Jūd si Rut
Pahāti sabab jūd inēnan si Rut
Istori inin istori masaley teˈed. Amban masa si Rut inin taman kuweˈitu labi meˈ tellumpūˈ ngibu tahun palabey. Tagnaˈ inakahan hadja istori inin amban pangkat-mamangkatin taman ubus ne Sultan Daˈud magantan si lahat Israˈel. Behu sinulat inin weˈ aˈa Israˈel.
Si Rut inin dembuwaˈ dende bangsa Moˈab masaley. Bangsa Moˈab inin tubuˈan si Lot. Tabatsa sabab aˈa inēnan si Moˈab si sulat Panagnaˈan 19.30-38. Lahatden tudju silangan amban Tahik Matey. Kuweˈitu lahat miyaˈan sinakup si lahat Jordan.
Magella si Rut inin si dembuwaˈ lella bangsa Israˈel patennaˈ laˈi si lahat Moˈab. Pag matey ellanen nuhut metoˈanen iye hap lahat Yahudiya. Lahat inin sinakup si lahat Israˈel bu tudju seddepan amban Tahik Matey. Nuhut iye metoˈanen peggeˈ malasa teˈed iye si metoˈane duk ngandel si Tuhan meˈ bangsa Israˈelin.
Masaley si bangsa Israˈel bang niyaˈ lella matey, dembuwaˈ meˈ usbane mapinggedin subey magkuwiraw nabangan baluhin duk iluˈ-iluˈin. Saguwaˈ bang gaˈ niyaˈ anak mamateyin atawa pungtinaˈine, usba mapingged iyan subey melli bulak mamateyin. Dem saraˈde masaley gaˈi makajari pinabellihan bulakin si aˈa seddili. Bang baluhin magella balik subey isab si kaˈusbahan ellane ley. Anakde lella tagnaˈin kinimmatan puliˈ mamateyin bu bulak mamateyin ujudnen si puliˈ inin isab.
Pag laˈi si Rut si lahat Yahudiya magella iye balik si dembuwaˈ usba ellane ley bu ampune tuˈutin si Daˈud, iye sultan mabangsahan si Israˈelin.
Takite si istori inin weˈ - bisan si Rut tagnaˈ dumaˈin aˈa Tuhanin - tinabangan iye weˈ Tuhanin peggeˈ ngandel teˈed iye si Tuhan.
1
Naˈomi duk si Rut
1 Masa ewwal pe, masa gaˈ pe niyaˈ sultanlit. ‘masa meˈ hukum pe’. Siye mangantan lahat Israˈelin masaley. si lahat Israˈel, niyaˈ unus dem lahat miyaˈan. Dembuwaˈ lella amban puweblo Betlehem laˈi si Yahudiya pī dahuˈ hap lahat Moˈab patennaˈ laˈi. Magtuhut duk andane duk duwe anakne lella. 2 Ēn lellahin Elimelek duk ēn andanen Naˈomi, ēn anakden si Mahlon duk Kilyon. Tubuˈ si Eprata siye amban puweblo Betlehem laˈi si Yahudiya. Pī siye hap lahat Moˈab duk petennaˈ laˈi.Lahat Moˈab inin nampal silangan amban Tahik Matey.
3 Manjari pag laˈi siye matey Elimelek ella Naˈomihin, duk taˈamban iye duk duwe anakne lellahin. 4 Bu maganda isab siye si dende amban lahat Moˈab miyaˈan, ēn dembuwaˈin si Orpa duk dembuwaˈin si Rut. Pag laˈi siye patennaˈ meˈ sempūˈ tahun 5 matey isab disi Mahlon duk si Kilyon. Ubus luwal Naˈomi matelebbihin, gaˈ ne niyaˈ ellane duk anakne.
6 Pag takalene laˈi si Moˈab weˈ tinabangan teˈed weˈ Tuhanin meˈ aˈa Yahudiyahin duk manjari ne teˈed tinanemden, magmemes Naˈomi moleˈ balik magtuhut duk meˈ eyuˈannen. 7 Tahalaˈ iye amban lahat bakas patennaˈanden duk harap pī ne siye duk meˈ eyuˈannen tudju lahat Yahudiya.
