3
Na, peggeˈ gaˈi ne tasandal kami magsusehin, hangkan magsakap kami weˈ duwangan kami paˈamban tuˈu si Aten. Duk pinapiyu weˈ kami Timoteo si kaˈam. Pungtinaˈite bi iye duk saweˈku iye maghinang si Tuhan magmahalayak aka-aka hāp sabab Almasihin. Papiyu kami iye supaya paˈasigne ateybin duk supaya ngabasag sandelbi si Tuhanin. Gaˈi kami mabayaˈ weˈ sabab meˈ kasigpitanbin niyaˈ kaˈam nayikutan meˈ toloˈ mabennalin. Kataˈuhanbi ne du andang weˈ sukuˈte bi kēmon palabey si kasigpitan. Peggeˈ paluˈu kami si kaˈamin, bakas kaˈam akahan kami andang weˈ niyaˈ tekka si kite bi kasigpitan. Duk kataˈuhanbi du weˈ iyuˈ ne tekka. Suse ku teˈed bang saˈingge du kaˈam luˈu, hangkan hep peggeˈ gaˈi ne tasandalku, daˈakku piyu Timoteo mastiˈan kaˈam bang basag pe du ke sandelbi pu si Isa Almasihin. Talew ku kaw kaˈam tasassat weˈ seyitanin. Peggeˈ bang saˈupama taboˈo kaˈam weˈ sassat seyitanin, na, gaˈ ne niyaˈ kagunahan meˈ hinang kami si kaˈamin.
Saguwaˈ tiyaˈ ne tekka balik si Timoteo duk sinna teˈed kami peggeˈ hāp teˈed bissāne sabab kaˈamin. Paˈinne weˈ basag sandelbi si Tuhanin duk asal maglasa-ilasa teˈed kaˈam. Paˈin Timoteo isab weˈ luwal kami inesseb weˈ bi duk batang teˈed kami kitebi kuweˈ kamihin batang isab magkite duk kaˈam. Hangkan hep, meˈ kapungtinaˈihanku, bisan kami dem kasigpitan duk kabinasahan, asig atey kamihin peggeˈ kataˈuhan kami weˈ gaˈ du usaˈ sandelbi pu si Isa Almasihin. Hāp ne atey kamihin peggeˈ kataˈuhan kami weˈ teteg kaˈam pu si Isa Panuhutanten bi. Hadje pagsukul kami si Tuhanin sababbi, peggeˈ kēgan atey kamihin sabab sandelbin. 10 Ellew-sangem māku-māku kami si Tuhan karayaw magkite du kite bi magtampak supaya kaˈam tatabangan kami duk dambūs-būs ne sandelbin.
11 Karayaw kami tabangan Samate bi Tuhanin duk Panuhutanten bi Isa Almasi supaya kami tapiyu si kaˈam. 12 Duk karayaw magkasōng kaˈam maglasa-ilasa, duk malasa isab kaˈam si kēmon aˈa, kuweˈ du pangalasa kami si kaˈamin. 13 Karayaw patetegne ateybin supaya kaˈam sutsi duk gaˈ niyaˈ sallaˈ-sallaˈbi si harapan Samate bi Tuhanin bang pitu ne balik Panuhutanten bi si Isa magtuhut duk meˈ aˈa sukuˈ si iyehin.