Tagnaˈ sulat amban Yahiyahin
Pahāti sabab meˈ tellu sulat amban Yahiyahin
Si Yahiya inin dangan meˈ sampūˈ duk duwe tapeneˈ si Isa Almasi dinaˈakne magmahalayak lapalnen. Panulat Yahiya sulatne inin, bahiˈ ne iye.
Sulatne tagnaˈin pinasampay si kēmon masandel pu si Isa Almasi si kalahat-lahatanin. Masa miyaˈan niyaˈ meˈ aˈa magtoloˈ manggaˈi mabennalin. Paˈin meˈ sinduwehin weˈ si Isa dumaˈin Anak Tuhanin saguwaˈ manusiyaˈ hadja. Meˈ sinduwehin isab magpaˈin weˈ Anak Tuhanin gaˈ bakas magbaran manusiyaˈ. Duk niyaˈ pe meˈ panoloˈ seddili.
Si sulatne inin magaka Yahiya pinapastiˈ weˈ si Isa Almasi bennal Anak Tuhanin duk bennal isab iye manusiyaˈ.
Sessaˈanne isab meˈ aˈahin weˈ subey pandogahande teˈed meˈ magtoloˈ si siyehin bang magsaliˈ ke panoloˈden duk toloˈ Almasihin supaya halliˈande toloˈ manggaˈi mabennalin.
Papastiˈne isab tuˈu weˈ kēmon meˈ masandel pu si Isa Almasihin duk mamalasa si Tuhanin subey isab kalasahande meˈ pagkasiden.
Kaduwe sulatnen pinasampay si dambuwaˈ “dende tapeneˈ weˈ Tuhanin duk si meˈ anaknen.” Dinaˈak isab siye maglasa-ilasa duk tinoloˈan siye weˈ ne sabab meˈ aˈa magtoloˈ manggaˈi mabennalin.
Katellu sulatnen pinasampay si dambuwaˈ lella inēnan si Gayus. Sinanglitan weˈ ne si Gayus peggeˈ sayuˈ iye duk tinabang weˈ ne meˈ masandel pu si Isa Almasi malumengngan magmahalayakin.
1
Lapal mangurung umulin
Sulatante kaˈam sabab Isa Almasi, iye Lapal mangurung umulin. Tagnaˈ awwalley pe teˈed andang ne iye. Takale kami iye missā duk takite kami iye duk meˈ mata kami inin. Aweˈ, takite kami iye duk taˈantan kami duk meˈ tangan kami inin. Pinakitehan iye si bantuk manusiyaˈ. Asal takite kami iye hangkan naksiˈ kami ngakahan kaˈam sabab mangurung umul manggaˈ niyaˈ tamanannen. Tagnaˈley laˈi iye si Samane Tuhanin duk pinakitehan iye si kami. Manjari inaka isab weˈ kami si kaˈam bakas takite duk takale kamihin supaya kaˈam matuk si kami duk kite bi kapagdambuwaˈ duk Samate bi Tuhanin duk sampay Anaknen, Isa Almasi. Sulatante kaˈam inin supaya jukup kēgten bi kēmon.
Tuhanin dantaˈ
Inin bakas takale kami amban Isa Almasihin duk aka kami isab si kaˈam: weˈ Tuhanin asal dantaˈ duk gaˈ niyaˈ kalindeman si iye. Hātinen asal gaˈ teˈed niyaˈ duse-dusene. Hangkan bang paˈinte weˈ magdambuwaˈ kite duk Tuhanin bu patennaˈ pe kite dem lindem, hātinen maghinangan pe kite laˈat, magdustaˈ kite. Takite du si meˈ bissāten duk si meˈ hinanganten weˈ magdustaˈ kite. Saguwaˈ bang patennaˈanten dem dantaˈ kuweˈ Tuhanin dem dantaˈ, manjari magdambuwaˈ dem atey kite bi kēmon, duk sabab lahaˈ si Isa, Anak Tuhanin, puwas kēmon duseten duk sutsi ne kite.
Bang paˈinte weˈ gaˈ niyaˈ duse-dusete, akkalante hadja diten duk gaˈ niyaˈ kabennal dem ateyten. Saguwaˈ bang bennalante duseten si Tuhan, ampunne duseten duk sutsine ateyten amban kēmon hinangante malaˈatin. Peggeˈ iye inin pananggup Tuhanin duk hinangannen bentel. 10 Bang paˈinte weˈ gaˈ kite bakas magduse, kuweˈ du paˈinte weˈ Tuhanin dustaˈan duk gaˈ ennaˈte meˈ panoloˈnen dem ateyte.