8 Pag laˈi siye si lān paˈin Naˈomi si meˈ eyuˈannen, “Moleˈ kaˈam balik pī hap lumaˈ inaˈbin. Karayaw tumbasan Tuhanin du kēmon hinanganbi mahāp bakas hininangbi si akuhin duk si meˈ ellabi ley. 9 Duk karayaw ellahan pe kaˈam balik duk ngasuwaˈ kaˈam kasanyanganbi si lumaˈ ellabin.” Ubus inūkan siye weˈ Naˈomi. Saguwaˈ magtāring siye. 10 Duk paˈinde si iye, “Nuhut kami kaˈu pī si lahatnu.”
11 Nambung Naˈomi paˈinne, “Balik ne kaˈam meˈ anakku. Weˈey kaˈam mabayaˈ nuhut aku? Paˈinbi ke weˈ nganak pe ku balik duk niyaˈ hinangbi ella? 12 Hap lumaˈ ne kaˈam, dende. Bahiˈ ne ku, gey ne ku ellahan. Bisan ku upama ellahan ninaˈ duk anakan, 13 agadbi pe ke siye samantaˈan gey siye hadje? Gey kaˈam magella seddili? Gey makajari, meˈ anakku. Takite ne si meˈ ilabeyankun weˈ pinahunitan ku weˈ Tuhanin duk maˈaseˈ ku si kaˈam.”Masaley si bangsa Israˈel, bang matey lellahin bu gaˈ niyaˈ anakne subey pungtinaˈinen maganda si baluhin. Anakde tagnaˈin kinimmatan puliˈ mamateyin. 14 Nāring siye balik. Ubus inūkan weˈ si Orpa metoˈanen duk moleˈ ne iye balik. Saguwaˈ si Rut gaˈi mabayaˈ tahalaˈ amban metoˈanen.
15 Paˈin Naˈomi si iye, “Bilasnun moleˈ ne balik pī si usbanen duk si tuhan-tuhan bakas sinambahayangnen. Pī ne kew nuhut iye.” 16 Saguwaˈ nambung si Rut paˈinne, “Daˈa ku sasaˈanun. Nuhut ku kaˈu. Tungan-tungan papīhannu, nuhut ku. Intag-intag palaˈihannu iye isab palaˈihankun. Meˈ usbanun, iye isab meˈ usbakun. Duk Tuhannun iye isab Tuhankun. 17 Intag-intag kamateyannun, iye isab kamateyankun. Duk iye du isab pangubulan akuhin. Ambat ku pinagmulkaˈan weˈ Tuhanin bang ku pasapeˈ amban kaˈu seddili amban kamatey.” 18 Pag kataˈuhan Naˈomi weˈ gaˈ si Rut magduwe-duwe manuhut iyehin, gaˈ ne iye kebbutan.
19 Palanjal ne siye tudju Betlehem. Pag tekka siye laˈi, hiyul meˈ aˈa si puweblo miyaˈan. Duk paˈin meˈ dendehin, “Naˈomi ne hatiˈ!” 20 Nambung iye paˈinne, “Daˈa ku ēnanun bi Naˈomi.Hāti Naˈomi mekesinna-sinna; hāti Mara paˈit. Ēnanun bi ku si Mara. Peggeˈ Tuhan Mabalakatanin inurungan ku weˈ ne kasigpitan. 21 Patahalaˈku mabittuˈuhin, kumpeleto ku. Sakayiˈ ku pinapitu balik weˈ Tuhanin, gaˈ niyaˈ ine-ine. Daˈa ne ku ēnanun bi Naˈomi peggeˈ inurungan kasusehan ku weˈ Tuhanin, pinatekkahan balaˈ ku weˈ Mabalakatanin.”
22 Manjari sā miyaˈan Naˈomi tabalik magtuhut duk si Rut, eyuˈannen dende amban lahat Moˈab. Tekka siye si Betlehem beytu nagnaˈ pagpagani barley.Barley da bayuˈ tinanem, magepang duk buwaˈ tirigu. Bang bissā Ispanyul inēnan cebada. Pinagani kuweˈ paley.
1:1 lit. ‘masa meˈ hukum pe’. Siye mangantan lahat Israˈelin masaley.
1:2 Lahat Moˈab inin nampal silangan amban Tahik Matey.
1:13 Masaley si bangsa Israˈel, bang matey lellahin bu gaˈ niyaˈ anakne subey pungtinaˈinen maganda si baluhin. Anakde tagnaˈin kinimmatan puliˈ mamateyin.
1:20 Hāti Naˈomi mekesinna-sinna; hāti Mara paˈit.
1:22 Barley da bayuˈ tinanem, magepang duk buwaˈ tirigu. Bang bissā Ispanyul inēnan cebada. Pinagani kuweˈ paley.