̱ atak va̱ uza̱ kwangtal kà̱, uza̱ ru kú.
28 <<Unang aSisera dər atak ka̱ mɓol ayə́r nzhi,
uza̱ yə́ng ka̱ mɓol ayə́r nzhi va̱ ta pa̱,
iza̱ nak kang oga akeke ipəripəri kali ká̱ mɓa yà?
Iza̱ nak kang nva̱ng ashar oga akeke ipəripəri kali ka̱ mɓa yà?
29 Ovanchəchar va̱ tàn ji na ama̱n á na pa̱,
nnandər, uza̱ pak inok nlà îshi wò pa̱,
30 <Oza̱ ka̱ mmwo kang oza̱ i kap iya̱m iga ngwur ka̱ atak ìkum ka̱t ɗò?
Nza̱ unəm nggo ya uyenchar pa̱ uzəng, ka̱t te pa̱ oparəm,
ilukwan iɓyenɓyen iga mbwai ûSisera wa iya̱m iga ngwur ka̱ atak ìkum,
ilukwan iɓyenɓyen ira̱pra̱p iga mbwai,
ilukwan iɓyenɓyen ira̱pra̱p iga mbwai va ji ka̱kul nsham isham
nkpaktak oga iya̱m va̱ ta̱ iya̱m iga ngwur ka̱ atak ìkum á?>
31 <<Re nkpaktak okpa ìkum ɓu á zhì, áYawe.
Ǹnyi te, re nkpaktak okpa ɓu a yà wa alum
awalang va i fa ka̱ ashe ikam wò.>>
Te mbin təm ká̱ ikángkáng ìzun ìsəm pa̱ ineɗing.